Batuano parentano nabii Musa
7
1 Raro mpetila, luwumiu minto'oriomo dadaano atora: Koie atora dahopo kuasaiho miano hi daapo tora. 2 Kana tina da kosampora, hi daapo tora samporano, tekoo'ako atora hai samporano. Ki matemo koie samporano, koie tina lalesaamo hai atora da koo'o koie hai tama. 3 Nangkuamo koie, ki tibo koie tina kawi hai tama suere, hi daapo tora samporano, koie inangga endeo. Sawali ki matemo samporano, nai da'amo tekoo koie hai atora. Mau ki kawi hai tama suere, na'iaamo endeo.4 Kanapo comiu, petilaku. Tebintanicomiumo hai parentano nabii Musa, himina boboto'akonomo wotoluno Kristus. Diekana comiumo mianono Kristus da mewangumo mebinta hai matea, kami ngkowua'ako da koguna hai Apu Alla. 5 Kana'umpe iponoha daantopo tora nunu'o sipano miano wita'ea, kea-keano dosa kuasaiho wotolunto. Dakitamo to'orio hicua koie petabeno parentano nabii Musa, deenapo koiemo da tumbusio kea-keanto nta moweweu dosa. Yahomo kato poweweu da nimateako. 6 Sawali diekana nato da'amo tekoo hai parentano nabii Musa. Tebintanicitamo koie hai parenta da ari kuasanicita. Nato da'amo monunu sipa da lembahi tepo'ata hai parenta da teburi, sawali tona layanio Apu Alla nunu'o atora da tonia, hi potisu'akita'o Sangkoleono Apu.
7 Kicana koie, hapa nta kanahinto? Yo dosa bara koie parentano nabii Musa? Na'iaa to'u! Deenapo koiemo parenta da motisu'aku dadaano dosa. Naku da'a nta to'orio pinokeahako da mosa'o, ki sa'iaa koie parenta da kanahi, « Osie mokeahako hapa-hapano simbau'u. »a 8 Tendenomo koie parenta, kai tepoweweu yo dosa pongaruhiaku, kai tora pera pinokeahako da mosa'o hai pelaroangku; kana'umpe ki sai hina koie parenta, koie dosa nai da'a nta hina. 9 Torangku iponoha nahinapo parentano nabii Musa. Sawali leuno koie parenta, koie dosa metampu'u tora, 10 sawali aku mateakumo. Koie parenta kanahinto nta mokontorakita, mainakaa namowawaakita matea. 11 Ronga tendenomo koie parenta kai lalesa dosa gau-gau'aku ronga pepateaku. 12 Dadi, Boku Parentano nabii Musa mebinta hai Apu Alla, ronga koie parentano tekonaa ronga moicoo.
Tepora'iano po'ehe da moico ronga da mosa'o
13 Kicana koie, yahoo bara koie parenta da moico danta mokomateakumo? Na'iaa! Sawali yo dosa danta mokomateaku. Dosa mompokoda'a matea tendenomo da moico. Kanamo koie kai tino'ori koie dosa hi mosa'o sipano. Dadi, tendenomo koie parenta mentoda'anomo hi ntaperano mosa'o koie dosa. 14 Toto'orio, koie parentano nabii Musa mebinta hai Sangkoleono Apu. Sawali i'aku die miano modengke; tegau-gau'akumo tepo'ata hai dosa. 15 Kana'umpe naku to'orio da niweweungku. Da mokea niweweungku naku da'a weweuho; sawali da kinokoleangku, koiemo da niweweungku. 16 Dadi, kicu poweweu da sai po'ehengku, batuano ku'angga'o koie parenta tekonaa. 17 Santo'u-to'uno na'iaamo i'aku da moweweuhako, sawali koiemo dosa da kuasaniaku. 18 Kuto'orio hi sai hina te'asa da tekona hai wotolungku, sipa manusiaku. Kana'umpe dahosi mokeangku, sawali naku tule'i weweuho. 19 Kana'umpe da moico da po'ehengku, na'iaa da niweweungku; sawali da mosa'o da sai po'ehengku, koiemo da niweweungku. 20 Dadi, kicu poweweu hapa da sai po'ehengku, santo'u-to'uno na'iaa i'aku da moweweu, sawali yahoo dosa da kuasanio wotolungku.
21 Tendenomo ko'ira luwu, kaku to'orio hapa da kadadia hai wotolungku: yahoo hicu daa nta moweweu moico, sawali da mosa'o dahomo hai pelaroangku. 22 Kana'umpe hai pelaroangku po'ehengku parentano Apu Alla. 23 Sawali dahoo sipa meha hai pokosangkano wotolungku da sai tepokonaakono po'eheno pelaroangku, yahomo kaku tetorungku hai pomparentaano dosa da kuasanio wotolungku. 24 Akumo die miano masilaka! Inai da tule'i huda'aku mebinta hai wotolungku danta mate? 25 Tarimakasi hai Apu Alla tendenomo Yesus Kristus Apunto! Dadi, ponto'orino larongku da tesangkinaa hai parentano Apu Alla, sawali wotolungku da modengke tepo'ata hai parentano dosa.