5
1 Kana'umpe toto'orio wotolunto die hai wita'ea kana me'asa kema. Kito mate ronga bintaa wotolunto, ariomo Apu Alla mompasadia'akita me'asa poo'iaha hai suruga da sai hina puraano, da sa'iaa niweweuno to manusia. 2 Hito daapo hai larono wotolunto diekana, sadiakita mengungu hito moko'au moo'ia hai poo'iahanto da hai suruga, yahoo wotolunto da tonia. 3 Kito awaamo wotolunto da tonia, batuano dahomo pakeato, nato da'amo nta melua.a 4 Hito daapo tora die hai wita'ea, sadiakita mengungu tendenomo karasai da mobea. Na'iaa mokea teposincaakono wotolunto die hai wita'ea, sawali hitona mokea kai boli'io wotolunto Apu Alla, ronga moweekita wotolu da tonia danta tora samengka-mengkauno. 5 Da pasadia'akita'o koie, Apu Alla pantano, ronga moweekita Sangkoleono kowati pe'ungkaa'a.6 Nangkuamo koie, kai sadia morodo pelaroanto, kana'umpe tona nto'orio hito daapo tora, dakitapo mentalahio poo'iahanto merongaa Apu. 7 Kana'umpe kato tora tendenomo parasaea, na'iaa da inonto. 8 Nangkuamo kai morodo laronto, kato mokea bintaa die wotolu, kato tora merongaa Apu. 9 Nangkuamo kato mpekoraako kai sanaa larono, mengkena hito daapo tora, ronga kito matemo. 10 Kana'umpe matantuomo dakita nta inadili luwunto hai ra'ino Kristus, ronga tee-tee'asa miano dahanomo nta mo'awa tilano kana niweweuno die hai wita'ea, moico atawa mosa'o.
Tepokonaano Apu Alla ronga to manusia tendenomo Kristus
11 Koto'oriomo batuano momee hai Apu, nangkuamo kako usaha to'u kando memparasaeakami miano. Apu Alla to'ori to'uo pelaroamami, ronga pomperahi-rahincu kami nto'oricami hai pelaroamiu. 12 Ronga koie, nako da'a mo'ita kami rereekami. Te'iaasi patudumami kopoweekomiu dahano nta to'ori owose laromiu tendenomo cami, kami nto'ori lawanihira miano da meruruki hulano miano, na'iaa pelaroano. 13 Kimi ontokami kana miano molawu, koie tendenomo Apu Alla. Sawali kimi ontokami kico daasi awaa laro, koie tendenomo comiu. 14 Nangkua pololarono Kristus da kuasaicami, kako paha'o, ki mate me'asa miano tendenomo luwu miano, koie batuano luwu miano matehiramo. 15 Hina arimo Apu Yesus taweakondo luwuo miano, ko'ira da mentora, nando da'amo tora nta pokosanaa'o wotolu mpantado, sawali tora nta pokosanaa'o da arimo tawe kai toraakondo mbule.
16 Nangkuamo koie, kasako po'ukuru anggano te'asapo miano nunu'o po'ukuruno miano hai wita'ea. Menonaa, nimpia aricami ukuru'o anggano Kristus nunu'o po'ukuruno manusia, sawali diekana nako da'a. 17 Miano da boboto'akono Kristus, tewaliomo miano ntonia. Da lembahi ariomo tealo, santo'u-to'uno da tonia leuhomo. 18 Luwuo koie pohedoano Apu Alla. Mentete hai Kristus kato tepokonaakono mbule Apu Alla, ronga Apu Allamo da ari soroakami'o die pohedoa nta leleakoakondo'o miano kando tepokonaakono Apu Alla. 19 Tendenomo Kristus, kando tepokona Apu Alla ronga to manusia, hina sai da'amo modoa'akondo tesalado. Koie pohedoano Apu Alla. Ronga camimo da pinarasaeano mokodungku'o koie lele. 20 Dadi, icami die miano tinenano Kristus; hico oliwicomiu, kowatinomo Apu Alla pantano da oliwicomiu. Meronga neeno Kristus, kopo'ita'ea hai comiu, kahioomo kami moico mbule hai Apu Alla! 21 Apu Yesus nai kodosa, sawali Apu Alla nampokomperongo'o dosa, kato pongkona hai Apu Alla hitona boboto'akonomo Apu Yesus.