Pongkonaa hai Apu Alla
5
1 Diekana kato pinokontekona tendenomo parasaeanto, yahomo kato tora momapu laronto merongaakono Apu Alla tendenomo Yesus Kristus Apunto. 2 Tendenomo hito parasaeaho Apu Yesus, kai poweekita sala kato to'ori penasaa pompeehawano Apu Alla. Koiemo pompeehawa kato daa tora diekana-kana, nangkuamo kato mohende tona momperahi-rahi hito daa nta merongaa Apu Alla hai laro mpinoko'owose'ano. 3 Na'iaa te'iaa koie, deenapo tomohende hito marasai, kana'umpe ntona nto'orio koie karasai hi kowua'ako sabara. 4 Yahopo koie sabara mompokomotende pelaroa, ronga motende mpelaroa kowua'ako pomperahi-rahia. 5 Pomperahi-rahi da kana koie nahina pesosooriano, nangkua pololarono Apu Alla da tudu hai bolo mpelaroanto tendenomo Sangkoleono hi ari weekita.6 Daantopo modengke, konaa wotu da ari pinatantuno Apu Alla, kai mateakita Kristus tendenomo madoraka'anto. 7 Mohalio dahanto nta mo'awa miano da ehe mateakono miano da mongkote. Sawali kicua miano da moico to'u, aipo kai da'a miano da moseka mateakono. 8 Sawali Apu Alla namokomentoda'akita'o pololarono, kai mateakita Kristus daantopo tewali miano ngkodosa.
9 Lalo'eahomo diekana, cita da ari pinokontekonaako reano, matantuomo dahomo nta pokosalamakita mebinta hai sa'o larono Apu Alla. 10 Iponoha daantopo medaluakono Apu Alla, kai mateakita Yesus Kristus Anano, yahopo kato mentepokona mbule. Lalo'eahopo diekana, hito tepokonamo mbule, matantuomo dakita nta pinokosalama tendenomo hi toramo mbule. 11 Na'iaa te'iaa koie! Deenapo tomohende hai Apu Alla tendenomo i Yesus Kristus Apunto, da ari pokontepokonakita.
Nabii Adam ronga Yesus Kristus
12 Mentete hai me'asa miano, kai pewiso dosa hai wita'ea, ronga tendenomo koie dosa, kai da'a mateaha. Koie mateaha da konaa luwu miano, tendenomo naluwuomo miano moweweu dosa. 13 Santo'u-to'uahano, daanopo sai hina Boku Parentano nabii Musa, koie dosa dahomo die hai wita'ea. Sawali nasahinapo koie Boku Parentano nabii Musa, yahomo koie dosa kasai da'apo nidoa. 14 Mainakaa koie mateaha dahomo kuasanio miano, metampu'u tempono nabii Adam dungku hai nabii Musa. Ko'ira miano, mau ki sando limpakio petabeno Apu Alla kana da ari niweweuno i Adam, matehirasi na'anda kana i Adam. Koie i Adam gambaranomo Yesus Kristus danta leu.
15 Sawali pompeehawano Apu Alla nai pengkena mpiha sinalaki da ari niweweuno i Adam. Kana'umpe tendenomo sinalakino me'asa miano kando mate miano da me'alu, sawali kolaloo owose pompeehawano Apu Alla ronga pompoweehino hai miano me'alu, tendenomo me'asa miano, yahoo Yesus Kristus. 16 Pompeehawano Apu Alla nai pengkena niweweu mosa'ono koie i Adam. Kana'umpe perumbuino koie me'asa niweweu mosa'o ki inotuhi, yahoo hukuma, sawali perumbuino koie pompeehawano Apu Alla, yahoo kato pinokontekona, mau ki me'alu niweweunto da mosa'o. 17 Tendenomo koie me'asa miano i Adam da mosalaki, kai kuasaiho matea luwu miano. Kicana koie lalo'eahopo ko'ira miano da mo'awa pompeehawano Apu Alla da owose kando pinokontekona, dahira nta tora ronga mengkuasa tendenomo koie da me'asa miano Yesus Kristus.
18 Nangkuamo koie, tendenomo me'asa niweweu da mosa'o, kando menihukuma luwuo miano. Kanasi na'ana tendenomo me'asa niweweu ntekona, luwuo miano pinokontekona kando mpo'awa toraaha. 19 Kana'umpe tendenomo hi sai ehe monunu parenta da me'asa miano, kai me'alu miano da tewali miano ngkodosa. Kanasi na'ana tendenomo hi ponunu parenta da me'asa miano, kai me'alu miano da pinokontekona.
20 Koiepo pewisono Boku Parentano nabii Musa, kai tetiani me'alu niweweu da mosa'o. Sawali satetianinomo me'alu dosa, sa'owo-owosenomo pompeehawano Apu Alla. 21 Batuano, namakuasamo dosa hai luwu miano, yahomo da nimateakondo, kanasi na'ana kuasa pompeehawano Apu Alla kato pinokontekona, nta mo'awa tora ngkaidaaha mentete hai Apunto Yesus Kristus.