Pompotisu mekona hai miano motu'a, da mongura, ronga ata
2
1 Sawali ico'o, kiu pompotisu, kahioomo da tekona. 2 Oliwihira tama da memotu'a, kando taha'o pelaroando, te'angga, mepekiri ari, sabara tineiho karasai, naamo moroso parasaeando ronga pololarondo.3 Kanapo na'anda tina da motu'a, oliwihira kando tora pangkuku, ndo'osie mososa'o miano, osie tepo'ata hai nindo'u. Kahioomo kando pompotisu'ako da moico, 4 ronga paguru'ira tina da mongura, kando lou'ira samporando ronga anado, 5 kando pepekiri ari, molinyaa pelaroando, to'ori atoro'o laro laicando, moico larondo, turu hai samporando. Kicanamo koie, haratiano Apu Alla nai da'amo nta pinosala'i.
6 Kanapo ko'ira tora mongura, oliwihira kando pepekiri ari. 7 Ronga ico'o, kahioomo kau poweweu da moico, kai tewali pe'ontoano miano hai luwu niweweuu. Kiu pompotisu, kahioo kai mongkote ronga laronto'uu. 8 Pogau kai menona, kai osie pinosala'i, kando mokoko'anu miano da sai eheko, nasai hina dahando nta to'ori gauri mosa'okita.
9 Oliwihira ata kando turu hai ponggawando hai luwu niweweundo, ronga pokosanaa'akondo'o pelaroando. Ndo'osie megagahi 10 atawa mpononako. Kahioomo kai inonto sipado hindo kona bangu ronga konianto'u. Kicana koie luwu sipado moicoomo, pompotisuno Apu Alla Gurusalamato dahomo nta tinarima moico hai miano.
Pompeehawano Apu Alla pokosalama'o luwu to manusia
11 Kana'umpe ariomo Apu Alla pokomentoda'o pompeehawano da pokosalama'o luwu to manusia. 12 Apu Alla motisu'akita'o pompeehawano kato bintaa niweweu da mosa'o ronga pinokeahakondo miano wita'ea, kato tora kana miano da mepekiri ari, da tekona, ronga pangkuku, diekana hai wita'ea, 13 ronga totarimaa oleo mohende'a da pinerahi-rahinto, nta menteehanomo kuasano Apu Alla Apunto da pinoko'owose ronga Gurusalamato Yesus Kristus. 14 Ariomo soroo wotoluno, kato mentepulosi hai luwu niweweu da mosa'o, yahopo kai pokomowuakita tewali umati mpantano da mokua moweweu moico. 15 Kana miano da pinoweehi kuasa, potisu'akondo'o koie luwu, oliwihira ronga pokompehawa'ira, kai osie da'a miano da paruruko.