10
1 Raro mpetila, mokeano larongku ronga amalangku kai pokosalama'ira Apu Alla ko'ira miano Israil. 2 Mosekaaku kanahi hindona mokua mesambahea hai Apu Alla, sawali nasando mempaha'o. 3 Nando to'orio carano Apu Alla hi pompokontekona miano, te'iaasi mokea mokontekonaa wotolundo. Yahomo kasando nunu'o koie da menona hi potisu'ira Apu Alla.Salama'a tilano luwu miano
4 Kana'umpe koie Kristus yahoo pompokongkoano Boku Parentano nabii Musa. Yahomo luwuo miano da parasaeaho kai pinokontekona. 5 Koie nabii Musa moburi mekona hai miano da pinokontekona tendenomo parentano nabii Musa kanahi, « Miano da weweuho ko'ira parenta, dahoo nta tora hina nunu'o. »a 6 Sawali mekona hai miano da pinokontekona tendenomo parasaea, dahoo teburi kanahi, « Osiemo kanahi hai larou, ‹ Inai danta sabe hai suruga? › (batuano: nta alaa Kristus tiihako), 7 ronga osiemo kanahi, ‹ Inai danta tii hai wonuando miano mate? › » (batuano: nta taarako Kristus mebinta hai matea).b 8 Patuduno kana die: « Koie haratiano Apu Alla taperano okudahico; dahoo hai bolo ngangau ronga hai pelaroau. »c Koiemo lele da nileleakomami, kai parasaeaho miano. 9 Kana'umpe kiu mangaku'ako ngangau kanahi, « Koie i Yesus yo Apu, » ronga parasaea hai pelaroau hi ari Apu Alla pokontoraa mebinta hai matea, dakomo nta salama. 10 Kana'umpe yo pelaroa kai parasaea miano, kai pokontekonaa Apu Alla, ronga yo nganga kai mangaku miano kai pinokosalama. 11 Kana'umpe kanahino Boku Haratiano Apu Alla, « Inai da parasaeaho, nai da'a nta mesosoori. »d 12 Nasai hina teposengkano miano Yahudi ronga miano suere suku. Kana'umpe koie Apu Alla nante'iaasi me'asa, yo Apunomo luwuo miano. Iaamo da moweeho barakati me'alu hai pera miano da me'e'etaa. 13 Kana'umpe dahoo teburi hai Boku Haratiano Apu Alla, « Inai da me'e'etaako neeno Apu, dahoo nta salama. »e
14 Sawali kana'umpemo kando daa nta me'e'etaa, ki sando da'apo parasaeaho? Kana'umpemo kando daa nta parasaeaho ki sando paisapo modeaho leleno? Kana'umpemo nta pompodedeando, ki sai hina miano da mokodungku'akondo'o leleno? 15 Kana'umpe dahando nta leleako leleno Kristus ki sando da'a tinena? Kana da teburi, « Ntaperano moico karuno miano da leu mowawa lele mohende. »f
Sai parasaeahando miano Israil
16 Mau kicana koie, nai da'a luwu miano da ehe montarima koie lele mohende, kana da kanahino nabii Yesaya, « O Apua, hapa kasando da'a parasaeaho da nileleakomami? »g 17 Dadi, kai da'a imani tendenomo hi pompodedea, ronga da pinodedea yahoo haratiano Kristus. 18 Sawali kuna metukana: Menonaa bara miano Israil nando paisapo modeaho koie lele? Matantuomo arihiramo, kana da teburi hai Boku Haratiano Apu Alla:
« Koie lele upuomo wita'ea,
ronga koie ino'awa dungku'omo hai asa tapuno wita. »h
19 Kaku petukana penda, « Nando da'apo bara paha'o ko'ira suku Israil? » Lamoro me'asa, nabii Musa mokodungku'o haratiano Apu Alla kanahi,
« Dahaku nta mokosinggirakomiu tendenomo hicu barakati'ira miano da sa'iaa umaticu,
ronga dahaku nta mokomosa'oo laromiu hicu barakati'ira suku da mempore. »i
20 Meronga sekano nabii Yesaya pokodungku'o haratiano Apu Alla kanahi,
« Ehe'akumo kai awaaku miano da sai da'a u'ungkeaku;
ronga ehe'akumo mepopo'ontoako hai miano da sai da'a metukanaakoaku. »
21 Sawali mekona hai suku Israil, diemo haratiano, « Tuntu oleo Kupengkaehakono suku da motea rapano ronga da sai menunu parenta. »j