Apu Alla konianto'u
3
1 Kicana koie, hapa pompokulaloino miano Yahudi ronga hapa gunano suna? 2 Me'alu to'uo gunano! Lamoro me'asa: i'iramo da ari tarimaa haratiano Apu Alla. 3 Kana'umpemo ki daa te'asa ntilara miano Yahudi da sai konianto'u? Dahoo bara nta teboli'iako koie konianto'uno Apu Alla? 4 Nai da'a to'u! Deenapo Apu Alla koie menonaa, mau ki mengkule luwu miano, kana da teburi hai Boku Haratiano Apu Alla, « O Apu Alla, kahioomo kai mentoda himi menona hai luwu da haratiamiu, ronga kami mpoponangi kimi inadili. »a5 Sawali ki samente-menteeno mongkoteno Apu Alla tendenomo niweweunto da sai tekona, hapa nta kanahinto? Nai mongkote bara Apu Alla ki hukumakita? (Koie petukanano asa ntilara miano.) 6 Mongkote to'uo! Kana'umpe ki sai mongkote Apu Alla, kana'umpemo kai daa nta to'ori otuhio kara-karano miano wita'ea? 7 Sawali kicua niweweungku da sai mongkote, kai daa samento-mentodano mongkoteno Apu Alla ronga tereree'ano tetiani, hapa kaku daasi inadili kana miano ngkodosa? 8 Hapa kasato ehe kanahi, « Mileumo kato mpoweweu da mosa'o, kai saba nde'e da moico »? Dahoo miano da montumbu'akami kanahi hico daa mogau kana koie. Ko'ira miano daakana pantasiomo kai hukuma'ira Apu Alla!
Luwu miano kodosaa
9 Dadi kana'umpe? Dahoo bara pompokulalointo miano Yahudi ka'iaa suere miano? Nai hina to'u! Kana'umpe ariakumo meri'ou kanahi, miano Yahudi ronga suku suere kuasanihiramo dosa, 10 kana da teburi,
« Mau te'asa miano, nahina da tekona,
11 nahina da kopekiri,
ronga nahina da u'ungkee Apu Alla.
12 Nahinamo da monunu salano Apu Alla,
ronga nahinamo da koguna,
mau te'asa miano nahinamo da moweweu moico. »b
13 « Worokodo kana koburu da menganga,
elondo te'iaasi mompokompore,
hai wiwindo dahoo udu da koratu. »c
14 « Ngangando pono'akoo katundari da mopa'i. »d
15 « Kicua nta mompepate, oru'ira melimpa.
16 Maina dungku'ando, dahoo silaka ronga karasai.
17 Tepokonaa nando da'a paha'o. »e
18 « Nahina momeedo hai Apu Alla. »f
19 Diekana toto'oriomo, luwu da teburi hai Boku Parentano nabii Musa nta tarondo miano da tora kinuasaino koie parenta. Yahomo kasai te'asa miano da tule'i kogau-gau, ronga upuo ihino wita'ea nta hukumaa Apu Alla. 20 Kana'umpe nahina te'asa miano da to'ori pinokomoico hai Apu Alla tendenomo nunu'o parentano nabii Musa, deenapo koie parenta te'iaasi motisu'o miano hicua miano ngkodosa.
Manusia pinokontekona tendenomo parasaea
21 Sawali diekana Apu Alla ariomo motisu'o miano kana'umpe carano kando moicoakono mbule, ronga koie carano na'iaa nta monunu parentano i Musa. Kanamo koie da teburi hai Boku Parentano nabii Musa ronga pera nabii: 22 Apu Alla mokontekonaa miano hinangkua parasaeano hai Yesus Kristus. Tuduano koie hai pera miano da parasaea, nasai hina teposengkano miano hai ra'ino Apu Alla. 23 Kana'umpe luwu miano madosaamo ronga nando pantasi merongaa Apu Alla hai laro mpinoko'owose'ano. 24 Sawali nangkua pompeehawano Apu Alla, kai pokontekona mpenahira, mentete hai Yesus Kristus da huda'ira mebinta hai dosando. 25 Ronga Apu Alla soroo tewali kurbaa, kai tepulosi to manusia hai sinalakindo kindo parasaeahosi. Apu Alla weweuho kana koie kai mentee mongkoteno. Kana'umpe iponoha ariomo Apu Alla sabarakio dosa sinalakino to manusia ronga nai da'apo hukumaa. 26 Diekana Apu Alla mepatudu nta pokomentoda'o sipano hi mongkote, ronga pera miano da parasaeaho i Yesus mentoda'anomo hi ari Apu Alla pokontekonahira.
27 Kicanamo koie, hapa sababuno kato daa nta mentaba? Nahina! Hapa sababuno? Apu Alla pokontekonakita bara tendenomo hito nunu'o parenta? Na'iaa! Sawali tendenomo parasaea. 28 Kana'umpe nunu'o parasaeamami, kai pinokontekona manusia nangkua parasaeano, na'iaa hi nunu'o parentano nabii Musa. 29 Atawa koie Apu Alla te'iaasi Apuno miano Yahudi? Na'iaa bara Apundo pera suku suere? Menonaa, Apundosi na'ana pera suku suere! 30 Kana'umpe Apu Alla te'iaasi me'asa. Iaamo danta pokontekonahira miano Yahudi tendenomo parasaeando, kanapo na'ana pokontekonahira miano suku suere tendenomo parasaeando. 31 Hito parasaeamo Yesus, nta basiakomo bara koie parentano nabii Musa? Nai da'a to'u! Deenapo topokomorodoo.