8
1a Po'ehenosi na'ana i Saulus kai pinopate i Stefanus.Pinakaseahando miano Ngkarasitee hai Yerusalem
1b Koiemo oleo petampu'uano pinakasea mobea'ando jema'a hai Yerusalem, dungku kando mentekamburako luwu hai upuo Yudea ronga Samaria, tabeano ko'ira rasulu. 2 Ko'ira miano da pangkuku hai Apu Alla da koburuomo koie i Stefanus ronga da mperurumateiho. 3 Sawali i Saulus na'e'elengua mokea pupuraa jema'a Ngkarasitee, ronga lako kuu-kuu'o laica o'alahira tama ronga tina, kai wawahira ronga wiso'ira hai katorungku.
Filipus hai Samaria
4 Ko'ira miano Ngkarasitee da mentekamburako, hai hapa dahando medungku, dahandomo leleako koie haratiano Apu Alla. 5 Kanamo na'ana koie i Filipus lako'omo hai me'asa kota hai wonua Samaria leleakoakondo'o koie Mokole Pompokosalama. 6 Tempondo ko'ira miano me'alu modeaho da nileleakono i Filipus, ronga ontoo peto'o tekangka da niweweuno, luwundo meboboto mpelaroahiramo tarimaa haratia da nileleakono. 7 Kana'umpe me'aluomo setani da mpeluarako mpekiali bintanio miano da nilawuino, ronga me'aluo penda miano lungkuho naamo motince da pinokontidono. 8 Dadi, ntaperando mohende larondo ko'ira miano da meda'a koie hai kota.
9 Koie hai kota dahoo me'asa miano da meneehako i Simon, da lembahimo mompadala tino'orino da pokotekangkahira miano Samaria, ronga mereree mpanta hicuamo iaa da teku-tekulalo. 10 Luwu miano da motu'a kanapo ana'ate mekaa-kaanio da niweweuno ronga kanahi, « Die miano yahoo kuasano Apu Alla da nineehako Kuasa'ea. » 11 Ronga kando menunu'o, hina lembahimo pokobangaohakondo'o tino'orino. 12 Sawali diekana, ko'ira miano parasaeahiramo Lele Mohende da nileleakono i Filipus mekona pomparentaano Apu Alla ronga neeno Yesus Kristus, yahomo kando menibaho, kana tama ronga tina. 13 Kanamo na'ana koie i Simon parasaeahomo, ronga sa'arinomo nibaho, mperonga ngkaidaahiramo i Filipus. Ronga bangao hi po'onto peto'o tekangka'ea da me'alu da kadadia.
14 Sando podeahomo ko'ira rasulu hai Yerusalem, hi me'alu miano da tarima moicoo haratiano Apu Alla koie hai wonua Samaria, ndotena'iramo i Petrus ronga i Yahya lako awahira. 15 Sadungkudo kokeena, nilakodo amala mo'itaakondo ko'ira miano Samaria kando tarimaa Sangkoleono Alata'ala. 16 Kana'umpe nahinapo te'asa ko'ira miano da tinudurino Sangkoleono Alata'ala, te'iaapo ndo'ari nibaho'ako neeno Apu Yesus. 17 Yahopo i Petrus ronga i Yahya kando dampasako pelendo hai ko'ira miano Samaria, kando tarimaa Sangkoleono Alata'ala.
18 Sa'ontoomo koie i Simon hindo pinoweehi Sangkoleono Apu tendenomo pelendo ko'ira rasulu, kai tawariakondo'o doi i Petrus ronga i Yahya. 19 Kai kanahi, « Mimpoweehaku na'angku koie kuasa, kaku to'ori modampasako pelengku hai miano kai tarimaa Sangkoleono Alata'ala. »
20 Sawali koie i Petrus namo'awaakono, « Masilaka'o koie doi'u ronga co'o, hinangkua po'awau kanahi, koie pompoweehino Apu Alla tewalio inoliako doi! 21 Nahina haku'u ronga nahina tarou hai larono die pohedoa, kana'umpe pelaroau nai mongkote hai ra'ino Apu Alla. 22 Boli'io bangu'u da mosa'o, yahopo kau amala mo'ita hai Apu kai ampunio koie patuduno pelaroau. 23 Ku'ontoo pelaroau kanamo ratu da mopa'i, ronga kinalimbutuno dosa. »
24 Yahopo kai kanahi koie Simon, « Mi'amalaakuo hai Apu, kai osie konaaku hapa da kanahimiu koie tonia. »
25 Sa'arindo koie i Petrus ronga i Yahya metulura ronga leleako haratiano Apu na'ico, kando pohule hai Yerusalem ronga me'aluo kampo hai wonua Samaria da tinealohindo dahando leleako Lele Mohende.
I Filipus mobaho miano Etiopia
26 Kai kanahi koie me'asa mala'ekati hai Filipus, « Pewangumo kau lako hai salata, dungku awaa sala da mebinta hai Yerusalem tii hai Gaza. » Koiemo sala da mongio. 27 Pewanguomo nde'e kai lako koie i Filipus, kai awaa me'asa miano Etiopia da ari lako sambahea hai Yerusalem. Koiemo miano da kopangkati montoe hai bolo rahano mokole, da atoro'akono'o pera inawano kandakeno wonua Etiopia (kandake batuano « mokole ntina »). 28 Diekana koie miano pohule'omo dahoo totoro hai bolo bendino, kai daa mobasa bokuno nabii Yesaya. 29 Yahopo Sangkoleono Apu kai tena'o i Filipus kanahi, « Lakomo okudahio koie bendi! »
30 Pekalulu'omo nde'e i Filipus rorodaa koie bendi ronga modeaho koie miano hi daa mobasa bokuno nabii Yesaya. Kai petukana, « Dakomiusi bara paha'o hapa koie da nibasamiu? »
31 Kai polawani, « Kana'umpe kaku daa nta paha'o, nasai hina miano da motisu'aku? » Yahopo kai titiaho i Filipus kai sabe, kando totoro merapa. 32 Di'iramo ayati da nibasano:
« Kai sininta ronga nta sinumbele kana me'asa domba,
ronga kana me'asa ana domba da mengio hi daa niguntiri wuluno,
kanamo na'ana koie miano nai hina gauno.
33 Laro pinoko'anu-anuano kai nirukusiako ngkonano.
Kai inotuhi penaano mebinta hai wita'ea.
Nangkuamo kasai hina miano da tule'i tuluraa leeno. »a
34 Kanahiomo koie miano Etiopia hai Filipus, « Dahaku nta metukana, kinaiho tekonaano die da ari niburino nabii, kina mekona hai wotoluno atawa hai suere miano? » 35 Koie ayati petampu'uano i Filipus tarangkaniakono'o dungku kai tuluraakono'o Lele Mohende mekona hai Yesus.
36-37 Dahiramo hai laa sala, kando dungku dahano e'e, kai kanahi koie miano Etiopia, « Ontoopo koie e'e! Hapapo da sai tewali kaku nibaho? » b
38 Yahopo koie miano Etiopia kai petena pokontodoo bendino, kando peronga metiihako hai e'e, yahopo i Filipus kai baho'o. 39 Sasabedomo mebinta hai bolo e'e, nilakonomo koie Sangkoleono Apu molaisako i Filipus. Koie miano Etiopia nai da'amo ontoo, sai-sainomo lako ronga mohende. 40 Sawali koie i Filipus sabaano hai Asdod. Kai lolako tealohio koie wonua moleleako Lele Mohende hai upu-upuo kampo dungku hai Kaisarea.