Miano mosa'o danta leu
2
1 Raro mpetila, mekona die nta leuhano Apunto Yesus Kristus, ronga dadaano nta tekompuluanto merongaa, kanamo die da pino'itamami: 2 Mi'osie oru linjara mpelaroa ronga halia hi daa da kanahi hi dungkumo leuhano mbule Apu Yesus, mau kicua nabii da pokodungku'o koie lele, atawa miano da leleako, atawa dahoo miano da kanahi icami da ari burio hai suramami. 3 Mau ki kana'umpe, mi'osie ehe-eheako kai pokomporekomiu miano. Kana'umpe hi sai da'apo leu koie oleo, dahoo danta kadadia meri'ou yahoo: Me'aluo miano danta bubungkuiho Apu Alla, ronga dahoo nta saba me'asa miano mosa'o da kokoleaho parentano Apu Alla, da matantumo nta ihino naraka. 4 Nai ehee pera da sinombano miano ronga dahoo nta mepa'angga mpanta ka'iaa luwu da inanggano miano kowati Apu Alla. Deenapo totoro hai raha mpesombaa kanahi hicuamo iaa Apu Alla.5 Nami da'amo bara mokopehawa'o hicu manturumo mo'awaakomiu koie luwu daantopo mperonga. 6 Ronga diekana minto'oriomo ki hapa da halangio koie miano mosa'o. Sawali ki dungkumo wotuno da ari pinatantuno Apu Alla, dahomo nta saba koie miano mosa'o. 7 Kana'umpe koie kuasa da mosa'o dahomo metampu'u mohedo mpewuwuni, hina daapo da totampo'o. Sawali dahosi nta dungku tempono dahano nta te'onini koie da halangio, 8 yahopo kai daa nta inonto koie miano mosa'o. Ki leupo Apu Yesus kai daa nta popateakono'o ngalu mebinta hai penaano ronga niwincano. 9 Kai leu koie miano mosa'o nangkua pohedoano ponggawano bilisi ronga moweweu rupa-rupa peto'o tinekangkaako da mompokompore miano. 10 Dahoo nta pokomporeakondo'o akala mosa'ono ko'ira miano danta binasa. Kando daa nta binasa tendenomo nasando ehe montarima ronga mo'ehe da menona danta pokosalama'ira. 11 Nangkuamo Apu Alla kai pompokoda'aakondo kuasa da pokomalimpuhira, kando memparasaeaho kule. 12 Yahopo nde'e pera miano da sai parasaeaho da menona, te'iaasi ehee da mosa'o, kando mpo'awa hukuma.
Apu Alla rurukicomiu kami salama
13 Kako sadia montarimakasi hai Apu Alla tendenomo comiu, raro mpetilamami da nilolarono Apu, nangkuamo comiu da meri'ou nirurukino Apu Alla kami salama. Koie kai kadadia mentete pohedoano Sangkoleono da pokontewalicomiu miano ntinindahako, ronga himi mparasaeaho pompotisuno da menona. 14 Yahomo koie kai boboicomiu Apu Alla tempomami mokodungku'akomiu'o koie Lele Mohende, tendenomo hina mokea kami itai pinoko'owose meronga Apunto Yesus Kristus. 15 Nangkuamo koie, raro mpetilamami, kahioomo kai modoro pentademiu ronga ungkaari to'uo pompotisu ko'ari motisukomiu, mengkena gaumami atawa da niburimami.
16-17 Kahioomo Apunto Yesus Kristus ronga Apu Alla Tamanto kando lilimboicomiu ronga pokomorodoo laromiu, kami ntule'i mpohedo ronga moleleako pera da moico. Kana'umpe Apu Alla da lolarokita ronga da lilimboi ngkaida'akita ronga moweekita pomperahi-rahi da moico, tendenomo pompeehawano.