Jisubí:la Somoria Mimédé
4
Jisubí Jonméyang luyírsunném bojéyangko paːla baptisém biyadung émna Parosikídíːdé tadbeksuto, 2 aroruːpé Jisubí baptisém bimangai, émpigeːla bíkkol luyírsunékídíːdéːpag bidagai. 3 Édílo Ruːtumbí édém kinton, bí Judiaːdém mépagla Galiliːpé lékoda gílatkangku. 4 Jisubí Somoriaːdok gípadla gípénampé ikang.5 Édémpila bí Somoriaːdok Saikar émnam taondoːpé gíto, édé taondé Jakubbí bík ao Jusebmé binam aríg-amoːdok kéraːdo dungngai.a 6 Jakupké siruːdé odo dungngai, Jisubí lambégíla duːnamé gídírra sirung kéraːdo tedrasuto. Édé longé loːtung ayírai.
7 Odo Somoria miméko asi tokolo gído, Jisubí bím luto, "No ngom asi ajjouko tíːdopé biyénei?" 8 Bíkkol luyírsunékídíːdé donam rékolo taondoːpé gíkang.
9 Somoria mimédé bím luto, "No Jiudi taniːko odokké ngo Somoria miméko. Kapé no ngokkolok asiko kokan?" Kapila:né Jiudi:yé Somoriaːlok alagém domaːtíːmang.b
10 Jisubí bím lulatsutoku, "No Ruːnék binam amandém kinnamka:mílo, odokké séːko nokkolok asiko tíːpé émna kola duːji bímsin kinnamkaːmílo, no bíkkolok koiyai, odo bí nom turné assém biyyai."
11 Mimédé bím luto, "Ruːtuma, nokké asi suksa:nanné okkosin kamang odokké siruːséːsin oːrídag; no okolok édé turné asidém paːyén? 12 No ngoluk abu Jakubméyaːsin bottéyaːnei, séːko ngolum séː siruːsém bitag odokké bí aíésin sidok assém tíngka, odokké bík ommangélaː bík so:bo-sobenkídíːdéːsin tíngka?"
13 Jisubí bím lulatsutoku, "Séːkoi sok assém tíːyéji, bí lékoda asi tíːlíːyéku, 14 émpigeːla séːko ngok binam asidém tíːyéji bí édíloːsin assém tíːlíngkumaːyé. Aropé, ngo oko assém bím biyéji, édé turyarné turnamdém pangkodoːpé asi jilipé ila bittíla duːbiyé."
15 Mimédé bím luto, "Ruːtuma, ngom édé asidém biːpén odo ngo asi-tíːlíngkumaːyébo odokké soːpé gíla asi topénammé kamaːyé."
16 Jisubí bím luto, "Émpém, gíkang, nok milboːdém gokpoːta odokké soːpé gíladlangku."
17 Mimédé bím lulatsutoku, "Ngokké milbongé kamang."
Jisubí bím luto, " 'Ngokké milbongé kamang', nok édé lunamdé arro." 18 Émpigeːla arodé sémpé, nokké milbongé angngoko dungngai, odokké nok suːpakké duːjonsunam taniːdé nok milboːmang. No okko émna suːpag lukaji édé arro."c
19 Mimédé bím luto, "Ruːtuma, ngok méngkípé no lungor-lunékopé. 20 Ngoluk abukídíːdé séː adiːso kumdagai, émpigeːla nolu Jiudikídíːdé ludag taniyé Jerusalemdoːmín kumpé lagidang.''
21 Jisubí bím luto, "Bírmé, ngok lunam agomsém méngkésulang, kapéné édé ayírdé píngadobo édílo nolu Abumé séː adiːsoːla Jerusalemdo kummabo. 22 Nolu séːkom kumdoji bím nolu kinmang; ngolu séːkom kumdoji ngolu bím kindag, kapéné moturbinamdé Jiudikídíːdokké gílenné.d 23 Émgom ayírko píngadobo odokké édé ayírdé píngangkaːbo édílo aropé asinbila-kumné Abumé yalolo:la arolo kumyé, kapéné Abubí bulukkémpin kumnékídíːdém madag. 24 Ruːnébí yallo, odokké bím kumnékídíːdé yaloloːla arolo kumpé lagidag."e
25 Mimédé bím luto, "Ngo Messiamé kindag séːkom Kiristo émdoji, bí gídobo. Bí ngolum appíngém léngkanbiyé."
26 Odo Jisubí bím luto, "Séːko nom luposula duːji ngo édé Messiabí."
27 Odo ayírardo bíkkol luyírsunékídíːdé gílangkula bím mimédok lédílo luposula duːdopé kaːla bulu méngaksukang. Émpigeːla séːkosin tautoma, "Nom okkom lagidang, édémanggom kapila no bík lédílo luposula dun?"
28 Odo mimédé bík asi kiːlíːdém mépaggeːla, taondoːpé gíladgekula taniːkídíːdém lubitoku, 29 "Gíla kangkítakai, ngo oko okkom itoji édé appíːdém taniːkoné lugabamto. Séː amisé Kiristobíːnéya?"f 30 Bulu taondokké gílenna bíkkodoːpé gíngabdo.
31 Odo ayírdo bíkkol luyírsunékídí:dé bím lumolumola luto, "Rabbi, o:kaiko dorasupoːto."
32 Émpige:la bí bulum luto, "Ngokké dopénammé dung nolu okodok légaːdém okkomsin kinmang."g
33 Odo bíkkol luyírsunékídí:dé akoné akoném luto, "Sé:kaibí bím donamém bombituːpé?"
34 Jisubí luto, "Ngok donamdé édé sé:ko ngom mélíktuːji bík méngkamdémpé ager-gerbinamdéːla bík agerdém gerredbinamdé. 35 Nolu lumaːnei, 'Po:lo pípi:komíloi gatkanyébo?' Ngo nolum lubidung, noluk amigém darra arígoloːpé nge:la kangkítokǃ Bulu minna gatkanduːbong. 36 Séːkobí gadyéji bí gadrém paːyé, odokké bí turyarné turnamdok légaːpé apí-aːyém tíkumsudag, édémpila gadnébíːla pidnébí lékkopé méːpoyé. 37 Kapéné sidok tayéːlo séː lunamsé arodagː "Akoné piddo odokké akoné gaddo."h 38 Oko arígdém nolu imangaːji, ngo nolum odoːpé gaddokupé mélígdung. Séːkai akoné angkir biddanna arígdém ika, odokké nolu buluk ager-gernadém gatsíːmosíːtoku.''
39 "Bí ngok inam ager appíːdém lungabbito," mimédok édé lukanbikunamsokki bojéruːngkopé édé taondok Somoria taniyé bím méngkésuto. 40 Édémpila édílo Somoria taniːkídíːdé bíkkodoːpé gítoji, bulu bím buluk lédílo duːmíndopé lumolumola luto, édémpila bí loːnyiko duːtetto.
41 Odokké bík agomém tadla bojéruːngko taniyé bím méngkésuto.
42 Bulu édé mimédém luto, "Ngolu nok lubinammoːdokki méngkésumaːbong; suːpag ngolu aíésin tadbeksutagbo, odokké ngolu kindagbo séː taniːsé aroruːpé moːpísém Moturkubinébí."
Jisubí Opisarkolok Ao:ko Ésaːmotoku
43 Loːnyi lédupé bí Galiliːpé gíto. 44 Kapéné Jisubí aíé lukansubito lungor-lunném bík aíké doːluːdo ménggésumang.i 45 Édílo bí Galiliːpé gípíːton, Galili taniːkídíːdé bím boríksuto. Bí Jerusalemdo Gíboːla donam Gíːdído okkom itoji édé appíːdém bulu kaːto, kapilaːné bulusin édé gíːdíːdoːpé gíka.
46 Bí lékoda Galiliːdok Kanadoːpé gíkaku, okolo bí assém apoːpé imokaji. Odokké odo opisarko dungngai sék aoːdé Kaparnaumdo kila dungngan. 47 Édílo édé taniːdé Jisubí Judiaːdokké Galiliːpé gípíːdung émna tadbeksuton, bí bíkkodoːpé gíla bík aoːdém séːko sikíramna dungngan bím kaːpídbidokupé kumdanna luto. 48 Jisubí bím luto, "Nolu, taniːkídínga, édíloːpé méːpílaːmaːnam agerém kaːmaːyéji odoloːpé nolu méngkésumaːyé."j
49 Opisardé luto, "Ruːtuma, ngok ao:dé simango:dapé gítokpoːto."
50 Jisubí lulatsutoku, "No gíkangku; nok aoːdé turyé."
Taniːdé Jisuk agomdém méngkésugeːla gíkangku. 51 Édílo bí lambíːdo gílangkula dungngan, bík ager-gernékídíːdé bím ríksula bík aoːdé turkangku émna lubito.
52 Édémpila bí bulum tauto éddarro bí ésangkankun émna, bulu bím lubito, "Mélo longé-lu:tuːdo bí ramngasukang." 53 Abudé kindagai édé ayírraːdo Jisubí bím luka, "Nok aoːdé turyé." Édémpila bíːla bík okum-érang appíːdé méngkésuto.k
54 Judiaːdokké Galiliːpé Jisuk gínamsé lémyaboi, odokké sidé bík inam annyinané méːpílaːmaːnam agerdéai.