Opitu miano niruruki pasipolee da kadee-dee
6
1 Koie tempo, tetianiomo me'alu miano mparasaea, nasabaa pengungundo miano Yahudi da mpogau Yunani hai ira da mpogau Ibrani kanahindo, « Ko'ira ntina walumami nahina tilado hindo nte tinitila'ako tinoraako tapio oleo. »2 Nangkuamo koie, ko'ira da hopulu orua rasulu kompuluhiramo luwu miano mparasaea kando kanahi, « Nai moico kico te'o'ari leleako haratiano Apu Alla, tendenomo mompasipole tinoraako tapio oleo. 3 Nangkuamo koie, raro mpetilaku, mimporurukimo te'opitu miano hai comiu da telele moico ronga da kinuasaino Sangkoleono Apu ronga da motu'a mpinehawa, danta tinenamami pasipolehira ko'ira miano. 4 Kanamo koie kako to'ori meboboto mpelaroa larono amalaa ronga leleako haratiano Apu Alla. »
5 Da kanahindo ko'ira rasulu ndotarimaamo ko'ira miano me'alu, yahopo kando rurukihira, ko'iramo: i Stefanus da moroso imanino ronga kinuasaino Sangkoleono Alata'ala, i Filipus, i Prokhorus, i Nikanor, i Timon, i Parmenas, ronga i Nikolaus miano Antiokhia. Koie i Nikolaus na'iaa miano Yahudi, sawali nasumoo'omo menunu agama Yahudi. 6 Ko'ira miano da ari niruruki niwawahiramo hai ra'indo rasulu, kando dampasako pelendo hai wawo rapando ronga amalaakondo.
7 Haratiano Apu Alla samolu-moluenomo teleleakoano, ronga hai Yerusalem e'elenguahomo tetiani me'aluno miano mparasaea, kanapo ko'ira pua'ima pontompa pesomba me'aluomo da memparasaea.
Ni'adili'ano i Stefanus
8 Apu Alla ntaperano barakati'o koie i Stefanus ronga moweeho kuasa, nangkuamo kai poweweu peto'o tekangka da owose hai ra'indo miano me'alu. 9 Sawali ndona mesaba opi-opia miano Yahudi da mebinta hai laica sambahea'a da meneehako jema'a Libertini.a Ko'ira miano Yahudi pebintaando hai kota Kirene ronga Aleksandria. Ko'iramo ronga miano Yahudi da mpebinta hai wonua Kilikia ronga propinsi Asia da pekakahino i Stefanus, 10 sawali nasando nangi mandaraa nangkua Sangkoleono Apu da merongaa hi daa mogau.
11 Nangkuamo kando pewuwuniako pongaruhi'ira opi-opia miano danta kanahi, « Dakami modeaho koie i Stefanus hi daa paruruo nabii Musa ronga Apu Alla. »
12 Kanamo koie poweweundo, kai mosa'o larondo miano me'alu ronga ko'ira kamotu'a naamo guru agama, kando lako rako'o i Stefanus, kando wawaa mera'iako hai pongadila'eano agama. 13 Yahopo kando po'alaakono saksii ngkule da kanahi, « Niweweuno die miano te'iaasi paruruo die raha mpesombaa ronga Boku Parentano nabii Musa. 14 Aricami modeaho hi daa kanahi, ‹ Koie i Yesus miano Nazaret dahoo nta rowakio die raha mpesombaa, ronga boli'io atorato hi ari moweekita i Musa. › »
15 Luwundo da mentotoro na'ico hai pongadila'eano agama me'o'ontoo koie i Stefanus. Ra'ino i Stefanus koie tempo kanamo ra'ino mala'ekati.