Tora nunu'o Sangkoleono Apu Alla
8
1 Diekana nahinamo hukumando miano da boboto'akono i Yesus Kristus. 2 Kana'umpe kuasa Sangkoleono Apu, da mokontorakomiu boboto'akono i Yesus Kristus, koiemo da ari hudakomiu mebinta hai kuasano dosa ronga matea. 3 Hapa da sai tule'i niweweuno parentano nabii Musa, tendenomo cita miano modengke, ariomo weweuho Apu Alla, yahomo kai tena'o Ana mpantano tewali kana manusia ngkodosa, nta kikihio ronga hukumaa dosa da kuasanio miano. 4 Kai weweuho kana koie Apu Alla, kai mentoda hito nunu'o po'eheno da da'a hai parentano nabii Musa, ronga hito daasi weweuho nunu'o Sangkoleono Apu, na'iaa nunu'o kea-keano wotolu.5 Miano da tora nunu'o kea-keano wotolu, da pinekirino yahoo da pinokeahakono wotolu, sawali da tora nunu'o Sangkoleono Apu, da pinekirino yahoo da po'eheno Sangkoleono Apu. 6 Miano da mekirio kea-keano wotolu kowua'ako matea, sawali miano da mekirio da po'eheno Sangkoleono Apu kowua'ako toraaha ronga tepokonaakono Apu Alla. 7 Miano da kinuasaino po'eheno, koiemo miano pedaluno Apu Alla. Kana'umpe miano da kana koie nasai nunu'o parentano Apu Alla; santo'u-to'uno nai to'ori. 8 Dadi, miano da tora monunu kea-keano wotolu, nahina oleono dahano nta pokosanaa'o larono Apu Alla.
9 Kicua comiu, nami da'a tora monunu po'eheno wotolu, sawali tora nunu'o po'eheno Sangkoleono Apu, da mo'iahicomiu. Ronga koie miano, ki sai perongaa Sangkoleono Kristus, na'iaa mianono Kristus. 10 Sawali ki tora Kristus hai pelaroamiu, mau ki matemo wotolumiu tendenomo dosa, Sangkoleono Apu nta pokontorakomiu,a na'arimo pokontekonakomiu Apu Alla. 11 Kicua Sangkoleono Apu, da ari mokompewanguo i Yesus mebinta hai matea, tora hai wotolumiu, Apu Alla da ari pokontoraa Kristus, dahoo nta mokontoraa wotolumiu danta lono; danta weweuho koie yahoo Sangkoleono da mo'iahicomiu.
12 Nangkuamo koie, raro mpetilaku, dahoo tugasinto, sawali to'osie nunu'o po'eheno wotolunto. 13 Kana'umpe kimi ntora nunu'o po'eheno wotolumiu, dakomiu nta mate. Sawali ki kuasanicomiumo Sangkoleono Apu, kami ari-ari moweweu dosa, dakomiumo nta tora. 14 Luwu miano da niwawaino Sangkoleono Apu Alla yo ananomo Apu Alla. 15 Sangkoleono Apu da ari tinarimamiu na'iaa nta pokontepo'atakomiu kami momee penda, sawali da mokontewalicomiu anano Apu Alla. Tendenomo koie Sangkoleono kato pe'e'eta kanahi, « O Ama, O Tamangku! » 16 Sangkoleono Apu ronga sangkoleonto perongahiramo moleleako hicuamo cita die anano Apu Alla. 17 Ronga kicuamo cita anano, citamo danta momperapi tilari, patuduno, danta montarima barakati da ari pinasadiano Apu Alla nta tarono raro anano. Dakitamo nta tarimaa meronga Kristus, yahoo kito arimo merongaa marasai, dakitamo nta itai merongaa nireree.
Pomperahi-rahindo miano mparasaea
18 Nunu'o po'awangku, luwu karasai da tinineinto diekana nai tule'i nta pinokompengkena danta inawanto hito daa nta itai pinoko'owose meronga Apu Alla. 19 Luwu ihino wita'ea taperando moko'auhako koie tempo dahano Apu Alla nta pokomentoda'o dadaanto hicua anano. 20 Kana'umpe luwu ihino wita'ea kona ntunda'iramo hai Apu Alla dungku kasahinamo gunando, na'iaa po'ehendo pantado, sawali po'eheno Apu Alla. 21 Sawali dahopo da pinerahi-rahi, yahoo: koie ihino wita'ea dahosi nta tebintani, ronga nai da'amo nta tepo'ata hai kuasa da mompokolono. Koie ihino wita'ea dahoo nta itai pinokolalesa ronga pinoko'owose merongahira ko'ira anano Apu Alla.
22 Toto'oriomo, dungku diekana-kana luwuo ihino wita'ea dahira pada mpedeali kana miano da dedea ntia. 23 Na'iaa te'iaa i'ira, sawali ronga icita da mpedeali mpelaroa. Mau aricitamo tarimaa Sangkoleono Apu kowati pompoweehino Apu Alla da meri'ou, sawali dakitapo totarimaa kato pinokolalesa mebinta hai karasai ronga tinaarako tewali anano. 24 Aricitamo pinokosalama, sawali dahopo da pinerahi-rahinto. Sawali ki inontomo koie da pinerahi-rahi, na'iaamo momperahi-rahi neeno. Kana'umpe inai da momperahi-rahi da inontomo? 25 Sawali kito perahi-rahio da sai inontonto, dakita nta sabara totarimaa.
26 Kanamo na'ana koie Sangkoleono Apu tulumicita hito modengke. Kana'umpe nato to'orio hapa da pantasi nta pino'itanto kito amala, sawali pantano Sangkoleono Apu da me'e'etaakita ronga itai medealiakita da sai to'ori inumbasako. 27 Apu Alla da to'orio ihi mpelaroano miano, to'orio patuduno koie Sangkoleono Apu, da nunu'o po'eheno Apu Alla hi daa me'e'etaakondo miano da tinindahakono.
28 Toto'oriomo hicua Apu Alla da atoro'o luwu da kadadia, kando po'awa da moico pera miano da lou'o, ko'iramo da ari niboboino Apu Alla nunu'o patuduno. 29 Kana'umpe luwu miano da iso nirurukino Apu Alla, arihiramo pinatantu nta kana to'u Anano; yahomo Yesus Kristus kai tewali da tetukakaakondo raro mpetilano. 30 Ko'ira da iso pinatantuno Apu Alla, yahomo da niboboino. Ronga da niboboino, yahomo da pinokontekonano. Ronga da pinokontekonano, koiesi da pinoweehino tilari hai laro mpinoko'owose'ano.
Owose'o pololarono Apu Alla icita tendenomo Yesus Kristus
31 Hapa nta kanahinto mekona ko'ira luwu? Ki pedulukita Apu Alla, naihomo danta balicita? 32 Apu Alla nai da'a me'o'oloiho Ana mpantano, sawali na'arimo soroo tendenomo cita luwu; nai da'a bara nta moweekita luwu mehano meronga Anano? 33 Inai danta pokompekara-karakita cita umati nirurukino Apu Alla, kicuamo Apu Alla da kanahi nato tesala? Inai danta otuhio tesalato? 34 Yesus Kristus danta totongakita, da ari mate, ronga mewangu mbule, kai totoro hai muanano Apu Alla. 35 Inai da tule'i sincalakokita hai pololarono Kristus? Tule'io bara susa, atawa karasai, atawa pompakasea, kohuloo, kadee-dee, abalaa, atawa matea? 36 Dahoo teburi hai Boku Haratiano Apu Alla kanahi,
« Tuntu oleo nirora'imami abalaa matea tendenomo Comiu.
Kanakamimo domba danta sinumbele. »b
37 Sawali hai luwu koie da inawanto, citamo da kolalo moponangi, tendenomo Apu Yesus da lolarokita. 38 Kana'umpe matantungkuomo, matea ronga toraaha, mengkena mala'ekati ronga da mengkuasa, hapa da da'a diekana ronga danta leu, pera da mokora 39 hai langi atawa hai puri wita, atawa meha-mehano, nahina da tule'i posincakita hai pololarono Apu Alla, hi ari popo'ontonicita hai Yesus Kristus Apunto.