I Yakobus mate; i Petrus tebintani hai katorungku
12
1 Koie tempo, mokole Herodes Agripa petampu'uomo pakaseahira opi-opia miano mebinta hai jema'a.a 2 Kai petena pepateakono'o taa i Yakobus, petilano i Yahya. 3 Sa'ontoomo koie hi po'ehendosi miano Yahudi, petena'omo penda kando rako'o i Petrus. Koie tempo yahoo ndo'ua Tewawea Roti Sai Kotulu. 4 Saterakonomo i Petrus, kai petena mokole Herodes kando wiso'o hai bolo ngkatorungku, kando medaga'o pato ntaroa sorodadu, da te'o'opaa miano asa mpodaga'a. Patuduno koie i Herodes, kai aripo tealo koie oleo owose Ntepulosi'a, yahopo kai adili'o koie i Petrus hai ra'indo miano me'alu. 5 Kanamo koie kai petorungku i Petrus, sawali ko'ira anggota jema'a ndona mokora amalaakono hai Apu Alla.6 Malono nta inadili'ano koie i Petrus, dahano moturi te'ula'ako orua rante uti yahoo hai olotano orua sorodadu da daga'o. Asa ntilara ko'ira sorodadu podaga'ando hai mata wamba. 7 Kai tibo mentade me'asa mala'ekatino Apu hai pampano i Petrus ronga tepana niwinca koie hai bolono sel. Koie mala'ekati tuba'akono'o limano kai kanahi, « Pewangumo merare! » Koie rante uti tewuwuhiomo mebinta hai limano i Petrus. 8 Kai kanahi koie mala'ekati, « Pokonaa sulepe'u ronga sadu'o sandala'u! » Kai nunu'o kana da petenano. Kai kanahi penda koie mala'ekati, « Pake'omo babu mentiiu kau leu nunu'aku! » 9 Kai peluarako koie i Petrus nunu'o koie mala'ekati, sawali nai da'a to'orio hi menona kadadia da niweweuno koie mala'ekati, ponto'orino dahoo te'i'ipiohako. 10 Sando liahomo podaga'a da me'asa ronga da ko'orua, kando dungku'o pinewamba uti nta meluarakomo hai kota. Koie na'ana pinewamba te'ungkahiomo pantano. Sateluarakondo, kando lolako dungku hai ana sala, kai tibo koie mala'ekati bintaa koie i Petrus.
11 Sa'awaamo laro, yahopo kai kanahi koie i Petrus, « Diekana santo'u-to'uahano kuto'oriomo hicua Apu da ari montena mala'ekatino pokosalama'aku mebinta hai limano i Herodes ronga pera da po'ehendo miano Yahudi. »
12 Sato'orio kana'umpe dadaano, lako'omo hai laicano i Maria, tinano i Yahya da meneehako i Markus. Na'icomo me'amalaando ko'ira miano me'alu da mentekongko. 13 Dahomo mekunte koie hai wamba, kai leu me'asa ata ntina da meneehako i Rode nta ungkahiakono'o wamba. 14 Tade-tadeno to'orio suarano i Petrus. Tende mohendeno pelaroano nai da'apo ungkahio wamba, kai pewiso tekara-karai mo'awaakondo hicua i Petrus da da'a hai luara mepe'ungkahio wamba.
15 Kando kanahi, « Nau da'asi molawu? »
Sawali koie i Rode dada'iaasi kanahino, « To'u-to'uo koie i Petrus. »
Yahomo kando kanahi, « Ntada'a mala'ekatino. »b
16 Koie i Petrus nai ari-ari mekunte hai wamba. Tempondo ungkahiakono'o wamba kando ontoo, taperando tekangka. 17 Sawali koie i Petrus nantaarako limano moweehira peto'o kando mpengio, yahopo kai tuluraakondo'o kana'umpe poweweuno Apu kai wawaa meluarako mebinta hai katorungku. Yahopo kai kanahi, « Pontuluraakono i Yakobus ronga ko'ira petilato meha-mehano. »c Sa'arino koie, kai lako hai suere kampo.
18 Sadumondono, kando menteka'ungke ko'ira sorodadu da mpodaga hai torungku, kando pada mpekatuka-tukanai, ki kana'umpe daano koie i Petrus. 19 Kai tena'ira i Herodes kando u'ungkee, sawali nasando awaa. Yahomo kai paresahira ko'ira sorodadu, kai petena kando pinopate.
Sa'arino koie, lako'omo i Herodes mebinta hai Yudea kai poo'ia hai Kaisarea.
Nimateakono i Herodes Agripa
20 Koie mokole Herodes Agripa mosa'oomo larono ronga kokoleahiramo miano Tirus naamo miano Sidon. Nangkuamo koie, kando mpe'asa gau, kando mperonga leu mera'iako hai iaa. Da iso nilou-loudo yahoo i Blastus, da atoro'ira raro ntina'asino mokole, kando mpe'asa mpatudu. Yahopo kando lako mpo'ita dame, kana'umpe wonuando po'awano tinoraako yahoo mebinta hai wonuano i Herodes.
21 Konaa me'asa oleo da ari pinatantu, kai pepakea mokole koie i Herodes kai totoro hai kadera pomokole'ano ronga pidato kando podeaho ko'ira miano me'alu. 22 Kando mpehohou ko'ira miano me'alu kanahi, « Arumaimo suarano Apu, na'iaa suarano manusia! » 23 Koiesi tempo kai anuo mala'ekatino Apu koie i Herodes, tendenomo nasai po'angga Apu Alla, kai mate kaaho ule kora.
I Barnabas ronga i Saulus tinena