Mate tora merongaa Kristus
6
1 Kicanamo koie, hapa nta kanahinto? Nta moweweu ngkaida'akita bara dosa, kai tetiani pompeehawano Apu Alla icita? 2 Matantuomo nai da'a kana koie! Cita die kanamo hito matemo, yahomo kasai to'ori koie dosa kuasanicita. Kicana koie, kana'umpemo kato daapo nta tora hai larono dosa? 3 Matantuomo dakomiumo to'orio temponto nibaho, mebobotokitamo merongaa i Yesus Kristus. Koie batuano kanamo hito matemo merongaa. 4 Dadi kito pebaho koie, kanamo hito kinoburumo ronga mate merongaa. Nta kanamo tempono Kristus pinokompewangu mebinta hai miano mate, tendenomo kuasano Tamano da owose, nta kanasi na'anta pinokompewangu mo'awa toraaha da tonia.5 Kana'umpe kato boboto'akonomo Kristus hitona arimo merongaa mate, dakitamo na'anta nta itai pinokompewangu mbule. 6 Toto'oriomo toraanto da lembahi ariomo nibasiropa merongaa i Yesus, da oniniomo kuasano dosa hai wotolunto, kato osiemo tepo'ata mbule hai dosa. 7 Kana'umpe inai da matemo, tepulosi'omo hai dosa. 8 Kito arimo mate merongaa Kristus, toparasaeamo hito daa nta tora merongaa. 9 Toto'oriomo koie Kristus hi arimo niwangu mebinta hai matea, ronga nai da'amo nta mate penda. Wotoluno nai da'amo kuasaiho matea. 10 Kana'umpe kai mate yahoo tanggoiho dosa, asamponohasi dungku samengka-mengkauno. Sawali toraano yahoo toraakono Apu Alla. 11 Mi'angga'omo kana koie: aricomiumo mate ronga tepulosi hai dosa, sawali toraakonomo Apu Alla tendenomo boboto'akono Yesus Kristus.
12 Nangkuamo koie, osiemo dosa kuasanio wotolumiu danta lono, kami osiemo penda monunu po'eheno da mosa'o. 13 Ronga mi'osiemo wukahio wotolumiu kai kuasaiho dosa, kami mpoweweu da mosa'o, sawali misoroakono'omo Apu Alla wotolumiu kana miano da arimo mate, sawali diekana toraamo mbule. Ronga soroakono'o Apu Alla ko'ira pokosangkano wotolumiu, kai pake'o moweweu da po'eheno. 14 Kana'umpe nai da'amo nta kuasanicomiu mbule koie dosa, nasami da'amo tora turu hai parentano i Musa, sawali tora tendenomo pompeehawano Apu Alla.
Tepo'ata nunu'o Apu Alla
15 Kicana koie, dakitapo bara nta moweweu dosa, nasato da'amo tora turu hai parentano i Musa, sawali tora tendenomo pompeehawano Apu Alla? Nai da'a! 16 Nami da'a bara to'orio, kimi soroakono'o wotolumiu koie hai miano kai parentakomiu, himi ntewalimo atano koie miano? Nta tepo'ata hai dosa danta wawakomiu hai matea, atawa tewali ata da nunu'o po'eheno Apu Alla, kai pokontekonakomiu? 17 Sawali mimpontarimakasi hai Apu Alla! Menonaa iponoha comiu atano dosa, sawali diekana mina nunu to'uo pompotisu da tinuluakono hai comiu. 18 Tepulosicomiumo mebinta hai dosa, ronga tewalicomiumo ata da nunu'o da menona. 19 Tendenomo hina modengke pekirimiu, yahomo kaku pompake sandara ata dahamiu nta oru paha'o. Iponoha mimpoturusio wotolumiu kai tepo'ata hai perano da mosa'o, kami e'elengua madoraka. Kanamo diekana misoroo wotolumiu, kai tindahakokomiu Apu Alla tewali ata da nunu'o po'eheno.
20 Daamiu tepo'ata hai dosa, lalesakomiu sai monunu da menona. 21 Hapa da pinelawemiu nimpia, himi ari moweweu koie da nimokoko'anuako diekana? Kana'umpe niweweu da kana koie kompura-puraano kowua'ako matea. 22 Sawali diekana tepulosicomiumo hai dosa, ronga tewalicomiumo atano Apu Alla; da tinarimamiu yahoo tora tinindahakono Apu Alla, da kowua'ako tora ngkaidaaha. 23 Kana'umpe wuano dosa yahoo matea, sawali Apu Alla namowee mpenakita tora ngkaidaaha boboto'akono Yesus Kristus Apunto.