Surano ko'orua i Paulus hai jema'a
Tesalonika
Salamu
1
1 Die suramami, i Paulus, i Silas, ronga i Timotius, nta dungku hai jema'a Tesalonika, umatino Apu Alla Tamanto ronga Apu Yesus Kristus. 2 Kahioomo Apu Alla Tamanto ronga Apu Yesus Kristus kando e'elengua barakaticomiu ronga pokomomapuo laromiu.Pontarimakasi ronga amala
3 Raro mpetilamami, paraluu'o kosadia montarimakasi hai Apu Alla tendenomo comiu. Pantasiano kako kana koie, hina sateti-tetianino parasaeamiu ronga pekalola-lolaromiu. 4 Koiemo sababuno kako mohende nte sangkekomiu hico awahira jema'a suere, tendenomo na'owose sabaramiu ronga parasaeamiu, mengkena himi mpinakasea, kanapo himi memarasai.
5 Koie comiu kami memarasai tendenomo himi nunu'o pomparentaano Apu Alla, yahomo kai pantasinoo kami mpewiso hai suruga; koiemo mentoda'ano po'otuhino Apu Alla da mongkote. 6 Iaamo da adili, danta wolohiakondo'o karasai da ari mokomarasaicomiu. 7 Apu Alla danta pokolalesakita, comiu da marasai diekana ronga cami, ki leumo wotuno nta tiihano Apu Yesus mebinta hai suruga meronga mala'ekatino da kuasa, mepopo'ontoako hai bolo langa api. 8 Nta tii wolohi'ira miano da sai mompaduli Apu Alla, ronga da sai ehe tora monunu Lele Mohendeno Apu Yesus Apunto. 9 Ko'ira miano nta tinorungku hai bolo ngkarasai samengka-mengkauno, nibasiako mebinta hai ra'ino Apu, ronga nando da'amo nta ontoo kuasa pomokole'ano da owose. 10 Luwu koie dahoo nta kadadia ki daa nta leu kai pinoko'owose ronga nireree hai pera miano mparasaea. Ronga comiu na'amiu dakomiumo nta mperongaakondo koie oleo, kana'umpe mina mparasaeahomo koie haratia da nileleakomami.
11 Koiemo sababuno kako sadia amalaakokomiu. Po'itamami kami ntewali miano da pantasinoo Apu Alla da ari boboicomiu. Ehepo Apu Alla kuasanicomiu kami nto'ori weweuho luwu patudumiu da moico ronga moko'ario pera da hinedomiu tendenomo himi mparasaea. 12 Kanamo koie nta nireree'ano Apu Yesus Apunto tendenomo comiu, ronga comiu, dakomiu nta nireree tendenomo Iaa. Kai kadadia kana koie, hinangkua Apu Alla Apunto ronga Apu Yesus Kristus nameehawakomiu.