I Petrus melaporo hai jema'a Yerusalem
11
1 Ko'ira rasulu ronga miano mparasaea hai upu-upuo wita Yudea mempodeahomo hi mau da sa'iaa miano Yahudi, parasaeahiramo haratiano Apu Alla. 2 Saleunomo koie i Petrus hai Yerusalem, kando pasala'o ko'ira miano da parasaeahomo Yesus, sawali dahirapo ungkaari to'uo atorano suna, 3 kanahi, « Hapa kau lako hai laicando miano da sai mpesuna, ronga mongkaa merongahira? »4 Sawali koie i Petrus nantuluraakondo'o luwu da ari kadadia metampu'u isono kanahi, 5 « Dahaku konainoo amala hai kota Yope, kai tibo teboli'i po'ontongku. Hai larono niamata kaku ontoo me'asa da kana kati melewe niruruha mebinta hai langi tudu hai ra'incu, dahosi tekoo ko'opaa'o siuno. 6 Tempongku mekaa-kaanio, ku'ontoo bolono dahoo koa giuno kadadi da kokaru opaa, da mo'ila, da lumele, ronga manu-manu. 7 Yahopo kaku podeaho suara da kanahi, ‹ O Petrus, pewangumo, mosumbele kau pongkaa. ›
8 Sawali kuna molawani kanahi, ‹ Kuda'asi, Apua, kana'umpe naku paisapo mongkaa te'asa da upali atawa da haramu. ›
9 Sawali kanahiomo penda koie suara mebinta hai langi, ‹ Hapa da ari pinokohalalano Apu Alla, osie co'o mokoharamu'o. › 10 Kompentolunomo koie kadadia, yahopo kai taara mbule luwu hai langi.
11 Koiesi wotu kando leu otolu miano mentade hai ra'i laica dahangku konainoo moo'ia, da tinena leu awaaku mebinta hai Kaisarea. 12 Kanahiomo Sangkoleono Apu, ‹ Lakomo merongahira, osie montangkoro. › Ronga di'ira petila da onoo camimo da mperonga. Sadungkumami, kako mpewiso hai laicano koie i Kornelius, 13 kai tuluraakami'o kana'umpe tempono ontoo koie mala'ekati da mentade hai bolo laicano ronga kanahi, ‹ Pontenamo miano lako hai Yope alaa i Simon da meneehako i Petrus. 14 Iaamo danta mo'awaakoko me'asa lele danta mokosalamako ronga luwu ihino laicau. ›
15 Naamo isoku nta mogau, tudurihiramo Sangkoleono Alata'ala, kana da ari tuduricita iponoha. 16 Yahopo kaku pokopehawa'o hi ari Apu kanahi, ‹ I Yahya mobaho'ako e'e, sawali comiu nta nibaho'ako Sangkoleono Alata'ala. › 17 Kicuamo Apu Alla da ari moweehira Sangkoleono kana hi ari moweekita isoto parasaeaho Yesus Kristus, kana'umpemo kaku daa nta to'ori tabe'o Apu Alla? »
18 Sando podeahomo koie, kando ari-ari pasala'o i Petrus, kando reree'o Apu Alla kanahi, « Dadi, mau hai suku suere, poweehiramo Apu Alla toba kando mpo'awa toraaha. »
I Barnabas ronga i Saulus lako hai Antiokhia
19 Sa'arinomo pinopate koie i Stefanus, ko'ira miano da parasaea mempinakaseahiramo kando mentehawu-hawu dungku hai Fenisia, Siprus, ronga hai Antiokhia. Dahirasi leleako haratiano Apu Alla, sawali te'iaasi hai miano Yahudi. 20 Sawali dahoo opia miano da mpebinta hai Siprus ronga hai Kirene da medungku hai Antiokhia, ko'iramo da montuluraakondo miano Yunani Lele Mohende mekona hai Apu Yesus. 21 Namerongahira kuasano Apu, yahomo kai me'alu miano da parasaea ronga nunu'o Apu.
22 Kai dungku nde'e leleno koie kadadia hai jema'a Yerusalem, yahomo kando tena'o koie i Barnabas kai lako hai Antiokhia. 23 Sadungkuno koie i Barnabas ronga ontoo pompeehawano Apu Alla ko'ira miano mparasaea, nilakono mehawa larono. Kai oliwihira kando nunu to'uo Apu. 24 Koie i Barnabas yahoo me'asa miano da moico larono naamo kinuasanino Sangkoleono Alata'ala ronga parasaea to'u, yahomo kai tetiani me'alu miano kokeena da parasaeaho Apu.
25 Kai lako koie i Barnabas hai Tarsus u'ungkee i Saulus. Satepo'awando kai wawaa hai Antiokhia. 26 Asa ta'u poo'iando hai jema'a kokeena ronga potisu'ira miano me'alu. Koiemo hai Antiokhia iso'ano da'a miano mparasaea da nineehako miano Ngkarasitee.
27 Koie tempo dahoo opia nabii da meleu hai Antiokhia mebinta hai Yerusalem. 28 Dahoo me'asa simbaudo da meneehako i Agabus da kinuasanino Sangkoleono Apu da mentade mokodungku'o hi daa nta da'a murota da owose hai upu-upuo wonua. Kai ari koie kadadia yahoo tempono momparenta mokole'ea i Klaudius. 29 Nangkuamo kando boboto ko'ira miano mparasaea nta mongkompulu petotoa, nunu'o hapa da inawando tee-tee'asa miano, kando pokatuhira petila sa'imanindo da meda'a hai Yudea. 30 Koie petotoa ndotena'omo i Barnabas ronga i Saulus kando lako wawaakondo'o kamotu'ano jema'a hai Yudea.