I Ananias ronga i Safira
5
1 Dahoo miano da mesosamporando, da meneehako i Ananias ronga i Safira, da balu'o na'anda asa ntobu witado. 2 Kando pekosi mesosamotu'ando kando dioho asa ntilara olino koie wita kando osie to'orio miano meha, ronga asa ntilarano ndowawaa weehakondo'o rasulu. 3 Sawali i Petrus nangkanahi, « O Ananias, yo hapa koie pelaroau kai pewiso'io ponggawano bilisi, kau kulepio Sangkoleono Alata'ala, dioho asa ntilara olino wita'u? 4 Daaupo sai balu'o koie wita, na'iaa bara wita'u? Kau ari balu'o, na'iaa bara co'o da ko'apuako doino? Hapa kau pepatuduako nta moweweuhako kana koie? Na'iaa manusia da kinulepiu, sawali yahoo Apu Alla. »5 Sapodeaho koie i Ananias, tade-tadeno teleha ronga mo'otu penaano. Luwu miano da modeaho koie kadadia, taperando memomee. 6 Yahopo kando meleu ko'ira tora mongura mewaluo maeatino kando melemba'o lako koburuo.
7 Kira-kira otolu damu penda, kai pewiso samotu'ano i Ananias, sawali nai da'apo to'orio hapa da kadadia. 8 Kanahiomo i Petrus hai iaa, « Ndoka po'awaakuo, yahomo bara kanamo koie olino wita da ari nibalumiu? »
Polawaniomo koie i Safira, « Yahoo, menonaa. »
9 Kanahiomo i Petrus, « Hapa kami mpekosi oruakomiu nta soba-soba'o Sangkoleono Apu? Ontohirapo miano da ari lako lamoo samporau! Dahiramo mpentade hai wamba, ronga iramo danta lembako meluarako. »
10 Koiesi tempo kai teleha i Safira hai ra'ino i Petrus ronga mo'otu penaano. Tempondo mpewiso ko'ira tora mongura, ndo'awaamo hi matemo. Yahopo kando melemba'o ronga meluarako lako lamoo hai pampano samporano. 11 Luwu anggota jema'a ronga pera da modeaho koie kadadia ntaperando memomee.
Peto'o tinekangkaako
12 Me'aluo peto'o tinekangkaako da niweweundo ko'ira rasulu hai ra'indo miano me'alu. Luwu miano mparasaea sadiahira mentekongko mpe'asa mpelaroa hai patandeno i Sulaiman. 13 Nahina miano suere da moseka leu hela'ihira. Sawali taperando te'angga hai miano me'alu. 14 Samengka-mengkauno same'a-me'alundomo miano da parasaeaho Apu, mengkena tama ronga tina. 15 Tendenomo luwu koie da kadadia, kando wawahira miano morungku hai lembarano ronga hai empeno kando sabahako hai batatana, ki ehepo kai tealo i Petrus, kai da'a da konaa nunuano kando tido. 16 Kando mesosolo miano da mpebinta hai kampo da okudahio Yerusalem, leu mpowawa miano da morungku ronga da nilawuino setani, kando pinokontido luwundo.
Niluarakoando rasulu mebinta hai torungku
17 Lako-lako'omo koie pua'ima'ea ronga simbaudo, yahoo miano golonga Saduki, kando mesinggira'ea. 18 Nangkuamo kando lako rako'ira ko'ira rasulu, yahopo kando wiso'ira hai bolo ngkatorungku.
19 Sawali malono koie, naleuho me'asa mala'ekatino Apu ungkahio wambano katorungku, kai wawahira meluarako ronga kanahi, 20 « Milakomo hai uluano raha mpesombaa, kami leleako luwu haratia da mompokontora hai miano me'alu. »
21 Nilakodo nunu'o petenano koie mala'ekati, ronga komeanta kando lako hai uluano raha mpesombaa, yahopo kando mpetampu'u mompotisu na'ico.
Koiesi tempo koie pua'ima'ea ronga anabuano tena'ira anggota pongadila'eano agama, yahoo raro ngkamotu'ano to Israil, kando mentekongko, yahopo kando pepe'alahira ko'ira rasulu hai bolo ntorungku. 22 Sawali tempono ko'ira da tinena leu hai katorungku, nando awahiramo ko'ira rasulu kokeena. Dadi pohule'iramo mo'awaakondo kanahi, 23 « Dungkumami hai katorungku, koie wamba dahosi tetagili moi-moico ronga da mpodaga dahirasi mpodaga hai wamba, sawali kako ungkahio, nako po'awa te'asa miano hai larono. » 24 Sapodeaho koie ponggawando miano mparonda hai raha mpesombaa ronga raro ngkapala pua'ima, nilakodo banga-banga kando mpekapetukanai, hapa penda danta kadadia.
25 Sawali naleu me'asa miano awahira ronga mowawa lele kanahi, « Ontoopo nde'e, ko'ira miano da tinorungkumiu, diekana dahiramo hai uluano raha mpesombaa mompotisu miano me'alu. »
Rasulu hai ra'indo pongadila'eano agama, ronga oliwino Gamaliel
26 Kando lako koie ponggawa ronga anabuano da memparonda hai raha mpesombaa, kando alahira mbule ko'ira rasulu, sawali nando da'a hapai'ira, kana'umpe ndona momee te'iaamo ki watuihira miano me'alu. 27 Kando wawahira mera'iako hai pongadila'eano agama. Yahopo kai petukanaihira koie pua'ima'ea kanahi, 28 « Mokorakamimo tabekomiu kami osie mompotisu'ako koie nee. Sawali mi'ontoopo, pono'akoomo Yerusalem koie pompotisumiu, deenapo kanahimiu, icamimo danta dudunduo nimateakono koie miano. »
29 Sawali koie i Petrus ronga ko'ira rasulu meha ndona molawani kanahi, « Kola-kolaloo konunu'o parentano Apu Alla ka'iaa parentano to manusia. 30 Apu Alla Apuno mbueto ariomo pokompewanguo mbule i Yesus mebinta hai matea, da ari nibasiropamiu ronga pinopatemiu. 31 Iaamo da ari tinaarakono lima muanano Apu Alla kai tewali Ponggawa ronga Pompokosalama, kato to'ori memanda icita miano Israil ronga ni'ampuni. 32 Camimo die saksiino ko'ira luwu kadadia, cami ronga Sangkoleono Alata'ala da ari tinilariakono Apu Alla hai miano da nunu'o po'eheno. »
33 Sando podeaho ko'ira pongadila agama, nilakono te'u'uhu pelaroando ronga mepatudu nta popatehira ko'ira rasulu. 34 Sawali dahoo me'asa miano golonga Farisi da meneehako i Gamaliel, anggota pongadila'eano agama ronga guru agama da te'angga hai miano me'alu. Pentadeemo kai po'ita kando niluarako ko'ira rasulu te'asantonia. 35 Yahopo kai kanahi, « Raro mpetilaku miano Israil, mimpehawa'o kai moico, hapa nta poweweumiu di'ira miano. 36 Kana'umpe iponoha ario saba i Teudas, iaamo da mangaku hi daa pompokulaloino, ronga dahoo anabuano kira-kira pato etu miano. Sawali nampinopatesi ronga purahiramo luwuo anabuano mentekamburako. 37 Sa'arino koie, konaa nisensusando miano, nasabaa i Yudas miano Galilea, pongaruhi'ira miano me'alu kando memadalo. Sawali nampinopatesi na'ana ronga mentekamburako luwu anabuano. 38 Nangkuamo koie, ku'oliwicomiu, mi'osie hapai'ira di'ira miano, poturusihiramo! Kana'umpe kicua patudundo ronga niweweundo mebinta hai miano, matantuo dahira nta masilaka. 39 Sawali kicua mebinta hai Apu Alla, nami da'a nta tule'i nangihira. Aipo dahanomo nta mentoda hicuamo comiu da ta'oo Apu Alla. » Koie pe'oliwino i Gamaliel tinarimaa.
40 Kando boboihira ko'ira rasulu yahopo kando rorasaihira ronga tabe'ira mompotisu'ako neeno Yesus. Sa'arino koie yahopo kando tena'ira lako.
41 Ko'ira rasulu mpeluarakohiramo mebinta hai pongadila'eano agama, ronga memohende tendenomo hi angga'ira Apu Alla, hina pantasinoo hindo arimo pinoko'anu-anu tendenomo neeno Yesus. 42 Ronga tapio oleo, sadiahiramo mompotisu hai uluano raha mpesombaa naamo hai laicano miano, ronga leleako haratia dadaano i Yesus Mokole Pompokosalama.