Mi'amalaakami
3
1 Kompura-puraano, raro mpetilamami, mi'amalaakami kai sai-saino teleleako merare koie haratiano Apu Alla ronga tinarima moico, kana isomiu tarimaa. 2 Mi'amalaakami kai pokosalamakami Apu Alla mebinta hai miano ngkabaria ronga hai miano mosa'o. Kana'umpe nasai da'a luwu miano parasaea.3 Sawali pololarono Apu nasai teboli'i. Iaamo danta mokomorosokomiu, ronga danta totongakomiu mebinta hai hapa da mosa'o. 4 Pomperahi-rahi to'ukami hai Apu himi daasi weweu ngkaidaaho pera ko'ari potisukomiu.
5 Kahioomo Apu kai e'elengua motisu'o pelaroamiu kami nunu'o pololarono Apu Alla ronga sabarano Kristus.
Paraluu'o mohedo
6 Raro mpetilamami, meronga kuasano Apu Yesus Kristus kotenakomiu, kami osie mo'okudahi pera petila pe'asa imani da mongare, ronga da sai ehe monunu pompotisu da ari pinokodungkumami hai comiu. 7 Dakomiusi to'orio ki kana'umpe kimi nunu'o da niweweumami. Nako da'a mongare daantopo mperonga. 8 Nako pongkaa kinaano miano ki sako wada'o. Deenapo malo ronga meanta kotampelako wukumami, kako osie mompokomasusa te'asa miano hai comiu. 9 Kako kana koie, na'iaa hi sai hina hakumami hai comiu, sawali kona mokea kami nunu'o da poweweumami. 10 Temponto mperonga, aricami tenakomiu kanahi, « Miano da sai ehe mohedo, nai tewali mongkaa. »
11 Sawali dakami modeaho hi daa miano hai comiu da tora mongare. Nahina pohedoando, te'iaasi mosampuru urusano miano suere. 12 Meronga kuasano Apu Yesus Kristus kotena'ira ronga pokompehawa'ira, kando mpohedo kai te'atoro kando mpo'u'ungke nta mentinoraakondo.
13 Sawali icomiu, raro mpetila, mi'osie isea moweweu da moico. 14 Ki daa miano da sai ehe monunu ihino suramami, midagai'o koie miano, mi'osie mo'okudahi, kai mokoko'anusi. 15 Sawali mi'osie weweuho pedalu, te'iaamo mi'oliwiomo kana petila.
Salamu
16 Kahioomo Apu, pu'uno mapuhino penaanto, kai pantano e'elengua mapuhicomiu, mau hapa da inawamiu. Apu nta meronga mponohakomiu.
17 Adie, aku i Paulus, die salamungku, die buri limangku. Diemo tandano hicu nte moburi sura; kanamo die burincu.a
18 Kahioomo Apunto Yesus Kristus kai barakati mponohakomiu.