Surano i Paulus hai
Titus
Salamu
1
1 Die sura mebinta hai aku i Paulus, atano Apu Alla, ronga rasuluno Yesus Kristus. Apu Alla tena'aku kaku pokomorosoakondo'o parasaeando miano nirurukino, ronga potisu'ira ponto'ori da menona, kando tora moico nunu'o agamanto. 2 Koie ponto'ori da menona wawakita momperahi-rahi hito daa nta mo'awa tora ngkaidaaha, kana da pedandino Apu Alla daanopo sai hina wita'ea. Ronga Apu Alla nai paisa ehe mekulepi. 3 Sakonaa wotuno, kai pokomentoda'o Apu Alla haratiano hai Lele Mohende. Kai patugasiaku Apu Alla Gurusalamato, kaku leleako koie haratiano.4 Die sura nta dungku hai Titus, kowati ana mpine'ihincu hitona mpe'asa imanimo. Kahioomo kando e'elengua Apu Alla Tamanto ronga Yesus Kristus Gurusalamato peehawako ronga mapuhiako'o barakati.
Tugasino i Titus hai Kreta
5 Patudungku kaku bintanico hai pulo Kreta, yahoo kau atoro'o hapa da sai da'apo te'atoro, ronga mompotoro raro ngkamotu'ano jema'a hai koa-koa'o kampo da maroa, kana hicu ari oliwico. 6 Koie danta tewali kamotu'ano jema'a kahioo kai osie da'a pekebaakoano, te'asasi samotu'ano, raro anano yahoo miano da parasaea, da sai ehe nta ninee miano da sa'ia-iaa niweweuno atawa da sai ehe te'oliwi. 7 Powawaino jema'a yahoo miano da atoro'o pohedoano Apu Alla, nai tewali da'a peposala'iano: nai tewali mentaba, osie mesa'o-sa'o laro, ronga osie bata lima. Nai tewali miano pando'u, nai tewali miano mpongkaa doi, 8 sawali te'ungkahi wambano mompetoka, ehee da moico, mepekiri ari, mongkote, molinyaa mpelaroa, ronga montaha pelaroa. 9 Kahioo kai ungkaario pompotisu da menona kana hi ari pinotisu, kai to'ori oliwiakondo'o miano koie pompotisu da moico, ronga tisu'akondo'o tesalado miano da sai ehee koie pompotisu.
10 Kana'umpe me'aluo miano da sai ehe te'oliwi, kontu'uma miano da kanahi, luwuo miano mparasaea paraluu'o mpesuna. Da nigaudo te'iaasi da sai koguna ronga da mompokompore miano. 11 Miano da kana ko'ira, moicoo kai kinaputi ngangando. Kana'umpe me'aluo rapi da pinongaruhindo, dungku kai molelu parasaeando, tendenomo pompotisudo da mosa'o. Patudundo kando po'awa laba sai halala. 12 Ario da'a me'asa nabiido da kanahi, « Ko'ira miano Kreta mengkule'ira, mebangu'ako kana kadadi da mosoko, lodoko, ronga mongare. » 13 Hapa da kanahino koie nabiido menonaa. Nangkuamo koie, kau pokompehawa to'uhira kai moroso parasaeando, 14 ronga kando osiemo penda mompodedea tulura ngkuleno miano Yahudi ronga parentando miano da bubungkuiho pompotisu da menona. 15 Luwuo hapa-hapa halala'o hai miano da mowua pelaroando. Sawali hai miano da mowuse pelaroando ronga sai parasaea, nai te'asa da halala, kana'umpe namowusemo pekirindo ronga nando to'oriomo maina da mosa'o naamo da moico. 16 Mangaku'ira to'orio Apu Alla, sawali hai niweweundo ndona mehapuiho. Mowusenoo Apu Alla ko'ira miano, ndona ta'oo parentano ronga sando tule'i moweweu da moico.