Kai pinokontekona i Ibrahim tendenomo parasaeano
4
1 Kicana koie, hapa danta kanahinto mekona da kadadia koie hai nabii Ibrahim, pembue'ando sukuto? 2 Kicanano i Ibrahim pinokontekona tendenomo niweweuno, matantuomo dahoo sababuno kai daa nta owose rapano. Sawali nai da'a kana koie hai ra'ino Apu Alla. 3 Kana'umpe dahoo teburi hai Boku Haratiano Apu Alla kanahi, « Ibrahim parasaeaho Apu Alla, nangkuamo Apu Alla kai angga'o hicua miano ntekona. »a4 Koie miano da ari mohedo, yo gadino yahoo anggano pohedoano ronga hakunomo, na'iaa pompoweehi mpena. 5 Sawali dahoo miano da sai momperahi-rahi hai hapa da hinedono, deenapo parasaeaho Apu Alla da mokontekonaa miano mosa'o. Tendenomo parasaeano, yahomo koie miano kai ni'angga hicua miano ntekona. 6 Kanasi na'ana nabii Daud angga'o konantuara miano da pinokontekonano Apu Alla, mau ki sai pepu'u hai niweweuno, kanahi,
7 « Konantuarahira miano da inampuni niweweundo da mosa'o,
ronga da tinutuwi dosando.
8 Konantuaraa miano da sai nidoa sinalakino hai Apu Alla. »b
9 Te'iaasi bara miano da ari mesuna da konantuara? Atawa ronga miano da sai paisa mpesuna? Kana'umpe ariakumo kanahi, koie i Ibrahim kai inangga hicua miano ntekona tendenomo parasaeano. 10 Kana'umpe dadaano i Ibrahim tempono pinokontekona? Ariomo bara mesuna atawa nai da'apo? Na'iaa arino, sawali nai paisapo. 11 Kicana koie, kai tarimaa koie suna, te'iaasi kana me'asa peto'o hi ari pinokontekona tendenomo parasaeano, daanopo sai mesuna. Kanamo koie, i Ibrahim tewaliomo miano motu'ando miano mparasaea da sai mpesuna, kando to'ori pinokontekona. 12 Ronga tewaliomo na'ana miano motu'ando miano da ari mpesuna, na'iaa te'iaasi da mpesuna, sawali ndona nunu'o na'anda parasaeano mbueto i Ibrahim, daanopo sai mesuna.
13 Kana'umpe kai nidandi nta pinoweehi die wita'ea tewali tilarindo koie Ibrahim ronga leeno, na'iaa tendenomo nunu'o Boku Parentano nabii Musa, sawali yahoo hi pinokontekona tendenomo parasaea. 14 Kana'umpe kicanano ko'iramo da mpe'ungkaa hai Boku Parentano nabii Musa danta mo'awa tilari, nahinamo gunano koie parasaea ronga nahinamo batuano koie dandi. 15 Kana'umpe koie Boku Parentano nabii Musa da mowawa sa'o larono Apu Alla. Yahomo kasai hina posalakia daano sai hina Boku Parenta.
16 Nangkuamo koie, kai leu dandino Apu Alla tendenomo parasaea, kai mentoda hicua koie dandi mepu'u hai pompeehawano Apu Alla, ronga santo'u-to'uahano nta taronomo luwu leeno i Ibrahim. Dadi, na'iaa te'iaa ko'ira da mpe'ungkaa hai bokuno nabii Musa, sawali ko'ira na'anda da nunu'o parasaeano nabii Ibrahim. Koie i Ibrahim tama mponohantomo 17 hai ra'ino Apu Alla, kana da teburi hai Boku Haratiano Apu Alla, « Ico'omo da pinotoroku tewali peki'ama'ando suku da me'alu. »c Koie i Ibrahim parasaeaho Apu Alla da mompokontora miano mate, ronga koharatia kai pompokoda'a da sai hina. 18 Mau ki sai hina danta pinerahi-rahino, sawali koie Ibrahim dahoo parasaea ronga momperahi-rahi, yahomo kai tewali pembue'ano suku da me'alu, kana haratiano Apu Alla, « Kanamo koie nta me'aluno turunau. »d 19 Nai kura parasaeano, mau ki to'orio hi modengke to'umo wotoluno, kana'umpe umuruno dahomo kira-kira asa etu ta'u, ronga kaduno i Sarah motu'iomo. 20 Sawali hina mehawa'o dandino Apu Alla, nai molelu mpinehawa tendenomo hi parasaea, deenapo pokorodoo parasaeano ronga moko'owose'o Apu Alla. 21 Taperano parasaeaho Apu Alla, hina to'orio Apu Alla hi tule'i mokomenteeho da ari pedandino. 22 Koiemo sababuno Apu Alla kai angga'o hicua miano ntekona.
23 Manturu'akumo kanahi, « Apu Alla angga'o hicua miano ntekona. » Koie gau da teburi na'iaa teburi te'iaa nta tarono wotolu mpantano i Ibrahim, 24 sawali yahoo nta taronto luwunto. Dadi, cita na'anta dahosi Apu Alla nta anggakita hicua miano ntekona hitona mparasaeahosi Apu Alla hi ari potoraa mbule koie Yesus Apunto mebinta hai miano mate. 25 Ariomo sinoro kai pinopate tendenomo sinalakinto, ronga ariomo pinotora mbule kato pinokontekona.