I Petrus mokontidoo miano lungkuho
3
1 Dahoo me'asa oleo rora'io wotu sambahea'a yahoo tete otolu kiniwia, kando sabe i Petrus ronga i Yahya hai raha mpesombaa. 2 Kokeena dahoo me'asa tama da lungkuho sa'isono tehina, nangkuamo kai nibaba. Tapio oleo koie miano pinotoro hai pinewambano raha mpesombaa da meneehako Pinewamba Moico, nta mo'ita doi hai miano danta mpewiso hai uluano raha mpesombaa. 3 Tempono ontoo i Petrus ronga i Yahya nta mewiso, nilakono mo'ita doi. 4 Kando titiroo koie miano, yahopo i Petrus kai kanahi, « Ontokamipo! » 5 Pento'aamo koie miano ontohira, ronga mokea mo'awa hapa-hapa mebinta hai ira.6 Sawali i Petrus nangkanahi, « Wulaa ronga pera nahina hai aku, sawali hapa da hai aku kuweehako'o: Ronga neeno Yesus Kristus miano Nazaret, pentademo kau lolako! » 7 Koie i Petrus ungkaario lima muanano, yahopo kai taarako mentade. Koiesi tempo kai moroso karuno ronga bukuwaeano. 8 Koie miano lumoso'omo mentade ronga kolako-lako, yahopo kai nunu'ira mewiso hai uluano raha mpesombaa. Na'icomo dahano lulumoso ronga kontade-tade kai daa reree'o Apu Alla. 9 Luwu miano na'ico ndo'ontoomo hi daamo lolako kai daa reree'o Apu Alla. 10 Yahopo kando to'orio hicuamo iaa da nte totoro hai Pinewamba Moico hai raha pesombaa mo'ita doi, nangkuamo kando tekangka ronga banga-banga tendenomo koie kadadia.
Tinulurano i Petrus hai patandeno i Sulaiman
11 Nadaasi e'elengua koie miano nunutako me'ungkaa hai Petrus ronga hai Yahya, ko'ira miano me'alu mpekalulu'iramo leu ngkowuihira hai patandeno i Sulaiman. 12 Sa'ontohiramo nde'e koie i Petrus miano me'alu, kai kanahi, « Raro mpetilaku to Israil, yo hapa kami ntekangkaako die kadadia? Yo hapa kami daa o'ontokami? Ponto'orimiu bara, tendenomo kuasamami ronga pangkukumami hai Apu Alla, kai to'ori lolako die miano? 13 Apu Alla Apuno i Ibrahim, i Ishak, ronga i Yakub, Apuno mbue-mbueto, Iaamo da ari pa'angga'o Atano, koiemo i Yesus. Aricomiumo soroo kai pinopate, ronga nami ehee hai ra'ino gubernur Pilatus tempono otuhio nta bintaa. 14 Sawali nasami ehee koie miano ntekona da tinindahakono Apu Alla. Kami ehee miano mpompepate, kai bintaniakomiu'o i Pilatus. 15 Iaamo da tewali pu'uno toraaha kami mpepatee, sawali Apu Alla namokontoraa mbule mebinta hai raro miano mate, ronga icamimo die saksiino. 16 Tendenomo parasaea hai neeno koie i Yesus, koiemo nee da pokomorosoo die miano da inontomiu ronga da tino'orimiu; ronga koie parasaea yahomo da pokontidoo die miano hai ra'imiu.
17 Raro mpetilaku, diekana kuto'oriomo kami mpoweweuhako kana koie, nasami da'a to'orio hapa da niweweumiu, kanasi na'anda ponggawamiu. 18 Sawali kanamo koie Apu Alla kai pokomentoda'o haratia da ari pinokodungkudo raro nabii iponoha kanahi, koie Mokole Pompokosalama da ari tinenano dahoo nta pinokomarasai. 19 Nangkuamo koie, mintobamo ronga tegili nunu'o Apu Alla, kai inuwohi dosamiu. 20 Yahopo Apu kai daa nta moweekomiu wotu sanaa, ronga dahoo nta tena'o i Yesus kai leu, da ari pinatantuno tewali Mokole Pompokosalama. 21 Koie Mokole Pompokosalama nta poo'iahano hai suruga, tarimaa wotu nteboli'iano luwu da da'a kai tonia mbule, kana ari haratiano Apu Alla iponoha hai ira nabii da ari tinindahakono. 22 Kanahiomo nabii Musa, ‹ Apu Alla Apumiu nta montisu'akokomiu me'asa nabii mebinta hai sukumiu da kana i'aku; mimpodedeahomo luwu hapa da kanahino. 23 Ronga dahoo nta kadadia, luwu miano da sai modedeaho hapa da kanahino koie nabii dahoo nta sinincalako mebinta hai umatino Apu Alla ronga nta pinopate. ›a
24 Ronga luwu nabii da ari mpogau, metampu'u hai nabii Samuel dungku hai ira da mperumbui, da ari menigaudo yahoo mekona da kadadia diekana. 25 Comiumo nta merapio koie da pinokodungkudo raro nabii, ronga tilamiumo koie dandino Apu Alla hai ira mbuemiu kana haratiano hai Ibrahim: ‹ Tendenomo lee'u kando daa nta nibarakati luwuo suku die hai wita'ea. ›b 26 Dadi, nangkuamo Apu Alla kai rurukio Atano, yahoo i Yesus, kai tena'o leu meri'ou hai comiu, kai barakaticomiu ronga pokontegilicomiu luwumiu mebinta hai niweweumiu da mosa'o. »