Surano ko'orua i Paulus hai jema'a
Korintus
Salamu
1
1 Die sura mebinta hai aku i Paulus, da tewali rasuluno Yesus Kristus tendenomo po'eheno Apu Alla, meronga petilato i Timotius. Die sura nta lako hai jema'ano Apu Alla da hai Korintus, ronga luwu miano ntinindahakono Apu Alla hai upuo wonua Akhaya. 2 Kahioomo Apu Alla Tamanto ronga Apunto Yesus Kristus kando peehawakomiu ronga mapuhiakomiu'o barakati.I Paulus montarimakasi hai Apu Alla
3 Tereree'omo Apu Alla Tamano Apunto Yesus Kristus, Tamanto pu'uno pololaro ronga polilimboi, 4 da lilimboicami hai perano karasaimami, kako lilimboihakondo'o miano da marasai koie polilimboi da ari inawamami hai Apu Alla. 5 Kana'umpe me'aluomo karasaino Kristus da ari inawamami, ronga koiemo po'awaamami polilimboino Apu Alla da sai tekira-kira mentete hai Kristus. 6 Kico po'awa karasai, koiemo nta polilimboimiu, ronga nta sinalama'akomiu. Kico nililimboi, koie na'ana nta polilimboimiu, kami sabara tineiho karasai kana da inawamami. 7 Nangkuamo kai motende pomperahi-rahimami hai comiu, kana'umpe koto'oriomo himi itai marasai kana cami; itaicomiumo na'amiu telilimboi kana cami.
8 Kana'umpe, raro mpetila, po'ehemami kami nto'orio karasai da inawamami hai propinsi Asia.a Nirongomami taperano mobea liaho pongkuramimami, mateemo akalamami nta tora. 9 Deenapo pompenasamami, kanamo hi arimo inotuhi kara-karamami nta pinopate. Sawali kai dadi kana koie, kako osie perahi-rahio wotolumami, deenapo kako pomperahi-rahi hai Apu Alla da mompokontora miano mate. 10 Nangkua Iaa da mokosalamakami mebinta hai abalaa owose da nimateako, ronga Iaamo penda pomperahi-rahiamami danta mokosalamakami. 11 Parasaeakami tendenomo himi amalaakami kai pokosalamakami Apu Alla. Kai daa nta pokosalamakami Apu Alla tendenomo himi e'elengua amalaakami. Nangkuamo koie, kai daa nta me'alu miano da metarimakasi hai Apu Alla.
I Paulus boli'io patuduno
12 Diemo da poko'owose'o laromami ronga da pokomentoda'o hai tongano luwu miano, kontu'uma hai tongamiu, hi mongkote ronga molino toramami da mebinta hai Apu Alla. Kicana koie na'iaa mandaramami kana to manusia, sawali yahoo pompeehawano Apu Alla. 13 Hapa hico ari moburiakokomiu, nahina da sai to'ori nibasamiu ronga pinahamiu. Pomperahi-rahincu, mau ki sami da'apo to'orio luwu ihi mpelaroamami diekana, dakomiusi nta lako-lako paha to'uo. 14 Oleo perumbui, ki dungkumo leu mpenduahano Apu Yesus, dahamiumo nta mohende'ako cami, kanasi na'amami nta mohende'ako comiu.
15 Nangkuamo koie, ku'ari mepekiri mokea tealo awakomiu meri'ou, kami ngkoa pendua montarima barakati. 16 Da ari patudungku, sa'arincu tealo hai comiu, nta sai-saincu lako hai Makedonia, yahopo mebinta na'ico kaku pekahule awakomiu, kami nto'ori tulumiaku hai laro lako'angku me'o'ala hai Yudea. 17 Kaku ari mepatudu kana koie, dahoo bara koboli-boli'i da pekirincu? Atawa ariaku bara mepatudu nunu'o po'ehe mpantaku, dungku kai ko'oru-orua larongku, te'e-te'ete kanahi, « Umbee », te'e-te'ete kanahi, « Da'a »? 18 Meronga neeno Apu Alla da konianto'u hi pedandi, hapa da kanahimami hai comiu, na'iaa kana miano da ko'oru-orua larono. 19 Kana'umpe Yesus Kristus Anano Apu Alla, da nileleakomami i Silas, i Timotius, ronga i'aku hai comiu nai paisa kanahi te'e-te'ete « Umbee », te'e-te'ete « Da'a ». Satabuluno kanahi « Umbee », nai koboli-boli'i. 20 Kana'umpe koie i Yesus Kristus yahoo peki'umbeehanomo luwuo dandino Apu Alla. Tendenomo Iaa kato kanahi, « Amin » hito poko'owose'o Apu Alla. 21 Apu Allamo da mokomorosokita, kato boboto'akono Kristus, ronga da ari rurukicita. 22 Iaamo da peto'okita ronga weehakita'o Sangkoleono hai pelaroanto kana pe'ungkaa'a hito daa nta awaa tilarinto da ari pinasadiano.