Apu Alla nta adili'o luwu miano
2
1 Nangkuamo koie, mau inai da mompasala suere miano, nahina nta pongkonaano. Kana'umpe kiu po'otuhi tesalano suere miano, dakomo otuhio tesala'u panta'u, hina mengkenasi niweweuu. 2 Toto'orio Apu Alla hi mongkote hi po'otuhi kara-karado ko'ira da mpoweweuhako. 3 Ronga co'o da otuhiakondo'o tesalado ko'ira miano da mpoweweuhako, yahosi na'au moweweuhako. Ponto'oriu bara dakosi nta tepulosi hai hukumano Apu Alla? 4 Atawa mokeako bara pakura-kura'o pololarono Apu Alla, molueno pinehawano, ronga sabarano? Nau da'a bara to'orio patuduno Apu Alla hi daa lolaroko kai wowawako kau manda?5 Sawali hina motea rapau, sai ehe moboli'i, panta'usi da kongkoo koie sa'o larono Apu Alla, ki leuho oleo kiama'a dahano nta pokomentoda'o sa'o larono, ronga otuhio hukumando miano kai mongkote. 6 Apu Alla danta wolohio tee-tee'asa miano kana niweweuno pantano. 7 Dahira miano da mpoweweu da moico tendenomo hindo mokea mo'awa poo'iaha da tereree ronga da te'angga da sai hina upuano. Ko'ira miano danta awaa tilari tora ngkaidaaha mebinta hai Apu Alla. 8 Sawali da te'iaasi urusio wotolu mpantano ronga sai monunu da menona, te'iaasi monunu da mosa'o, danta awaamo sa'o larono Apu Alla. 9 Pera miano da moweweu mosa'o, dahoo nta marasai ronga tepakasea; lamoro me'asa miano Yahudi, kanapo na'ana suku suere. 10 Sawali pera miano da moweweu moico, nta awaa tereree'a, te'angga'a, ronga mapuhino Apu Alla, kontu'uma miano Yahudi, kanapo na'ana suku suere. 11 Kana'umpe Apu Alla nai peruruki miano.
12 Kana'umpe luwu miano da kodosa da sai to'orio Boku Parentano nabii Musa, dahira nta nihukuma, sawali kando nihukuma na'iaa mepu'u hai parentano i Musa. Ronga luwuo miano ngkodosa da to'orio Boku Parentano nabii Musa, dahira nta inadili mepu'u hai parentano nabii Musa. 13 Kana'umpe miano da tepokonaakono mbule Apu Alla, na'iaa hindo podeahomo Boku Parentano nabii Musa, sawali hindona weweuho petenano koie ihino boku. 14 Ko'ira suku suere nahina da to'orio parentano nabii Musa. Sawali kindo tibo weweuho hapa da petenano koie parenta, pelaroandomo da parentahira, mau ki sando da'a to'orio parentano nabii Musa. 15 Bangu-bangudo mentoda'anomo hi teburimo hai pelaroando koie parenta. Ronga pelaroando da tewalimo saksiido, kana'umpe nte tangka'ano kai pasala'ira ronga pokontekonahira pelaroando pantado. 16 Kanamo koie danta kadadia ki leumo oleo dahano Apu Alla nta tena'o Yesus Kristus kai adili'o pera rahasiano pelaroando to manusia. Kanamo koie, nunu'o Lele Mohende da nileleakongku.
Miano Yahudi ronga parentano nabii Musa
17 Kanahiu co'o miano Yahudi ronga hiu pomperahi-rahi hai parentano nabii Musa, ronga mehawa hiu daa mesombaiho Apu Alla. 18 Co'o da to'orio da patuduno Apu Alla, ronga to'ori moruruki da moico, tendenomo pompotisuno parentano i Musa. 19 Kanahiu, co'omo da wowawahira miano mopusu, ronga huluno miano hai rondomaano. 20 Potisu'ira da mempore, ronga paguru'ira da sai da'apo mento'ori, hiuna parasaeaho koie Boku Parentano nabii Musa hicuamo pu'uno luwu ponto'ori ronga pompotisu da menona. 21 Kicanamo koie, co'o da mompotisu suere miano, hapa kasau potisu'o wotoluu? Potisu'o miano, « Osie mononako », co'omo da mononako. 22 Potisu'o miano, « Osie meduluakono da sa'iaa samporau », nde'e kau daasi meduluakono da sa'iaa samporau? Kau kokoleaho ka'apu-apu, mainakaa co'omo da talia'o ihino laicano ka'apu-apu. 23 Mentabakomo hiu daa dioho Boku Parentano nabii Musa, mainakaa paruruo Apu Alla hina sau da'a nunu'o ihino koie parenta. 24 Kana da teburi hai Boku Haratiano Apu Alla, « Ko'ira suku suere paruruo Apu Alla tendenomo niweweumiu miano Yahudi. »a
25 Suna dahoo gunano, kiu nunu'o parentano nabii Musa; sawali ki sau nunu'o, yahomo kasai hina gunano. 26 Dadi, ki daa da sai mesuna, sawali hina weweuho parentano nabii Musa, kowatinosi miano da ari mesuna. 27 Ronga ko'ira miano da sai mpesuna, dahira nta pasalakomiu, comiu miano Yahudi, kana'umpe dahoo hai comiu parentano nabii Musa ronga suna, sawali nasami ehe mponunu koie parenta. Nando da'a mpesuna, sawali i'iramo da nunu'o parentano nabii Musa. 28 Miano Yahudi da santo'u-to'u, na'iaa da meneehako miano Yahudi. Ronga miano da santo'u-to'uno nisuna, na'iaa da nisuna hai wotoluno. 29 Miano Yahudi da santo'u-to'u yahoo miano da mepelaroa Yahudi. Ronga suna da santo'u-to'u yahoo suna hai pelaroa da niweweuno Sangkoleono Apu, na'iaa kana da teburi hai Boku Parenta. Miano da kana koie tereree'ano hai Apu Alla, na'iaa hai manusia.