Toba'ano i Saulus
9
1 Koie tempo dahopo kolanga-langa sa'o larono i Saulus nta pepatehira pera da nunu'o Apu Yesus. Kai lako mera'iako hai pua'ima'ea, 2 mo'ita sura kuasa nta niwawano hai ira ponggawano laica sambahea'a hai Damsik. Ki po'awa tama atawa tina da nunu'o Sala Salama'a,a nta rako'iramo kai wawahira hai Yerusalem.3 Dahomo lolako i Saulus me'o'ala hai Damsik, okudahio koie kota, kai tibo panario niwinca lilicu'o mebinta hai langi. 4 Kai tehoka koie i Saulus hai wawo wita, yahopo kai podeaho suara da kanahi, « Saulus, Saulus, hapa kau daa pakaseahaku? »
5 Kai polawani koie i Saulus, « Inai Comiu, Apua? »
Polawanino, « I'akumo die Yesus da pinakaseau. 6 Sawali pewangumo kau pewiso hai bolo ngkota, na'ico dahaumo nta pino'awaako hapa danta niweweuu. »
7 Da perongano lako mentodohiramo mentade bangao, kana'umpe ndona podeaho na'anda koie suara, sawali nahina te'asa miano da inontondo. 8 Kai pewangu koie i Saulus nta kolihe-lihe, sawali nai ehemo ko'onto. Nangkuamo kando ungkaario limano kando wawaa hai Damsik. 9 Tolu oleo sai ko'ontono, sai pongkaano, ronga sai pondo'uno.
10 Hai Damsik dahoo me'asa ana guruno Apu da meneehako i Ananias. Kai popo'ontonio Apu ronga koharatia, « O Ananias! »
Kai polawani, « Dahakusi die, Apua! »
11 Koharatia'omo Apu kanahi, « Pewangumo kau lako hai sala da meneehako Sala Mongkote, u'ungkeemo hai laicano i Yudas me'asa miano da mebinta hai Tarsus da meneehako i Saulus. Diekana dahoo konainoo amala, 12 ronga hai laro amalaano, niamata ontoo miano da meneehako i Ananias leu mewiso ronga dampasako peleno hai rapano, kai to'ori ko'onto mbule. »
13 Polawaniomo koie i Ananias, « Apua, kupodeahomo hai miano me'alu dadaano koie miano, ronga pera niweweuno da mosa'o hai umatimiu da meda'a hai Yerusalem. 14 Naamo kai leu na'ai ariomo pinoweehi kuasa mebinta hai raro ngkapala pua'ima, nta rorako'ira pera miano da mesombaicomiu. »
15 Sawali Apu nalawanio, « Lakomo! Kana'umpe koie miano ariakumo rurukio, danta pinokotena-tenaku leleako neengku hai suku suere naamo hai raro mokole ronga hai miano Israil. 16 Dahakusi nta mo'awaakono hi ntaperano me'alu karasai danta inawano tendenomo I'aku. »
17 Kai lako nde'e i Ananias koie hai laica kai pewiso ronga dampasako peleno hai Saulus kai kanahi, « O petilaku Saulus, Apu Yesus da ari inontou daau hai sala nta leu na'ai, yahomo da tena'aku leu awako kau to'ori ko'onto mbule, kai poo'iahico Sangkoleono Alata'ala. » 18 Koiesi tempo kai telulusako da kana kuli oleo da mbaluo matano, yahopo kai ko'onto mbule. Pewanguomo nde'e yahopo kai nibaho. 19a Sa'arino mongkaa kai moroso mbule wotoluno.
I Saulus merongahira miano mparasaea hai Damsik
19b I Saulus poo'iahomo opia oleo hai Damsik merongahira miano mparasaea. 20 Sai-saino lako mompotisu hai opi-opia laica sambahea'a, ronga leleako hicuamo koie i Yesus Anano Apu Alla. 21 Luwu miano da modeaho mentekangkahiramo ronga kanahi, « Na'iaa bara iaa koie miano da mokea sosa'oo pera miano da parasaeaho i Yesus hai Yerusalem? Na'iaa bara kai leu na'ai mepatudu nta rorako'ira ronga wawahira hai ra'ino raro ngkapala pua'ima? »
22 Sawali koie i Saulus sa'owo-owosenomo pongaruno ronga mokontekangkahira miano Yahudi da mpoo'ia hai Damsik, kana'umpe namokomenteeho hicuamo koie i Yesus Mokole Pompokosalama.
23 Mengkauhopo, yahopo ko'ira miano Yahudi kando mpekosi nta pepatee koie i Saulus. 24 Sawali patudundo da mosa'o nanto'oriosi koie i Saulus. Mengkena malo meanta ko'ira miano Yahudi dagai'o luwu pinewambano kota, kindo daa nta tule'i pepatee. 25 Sawali mau kicana koie, dahoo me'asa malo kando leu ko'ira ana guruno i Saulus alaa kando ruruhaa hai kompe ue mebinta hai wumbu toricino kota.
I Saulus hai Yerusalem
26 Sadungkuno koie i Saulus hai Yerusalem, mokeaho boboto'akondo ko'ira ana guruno i Yesus, sawali ndona momeetako, hina sando da'apo parasaeaho hi tewalimo na'ana ana guruno. 27 Yahomo i Barnabas kai leu alaa ronga wawaa hai ira rasulu. Kai tuluraakondo'o kana'umpe i Saulus hi ari ontoo Apu hai tonga sala, ronga Apu mogau'akono. Ronga tuluraakondo'o ki kana'umpe mosekano hai Damsik mompotisu'ako neeno i Yesus. 28 Dadi, koie i Saulus mperongahiramo mpoo'ia hai Yerusalem, ronga mosekaamo sisimbu mompotisu'ako neeno i Yesus. 29 Kai pogau'akondo ko'ira miano Yahudi da mpogau Yunani kando mpekapetukanai mpo'awa, sawali ndona mokea pepatee. 30 Sando to'orio ko'ira petila sa'imanino, nilakodo wawaa koie i Saulus hai Kaisarea, kando pokolako'o hai Tarsus.
31 Koie tempo amaamo dadaano jema'a hai Yudea, Galilea, ronga Samaria. Ko'ira jema'a tetianiomo moroso parasaeando ronga momeetako Apu. Sateti-tetianindomo me'alu tendenomo pontulumino Sangkoleono Alata'ala.
I Petrus pokontidoo i Eneas ronga pokompewanguo i Dorkas
32 Koie wotu i Petrus sisimbu'omo awahira jema'a. Laro lakoahano koie, kai tealo awahira miano mparasaea da meda'a hai Lida. 33 Na'icomo dahano awaa me'asa tama da meneehako i Eneas da hoalumo ta'u leleha hai poturiano tendenomo lungkuho. 34 Kai kanahi koie i Petrus, « O Eneas, Yesus Kristus da mokontidoko. Pe'engkamo, pokotindaa poturiau! » Koiesi tempo kai pewangu. 35 Luwuo miano da mpoo'ia hai kampo Lida ronga hai wonua Saron ndo'ontoomo koie i Eneas, yahomo kando mentegili parasaeaho Apu.
36 Hai Yope dahoo me'asa ana guruno i Yesus da meneehako i Tabita, hai gau Yunani neeno i Dorkas (batuano « melaa »). Koie tina me'aluo da moico niweweuno, ronga pompeehawa'o miano ngkadee-dee. 37 Koie tempo morungku'omo kai mate. Sa'arinomo nibaho maeatino, kando wuatako hai suo da hai wawo. 38 Lida ronga Yope peka'okudahi'irasi. Dadi, sando podeaho ko'ira ana guru hi daa i Petrus hai Lida, pontena'iramo orua miano lako awaa ronga mo'ita kanahi, « Meraremo leu awakami. »
39 Pewanguomo nde'e koie i Petrus kando melako. Sadungkuno kokeena, nilakodo wawaa hai suo da hai wawo. Luwuo ntina walu meleuhiramo mentade lilicu'o kando daa mpewowo ronga popo'ontoniakono'o babu ronga pinodai da ari sineunino i Dorkas daanopo tora.
40 Sawali i Petrus nantena'ira kando mpeluarako luwu, yahopo kai kokolontuu ronga amala. Kai pegilisako ontoo koie maeati ronga kanahi, « Tabita, pewangumo! » Yahopo i Tabita kai mbulatako matano kai ontoo i Petrus, kai pewangu totoro. 41 Kai ungkaario limano ronga mokompetadee, yahopo kai boboihira miano mparasaea ronga raro ntina walu, kai tena'ira kando ontoo hi toramo mbule koie tina. 42 Koie kadadia teleleakomo hai upu-upuo Yope, ronga me'aluomo miano da parasaea hai Apu. 43 Sa'arino koie, mengkauhopo poo'iano i Petrus hai Yope, hai laicano miano da meneehako i Simon, yo tuka baula.