Tinena moleleako pedandi da tonia
3
1 Dakami bara metampu'u penda mereree mpanta? Atawa paraluukami bara sura mporeree danta dungku hai comiu, atawa da niburimiu, kana nte poweweundo suere miano? 2 Icomiumo sura mporeree da nidiomami, da teburi hai pelaroamami, da tino'ori ronga da tule'i nibasando pera miano. 3 Kana'umpe mentoda'anomo, hicuamo comiu surano Kristus, da niwawamami, na'iaa niburiako tinta, sawali niburiako Sangkoleono Apu Alla daa tora, na'iaa hai watu mpoburia, sawali hai pelaroano miano.4 Kanamo koie owoseno pomperahi-rahimami hai Apu Alla mentete hai Kristus. 5 Nahina alasamami nta kanahi hico tule'i weweuho koie pohedoa, sawali nangkua Apu Alla da moweekami kuasa. 6 Iaamo da moweekami koie kuasa kako tewali miano ntinena da leleako pedandi da tonia, da sai teburi, sawali mebinta hai Sangkoleono Apu. Kana'umpe parentano i Musa da teburi mompokomate, sawali koie Sangkoleono Apu da mompokontora.
7 Tempono niburi hai watu pedandi'a da mowawa nimateako, kai tepana niwincano Apu Alla hai ra'ino nabii Musa, dungku miano Israil kasando tule'i o'ontoo ra'ino, mau hi daamo metampu'u teruru koie niwinca. 8 Lalo'eahopo owose niwincano pohedoano Sangkoleono Apu! 9 Ki owose koie pedandi da hukumaa to manusia, matantuomo kolalo owose pohedoano Sangkoleo da mompokontekona. 10 Hapa da owose niwincano nimpia, nai te'anggamo ki pinokompengkena da kolalo owose niwincano diekana. 11 Kana'umpe mau ki owose niwincano koie da te'iaasi asantonia, lalo'eahopo owose niwincano koie da sai nta pura.
12 Kona mpomperahi-rahi kana koie, yahomo kako moseka kanahi. 13 Nako da'a kana i Musa, da dampoakono'o ra'ino petutuwi, kasando tule'i miano Israil ontoo koie niwinca da montampu'u teruru. 14 Santo'u-to'uno da tetutuwi yahoo pekirindo miano Israil. Kana'umpe dungku die oleo koie podampo dahosi tutuwio pelaroando, hindo mpobasa pedandi da mengkau, nai ehe tebuka. Kana'umpe te'iaasi koie Kristus da mokololahio koie podampo. 15 Deenapo dungku die oleo, koa hindo daa nta mobasa bokuno nabii Musa, dahosi koie podampo da tutuwio pelaroando. 16 Sawali ki tegili pelaroando hai Apu, koie podampo dahomo nta telolahi. 17 Kana'umpe Apu yahoo Sangkoleo, ronga maina dahano Sangkoleono Apu, dahanomo lalesaa. 18 Luwu ra'into da sai tedampo dahanomo inonto niwincano Apu da owose. Ronga tendenomo kuasano Sangkoleono Apu, kato teboli'i tewali kana gambarano, kai e'elengua konakita koie niwincano da samoli-molinyaano.