Surano i Paulus hai jema'a
Roma
Salamu
1
1 Die sura mebinta hai aku, i Paulus, atano Yesus Kristus, da niboboino Apu Alla tewali rasulu ntinindahakono nta leleako Lele Mohendeno. 2 Koie Lele Mohende ariomo meri'ou Apu Alla medandi metolea'ako raro nabii, ronga teburiomo hai Boku Haratiano. 3 Koie lele mekona hai Anano, Yesus Kristus Apunto; nunu'o turunano manusia, yahoo leeno i Daud. 4 Sawali mentoda'anomo hicua Anano Apu Alla da kuasa, tendenomo Sangkoleono Alata'ala da pokompewanguo mebinta hai wonuando miano mate. 5 Tende pompeehawano Yesus Kristus, kai taarakokami Apu Alla tewali rasuluno nta wawahira pera suku kando parasaea ronga nunu'o po'eheno, kai pinoko'owose neeno. 6 Pera suku da tewiso itaicomiumo da meda'a hai Roma; ariomo Apu Alla boboicomiu tewali mianono Yesus Kristus, 7 ronga kebaicomiu tewali umatino da nilolarono. Kahioomo Apu Alla Tamanto ronga Yesus Kristus Apunto kando peehawakomiu ronga mapuhiakomiu'o barakati.Paulus mokea nta lako hai Roma
8 Kaku peri'ou montarimakasi hai Apu Alla Apungku mentete hai Yesus Kristus tendenomo comiu, hi dungkumo leleno parasaeamiu hai upuo wonua. 9 Naku paisa kolumpekomiu kicu amala, dahosi Apu Alla saksiicu, da laronto'u nilayanincu leleako dadaano Anano. 10 Kohoko hicu amala, kupo'ita ki po'eheno Apu Alla, kai poweehaku tempo kaku oru awakomiu. 11 Moko'auho larongku kato mentepo'onto, kaku titilakomiu barakati mebinta hai Sangkoleono Apu nta pokomorosoo parasaeamiu, 12 batuano kito mperonga, imanimiu danta pokomorodoo larongku, ronga imanincu danta pokomorodoo laromiu.
13 Raro mpetila, po'ehengku kami nto'orio hicu sadia mongkaria nta leu awakomiu, sawali dungku die wotu, naku paisa tepoweweu. Mokeahaku ontoo wuano pohedoangku hai comiu, kana hai suere wonua da sa'iaa suku Yahudi. 14 Dahoo tugasincu hai pera suku, hai suku Yunani maupo hai suku suere, kanapo hai miano da arimo mesicola ronga da sai da'a. 15 Koiemo sababuno kaku mokea wawaakokomiu'o Lele Mohende da meda'a hai Roma.
Kuasano Lele Mohende
16 Kuparasaea'eaho koie Lele Mohende hicua kuasano Apu Alla da mokosalama'o luwu miano da parasaea, kontu'uma miano Yahudi, kanapo na'ana suku suere. 17 Kana'umpe koiemo Lele Mohende menteehano tepokonaando mbule to manusia ronga Apu Alla: carano, yahoo parasaeaho Apu Alla mebinta iso-isono dungku kompura-puraano. Kana da teburi hai Boku Haratia, « Miano da pinokontekona tendenomo parasaeano dahoo nta mo'awa toraaha. »a
Hukumano to manusia hi posalaki
18 Tendenomo niweweu mosa'ondo miano dungku kasando to'orio pompotisuno Apu Alla da menona. Yahomo kai pokomentoda'o sa'o larono Apu Alla mebinta hai suruga tudu hai pera miano da mosalaki ronga moweweu dosa. 19 Kana'umpe hapa da tule'i tino'orindo mekona dadaano Apu Alla taperano mentoda, kana'umpe Apu Alla ariomo mokomenteehakondo'o. 20 Sa'isono Apu Alla weweuho wita'ea, mentoda'omo sipano Apu Alla da sai tule'i inonto, yahoo dadaano Apu Alla ronga kuasano da sai hina puraano. Kana'umpe miano tule'iomo paha'o tendenomo da ari pinokodadino Apu Alla. Dadi to manusia, nahina oleono kando tepehapu hi sahina dosando. 21 Kana'umpe ndona nto'orio Apu Alla, sawali nasando angga'o, ronga nando pontarimakasi. Deenapo pekirindo nahinamo gunano; pelaroando da pore rondomaamo. 22 Ponto'orindo iramo da mandara, mainakaa iramo da pore. 23 Na'iaamo Apu Alla da tereree samengka-mengkauno dahando mesomba, sawali ndona popo'euhakono'o ka'apu-apu kana rupano miano, manu-manu, kadadi da kokaru opaa, atawa kadadi lumele, danta lono luwuo.
24 Nangkuamo koie, kai poturusihira Apu Alla kando nunu'o po'ehendo mpoweweu ngkabaria, kando mpekakoko-koko'anui pada-pada'ira. 25 Pompotisuno Apu Alla da menona ndopopo'euhakono'o kule. Da pinesombaindo ronga da pina'anggado yahoo ko'ira da ari niweweuno Apu Alla, na'iaa hai Apu Alla da ari weweuho ko'ira luwu dahando mpesomba. Sawali da paraluu'ea nireree samengka-mengkauno yahoo Apu Alla, amin.
26 Koiemo sababuno kai poturusihira Apu Alla, kando nunu'o kea-keando da mowuse. Ko'ira tina na'iaamo hai tama dahando mokea, sawali hai santinandomo. 27 Kanapo na'anda ko'ira tama, na'iaamo mokeahako tina, sawali mokeahako santamando. Mpeka'ala-ala pada ntama yahoo niweweu da mowuse. Yahomo kai wolohi'ira Apu Alla hai wotolundo nunu'o niweweundo da mosa'o.
28 Nasando ehemo to'orio Apu Alla, yahomo kai poturusihira kando mpepekiriako da sa'ia-iaa, kando daa mpoweweu da upali. 29 Pelaroando pono'akoomo pera da mosa'o, da sa'ia-iaa, mosuku'ako inawa, momporei, singgira, mompepate, mekakahi, me'akala, patudu mosa'o, mesangkeli, 30 mososa'o miano, daluo Apu Alla, mongkoko'anui miano, mentaba, mereree mpanta, mandara mo'u'ungke akala mosa'o, sai mompaduli miano motu'a, 31 pore, nai konianto'u hi pedandi, sahina pompeehawano atawa pololarono. 32 Dahirasi to'orio parentano Apu Alla kanahi, da moweweuhako kana koie dahoo nta hinuku mate. Sawali dahirasi moweweuhako, deenapo reree'ira miano suere da mpoweweuhako.