Israil da teruruki sawali nasando ehe parasaea
9
1 Hapa danta kanahincu menonaa, naku da'a mekulepi, tendenomo hicu boboto'akono Kristus: Kanahino larongku da itai sinaksiino Sangkoleono Alata'ala, 2 hi ntaperangku masusa ronga nai mo'otu mopoe larongku, 3 tendenomo ko'ira raro mpetilaku, suku Israil da pe'asa reaku. Kana'umpe ehe'aku kai tonduwakoaku Apu Alla, ronga teposincaakono Kristus, kicanano koiemo danta pokosalama'ira. 4 Ko'iramo da da'a hakudo tewali anano Apu Alla, ronga arihiramo ontoo kuasano. Arihiramo tarimaa pedandino Apu Alla, ronga parentano nabii Musa, kai tii atorano sambahea. 5 Iramo pelee'ando pembue'anto da tenee. Hai iramo tehinaano Mokole Pompokosalama kana me'asa manusia, da mokulaloiho pera da da'a. Iaamo Apu Alla da nireree dungku samengka-mengkauno. Amin.6 Mau kicana koie, haratiano Apu Alla nahina da to'ori halangio. Kana'umpe na'iaa luwuo miano da melee hai Israil da nirurukino Apu Alla tewali umatino, 7 ronga na'iaa luwu leeno i Ibrahim da tewali anano, sawali yahoo kana da teburi, « Mebintasi hai Ishak kau daa nta mo'awa lee'u Ku'ari dandico. »a 8 Koie batuano, leeno i Ibrahim da tewali anano Apu Alla, yahoo leeno da tehina nunu'o dandino Apu Alla, ronga na'iaa luwu leeno. 9 Kana'umpe pedandino Apu Alla kanamo die, « Ta'ui ra'i wotu ngkana die, dahaku nta leu penda, ronga koie i Sarah dahomo nta da'a ana ntamano. »b
10 Ronga die penda: koie i Ribka mompokohina orua ana ntama da me'asasi petamaando, yahoo i Ishak pembue'anto. 11 Nando da'apo tehina ko'ira ana'ate da orua, ariomo Apu Alla patantuo nta daando. Po'eheno Apu Alla na'iaa mepu'u hapa danta niweweuno koie miano, sawali mepu'u poboboino pantano. Kana'umpe orua'o koie anano i Ribka nando da'apo to'ori moweweu da moico ronga da mosa'o, 12 kai po'awaakono Apu Alla i Ribka kanahi, « Da tetukaka yahomo danta tepo'ata hai tuaino. »c 13 Kana da teburi hai Boku Haratiano Apu Alla, « Kulou'o i Yakub, sawali Kukokoleaho i Esau. »d
14 Kicana koie, hapa nta kanahinto? Nai adili bara Apu Alla? Na'iaa! 15 Kana'umpe Apu Alla ariomo koharatia hai Musa,
« Dahaku nta meehawa'o miano da ehe pineehawaku,
ronga nta lolaroo miano da ehe nilolarongku. »e
16 Dadi, ki poruruki Apu Alla miano, na'iaa mepu'u hai mokeano atawa niweweuno koie miano, sawali te'iaasi kai inonto pololarono Apu Alla. 17 Kana'umpe dahoo teburi hai Boku Haratia, Apu Alla koharatia hai mokoleno Mesir, « Kaku engkatakoko tewali mokole, patudungku kai mentoda kuasangku tendenomo poweweungku co'o, kai teleleako neengku upuo wita'ea. »f 18 Dadi, Apu Alla lolaroo miano da po'eheno, ronga mokomoteaho larono miano, malengu po'eheno.
19 Aipo dakomiu nta metukanaihaku, « Kicana koie, hapa Apu Alla kai pasala'opo manusia? Kana'umpe, naiho da tule'i ta'oo da po'eheno? » 20 Inai co'o to manusia da moseka megagahiakono Apu Alla? Tule'io bara koie da ari niweweuno miano megili metukanaiho da ari weweuho, « Hapa kau weweuhaku kana die? » 21 Na'iaa bara tumpu suu kuro da kuasa atoro'o reono? Da asa baku reo tewalio mosuu me'asa kuro da moico to'u ronga da me'asa da biasa.
22 Kanamo koie Apu Alla, patuduno nta mokomentoda'o sa'o larono ronga kuasano. Sawali nasabara hai miano da pantasi sinosa'oki laroino kai hancuru. 23 Kai pepatudu kana koie Apu Alla, yahoo nta mokomenteeho kawasa ngkuasano hai cita da nilolarono da pinasadiano nta merongaa hai pinoko'owose'ano, 24 yahoo icita da ari niboboino, na'iaa te'iaa suku Yahudi, sawali ronga suku mehano. 25 Kana'umpe hai bokuno nabii Hosea, Apu Alla koharatia,
« Da sa'iaa umaticu, dahaku nta neehakono'o umaticu,
da sai paisapo nilouku, dahaku nta neehakono'o da nilouku.g
26 Maina ariangku kanahi, ‹ Comiu na'iaa umaticu, ›
kokeena dahira nta ninee, ‹ Anano Apu Alla da tora. › »h
27 Kanamo nabii Yesaya ario mekora mogau mekona dadaano suku Israil kanahi,
« Mau kicana hahi hai wiwi ntahi me'aluno miano Israil,
te'ete'o danta salama.
28 Kana'umpe hapa hi ari Apu Alla koharatia,
dahoo nta oru padadio die hai wita'ea kai mondo. »i
29 Kana da ari pinokodungkuno meri'ou nabii Yesaya,
« Ki sai da'a Apu Alla da makuasa poturusio kando mentora asa ntilara turunanto,
dakitamo pura kana Sodom ronga Gomora. »j
Salama'ando suku suere ronga tuunaano miano Israil
30 Kicana koie, hapa nta kanahinto? Diemo: Apu Alla pokontekonahira suku suere tendenomo parasaeando, mau ki sando da'a u'ungkee. 31 Sawali suku Israil da mo'u'ungke kando pinokontekona tendenomo hindo nunu'o parentano nabii Musa, nando da'a awaa. 32 Hapa kai kana? Hindona me'ungkaa hai niweweundo, na'iaa parasaeando. Nangkuamo kando tuuna tesube hai watu ntesubea, 33 kana da teburi,
« Santo'u-to'uno ariaku modio watu hai Sion nta tesubeano miano,k
me'asa watu mpasi danta mokontuunaa miano;
miano da parasaeaho nai da'a nta mesosoori. »l