2
1 Ariakumo otuhio hai larongku hi saku da'amo nta duduhio pokomopoe'o laromiu kicu leu awakomiu. 2 Kana'umpe kicu leu pokomopoe'akomiu'o laromiu, naihomo danta lilimboihaku, ki sa'iaa comiu da ari pinopoetincu larono? 3 Koiemo sababuno kaku poburiakomiu sura da kana koie. Naku ehe leu awakomiu kami mpopoetio larongku, mainakaa santo'u-to'uno comiumo danta pokomohende'o larongku. Kana'umpe kuparasaeakomiu luwumiu, kicu mohende, comiu na'amiu dakomiu nta mohende. 4 Dahomo tewere ronga mopoe larongku kaku poburiakokomiu koie sura kaku daa monturupako luu, na'iaa kai mopoe laromiu, sawali kami nto'orio hi owose pompeehawaku comiu.Kahioo kai inampuni miano da tesala
5 Koie miano da ari mompokomopoe pelaroa, na'iaa te'iaasi pelaroangku da pinopoetino, sawali yo pelaroamiu luwumiu (atawa pelaroando asa ntilara simbaumiu, kaku osiemo montitiani). 6 Koie miano koa'omo himi ari hukumaa nunu'o po'otuhino miano me'alu. 7 Sawali comiu diekana, mintegilimo ampunio ronga lilimboiho, kai osie molomo hai poe laro da telia mobea. 8 Nangkuamo koie, kaku oliwicomiu kami mpopo'ontoniakono'o pololaromiu. 9 Koiemo patudungku kaku poburiakokomiu koie sura, kai inonto kimi daasi to'u-to'u nunu'o petenaku. 10 Kimi ampunio miano da salakicomiu, dahaku na'angku nta ampunio. Kana'umpe ki daa da ari inampunincu, kicanano dahoo da paraluu inampuni, koie kuweweuho hai ra'ino Kristus nta nimoicoakomiu, 11 kai osie tepoweweu ponggawano bilisi nangiakita'o akalano, hitona to'oriomo da patuduno.
I Paulus tewere hai Troas
12 Tempongku dungku hai Troas nta leleako Lele Mohendeno Kristus, kai ungkahiakuo Apu sala kaku pohedo na'ico. 13 Sawali nasai todo larongku, kana'umpe nasaku paisapo tepo'awaakono petilaku i Titus. Nangkuamo koie, kupe'abaki nta lako hai Makedonia.
Pohedoano rasulu
14 Sawali tarimakasi hai Apu Alla da sadia mokompenunukami hai barisano Kristus da meponangi, kana'umpe kona ntora boboto'akono. Ronga tenakami leleako hai koa-koa'o wonua, kando to'orio dadaano Kristus kana dupa da mowondu. 15 Yahomo kako kana dupa da tinunuino Kristus hai ra'ino Apu Alla, kando pewuhaa ko'ira miano danta mesalama ronga danta masilaka. 16 Koie wuhamami tewuhandoo ko'ira miano danta masilaka, kana wuha da mompokomate, sawali hai miano danta salama, wuhamami mowondundoo kana wuha da mowawa toraaha. Inai danta tule'i padala'o tugasi da kana die? 17 Icami nako da'a kana miano me'alu da modagaako haratiano Apu Alla. Patudumami mongkotee, kana'umpe cami miano tinenano Apu Alla, ronga Apu Alla da ontokami, hico daa leleako koie haratia kana miano da boboto'akono Kristus.