Oliwi kompura-puraano
3
1 Oliwihira miano mparasaea kando turu hai pamarenta naamo hai ira powawai, ronga nunu'o da petenado, naamo mesadia mpoweweu luwu pohedoa da moico. 2 Ndo'osiemo montumbu'akono miano, osiemo menteposala, kahioomo kando ko'ampadea, ronga moluu larondo hai pera miano.3 Kana'umpe iponoha, cita na'anta mempore, nato ponunu parenta, pinokompore, pine'atano pera da mompokosanaa pelaroa ronga kea-kea da mosa'o, tora larono sa'o naamo singgira, kinokolea ronga mekokolea. 4 Sawali tempono mentoda pompeehawano ronga pololarono Apu Alla Gurusalamato, 5 kai pokosalamakita, na'iaa tendenomo niweweunto da tekona, sawali tendenomo pololarono. Kato salama tendenomo Sangkoleono Alata'ala da pokomowuaho pelaroanto, kato tehina mbule, kato tora ntonia. 6 Apu Alla weehakita'o Sangkoleono da kawasa mentete kuasa pohedoano Yesus Kristus Gurusalamato, 7 kato pinokontekona tendenomo pompeehawano, ronga kato to'ori mo'awa tora ngkaidaaha da pinerahi-rahinto. 8 Die da nigau menonaa.
Koie luwu poo'awa to'uakondo miano da parasaeaho Apu Alla, kai laronto'undo mpoweweu da moico. Koiemo da moico ronga da koguna hai pera miano. 9 Osie mo'okudahi pekakahiando miano mpore, teposala'ako dadaano pu'uno pelee'a, ronga megagahiako parentano agama. Luwuo koie nahina gunano ronga nahina batuano. 10 Miano da mompokonteposala hai laro jema'a, kebaako asamponoha pendua; sa'arino koie, osiemo mesimbau'akono. 11 Dakomo to'orio, koie miano da kana nahinamo upeuno ronga pono'akoomo dosa, yahomo danta pokomarasaiho wotolu mpantano.
12 Dahaku nta tena'o i Artemas atawa i Tikhikus kai lako awako. Ki dungkumo, pepasipolemo kau oru leu awaaku hai Nikopolis, kana'umpe dahaku mepatudu nta moo'ia na'ico dungku tekabu wula mokoseoha. 13 Tulumihira moi-moico hindo daa nta lako koie i Zenas, miano da mandaraako atora, ronga i Apolos, kando osie kakuranga hai bolo sala. 14 Miano hai cita paraluu'o mepopotisu kando mokua mpohedo moi-moico, kando tule'i montulumi miano da kakuranga, kando osie mentora sai hina gunando.
Salamu
15 Luwu petila da perongangku dahira mpokatuko salamu. Pokodungku'akami'o salamumami hai ira da lolarokita da pe'asa imaninto. Kahioomo kai perongakomiu pompeehawano Apu Alla.