Haratiano Apu kana kawasa hai kuro wita
4
1 Tendenomo pololarono Apu Alla kai soroakami'o die pohedoa. Nangkuamo kasai motewe laromami. 2 Nako ehee niweweu da tewuniako ronga da nimokoko'anuako. Nako pe'akala mosa'o atawa boli'io batuano haratiano Apu Alla. Deenapo dakami mompokomentee koie pompotisu kai tekona. Nangkuamo pomperahi-rahimami, pera miano nta timba-timbaa bangumami hi tekonamo hai ra'ino Apu Alla. 3 Kicanano tetutuwi Lele Mohende da nileleakomami, dahano tetutuwi yahoo hai ira miano danta binasa, 4 ko'iramo miano da sai parasaea. Ponggawano bilisi da pine'apuindo ihino wita'ea da mokomopusuomo pelaroando, dungku kasando ontoo niwincano Lele Mohende dadaano Kristus da pinoko'owose, yahoo gambarano Apu Alla. 5 Kana'umpe na'iaa wotolumami da nileleakomami, sawali yahoo Yesus Kristus hicua Apu, ronga die wotolumami yahoo atamiu tendenomo koie i Yesus. 6 Kana'umpe ariomo koharatia Apu Alla, « Kahioomo kai molinyaa dahano rondoma. » Koiemo Apu Alla da mokomolinyaaho pelaroanto, kato to'orio owoseno kuasano Apu Alla da tewinca hai ra'ino Kristus.7 Koie haratia da nileleakomami kana inawa da ko'angga, ronga camimo da kana kuro wita dahano nidio, menteehanomo koie kuasa da owose hicua pebintaano hai Apu Alla, na'iaa hai cami. 8 Koa sabaano ngalu konakami karasai, sawali nako da'asi tedadasako; hi nte pura akalamami, nai pura pomperahi-rahimami; 9 hico pinakasea, Apu Alla nai paisa bintakami; hico nirambitako, nako da'asi mate. 10 Karasai tinaweakono i Yesus sadia awakami hai laro wotolumami, kai mentee hi daasi tora koie i Yesus hai wotolumami. 11 Kana'umpe cami die da torapo, da sadia tepora'iakono matea tendenomo i Yesus, menteehanomo hi daasi tora koie i Yesus hai laro wotolumami da modengke. 12 Nangkuamo koie, cami die da tepora'iakono matea, ronga comiu da mo'awa toraaha.
13 Hai Boku Haratiano Apu Alla dahoo teburi, « Hicu parasaea, yahomo kaku pogau. »a Icami na'amami kako pogau, kona mparasaea kana koie. 14 Hicona mparasaea hicua Apu Alla, da ari mokompewanguo Apu Yesus kai tora, danta wangusakokamimo ronga comiu, kato mperonga tepora'iakono Yesus. 15 Luwu koie kai kadadia yahoo nta nimoicoakomiu. Kana'umpe hi sateti-tetianino miano da pineehawano Apu Alla, same'a-me'aluno miano da me'amala montarimakasi hai Apu Alla, kai pinoko'owose.
Tora ronga parasaea
16 Mau ki samode-modengkeno wotolumami da inonto, sawali sangkoleomami dahosi pinokontonia tapio oleo. Nangkuamo koie, nai motewe laromami. 17 Die karasai mobata da inawamami asantonia, yahomo da mokompo'awakami tereree'a da te'angga da sai hina pengkenano dungku samengka-mengkauno. 18 Kana'umpe nako da'a mompeehawa hapa da inonto, sawali da sai inonto. Da inonto te'iaasi taha asantonia, sawali da sai inonto koie taha'o dungku samengka-mengkauno.