I Petrus ronga i Yahya mera'iako hai pongadila'eano agama
4
1 Dahiramo konainoo koie i Petrus ronga i Yahya mpogau'akondo miano me'alu, kando tibo meleu pua'ima pontompa pesomba ronga ponggawando miano mparonda hai raha mpesombaa naamo miano golonga Saduki.a 2 Ko'ira miano taperano mosa'o larondo, tendenomo ko'ira rasulu da mompotisu'ako hindo daa nta mpewangu miano mate, kana koie i Yesus pewanguomo mebinta hai matea. 3 Nangkuamo koie, kando nirako meronga koie miano da pinokontido kando niwiso hai torungku dungku kai meanta, kana'umpe koie tempo maloomo. 4 Sawali ko'ira miano da ari modeaho koie pompotisudo, me'aluomo da parasaea. Koie tempo me'alundo miano da parasaea tetianiomo dungku kira-kira lima rewu.5 Sadumondonomo koie oleo, kando mengkongkosa ko'ira ponggawano miano Yahudi ronga raro ngkamotu'a ronga raro guru agama hai Yerusalem. 6 Medahiramo itai pua'ima'ea i Hanas, i Kayafas, i Yohanes ronga i Aleksander, naamo luwu miano da membue hai pua'ima'ea. 7 Yahopo ko'ira otolu miano kando niwawa mentade hai ra'indo, kando pinetukanai kanahi, « Kuasano inai atawa tendenomo neeno inai kami mpoweweuhako kana koie? »
8 Kai lawanihira koie i Petrus da kinuasaino Sangkoleono Alata'ala kanahi, « O comiu ponggawano miano Yahudi ronga raro miano motu'a, 9 yahomo bara kako daa pinaresa die oleo tendenomo hico daa montulumi die miano lungkuho kai tido? Dakomiu bara mokea to'orio kana'umpe die miano kai tido mbule? 10 Nangkuamo koie, paraluu'o kami nto'orio ronga luwu to Israil, hicua kai pentade die miano moroso hai ra'imiu, tendenomo neeno i Yesus Kristus miano Nazaret. Aricomiumo basiropaa, sawali Apu Alla nampotoraa mbule. 11 Koie Yesus yahomo
‹ watu da nibasiakomiu, comiu tuka,
da tewalimo watu mpompu'ui. › »b
12 Kai kanahi i Petrus, « Nahina nta po'awaa salama'a, mau hai nai, te'iaasi hai Yesus Kristus. Kana'umpe die tontono langi nahina suere nee dahanto nta salama. »
13 Sando ontoo koie i Petrus ronga i Yahya hindo moseka, ronga to'orio hicua miano biasa, nahina sicolado, mentekangkahiramo. Yahopo penda kando to'orio hicuamo ko'ira miano da nte perongano i Yesus. 14 Sawali ndona daasi ontoo koie miano da ari pinokontido dahosi mentade hai pampando, yahomo kasando to'ori kogau-gau. 15 Sa'arindo tena'ira meluarako mebinta hai pekara-kara'a, nampogau'ira kanahi, 16 « Hapa nta poweweunto ko'ira miano? Kana'umpe ndona nto'oriomo luwu mianono Yerusalem hindo ari mpoweweu tinekangkaako'ea, ronga da sai tule'i pinehapuinto. 17 Sawali kai osie mentala teleleakoano koie kadadia, moicoo kato tabe'ira ko'ira miano kando osie to'umo montetealohi koie nee. »
18 Yahopo kando boboihira mewiso mbule, kando tabe'ira kando osie to'u monenee atawa mompotisu'ako, mau hai nai, koie neeno i Yesus.
19 Sawali ndona molawani koie i Petrus ronga i Yahya kanahi, « Mi'otuhiomo pantamiu, maina da tekona hai ra'ino Apu Alla: nta menunu hai comiu atawa nta menunu hai Apu Alla. 20 Kana'umpe nako da'a sai nta gau'o hapa da ari inontomami ronga da ari pinodeamami. »
21 Samoko-mokorando tangkunaa'ira ko'ira rasulu, sawali ndona bintanihirasi. Nando po'awa sala nta hukuma'ira, hina luwuo miano reree'o Apu Alla tendenomo koie kadadia. 22 Kana'umpe koie miano da tidoako kadadia ntinekangkaako umuruno kolaloomo pato pulu ta'u.
Amalano miano mparasaea
23 Sapeluarakondomo koie i Petrus naamo i Yahya, kando lako awahira simbaudo ronga montuluraakondo pera da kanahindo ko'ira kapala pua'ima ronga raro ngkamotu'a. 24 Sando podeaho ko'ira simbaudo, nilakodo mempono-ponoha me'amala, « O Apua, Comiu da ari weweuho langi, wita, tahi, ronga pera ihino. 25 Aricomiumo koharatia kana da ari pinokodungkuno Sangkoleomiu hai atamiu i Daud pembue'amami kanahi:
‹ Yo hapa ko'ira suku suere kando daa mosa'o larondo,
ronga miano suere wonua kando mpepatudu moweweu da sai koguna?
26 Pentadehiramo ko'ira mokoleno wita'ea nta meta'o,
ronga raro ngka'owose mentekongkohiramo,
sadia nta ta'oo Apu ronga Mokole Pompokosalama da tinenano. ›c
27 Kana'umpe santo'u-to'uahano, die bolo ngkota arihiramo meboboto mokole Herodes,d Pontius Pilatus, ronga miano Israil naamo suku suere nta ta'oo i Yesus Atamiu da ari tinindahakomiu tewali Mokole Pompokosalama. 28 Pera da niweweundo yahoo da ari pinatantumiu meri'ou nunu'o patudumiu ronga kuasamiu. 29 Diekana, O Apua, Mi'ontoomo hindo daa tangkunaakami. Nangkuamo koie, pokomoseka to'ukami atamiu, kako leleako haratiamiu. 30 Popo'ontonicami kuasamiu da mompokontido, ronga mompokoda'a peto'o tinekangkaako mentete hai neeno i Yesus Ata ntinindahakomiu. »
31 Sa'arindo me'amala, namoleluo koie laica dahando mentekongko, ronga Sangkoleono Alata'ala kuasaihiramo luwundo kando moseka leleako haratiano Apu Alla.
Toraano miano mparasaea
32 Luwuo ko'ira miano mparasaea me'asa mpelaroa me'asa mpinehawa ronga nai te'asa da kanahi inawano yahoo anu mpantano, sawali luwuo da nidiondo anu mponohando. 33 Meronga kuasa da owose ko'ira rasulu ndoleleakomo hi torasi mbule koie Apu Yesus. Ronga owose'omo barakatino Apu Alla hi poweehira luwu miano mparasaea. 34 Yahomo kasai hina te'asa miano da kakuranga, kana'umpe pera miano da kowita atawa da kolaica ndona balu'omo kando wawaa koie doino, 35 kando dioho hai ra'indo ko'ira rasulu, kando titila'akondo'o tee-tee'asa miano kana da paraluudo.