Tuduano Sangkoleono Alata'ala
2
1 Sadungku'o koie oleo owose Pentakosta,a mentekongkohiramo ko'ira luwu miano mparasaea hai me'asa laica. 2 Kai tibo tudu da kana ruruno ngalu'ea mebinta hai langi kai poponotio upuo laica dahando mentotoro. 3 Kando me'ontoo langa api da ko'elo-elo tehawu kai tokaiho tee'asa miano. 4 Kuasaihiramo nde'e Sangkoleono Alata'ala, kando mpogau'ako pera giuno gau, nunu'o po'eheno.5 Koie tempo me'aluo miano Yahudi da konianto'u me'agama da mpoo'ia hai Yerusalem mpebinta hai luwu wonua hai wita'ea. 6 Tempondo modeaho ko'ira da mpogau, nilakodo mentekongko ko'ira miano me'alu. Kando mentekangka hindo podeaho da pogaudo ko'ira miano mparasaea yahoo gaudo pera da meda'a. 7 Mentebibinco'iramo ronga banga-banga nde'e kando mengkanahi, « Na'iaa bara di'ira luwu da mpogau miano Galilea? 8 Kana'umpe dakitasi pada mpodeahira hindo daa mpogau'ako gau hai kampoto? 9 Cita die miano da mpebinta hai wonua Partia, Media, Elam, Mesopotamia, Yudea ronga Kapadokia, Pontus ronga Asia, 10 Frigia ronga Pamfilia, Mesir ronga wonua Libia da okudahio kota Kirene, ronga cita da mpebinta hai Roma. 11 Dahoo miano Yahudi, dahoo penda suku suere pewiso'omo agama Yahudi, dahoo na'anta da leu mpebinta hai pulo Kreta ronga wonua Arab, luwunto modeahira mpogau'ako gauto. Dahira tuluraa niweweuno Apu Alla da tinekangkaako. » 12 Taperando mentekangka ronga mebanga-banga kando daa mpekatuka-tukanai, « Hapa batuano die kadadia? »
13 Sawali dahosi penda miano da la'u-la'uhira kanahi, « Dahira memolanguako angguru momami. »
I Petrus moleleako haratia
14 Yahopo kai pewangu mentade koie i Petrus ronga ko'ira rasulu meha da hopulu ka'asa, kai pekora mogau kanahi, « Raro mpetilaku miano Yahudi ronga comiu ihino kota Yerusalem, podedeaho moi-moico die danta kanahincu. 15 Di'ira miano nando da'a molangu kana da ponto'orimiu, kana'umpe diekana yahopo kai tete osio dumondo. 16 Sawali die kadadia kana da teburi hai bokuno nabii Yoel kanahi:
17 Kai koharatia Apu Alla,
‹ Dahoo nta kadadia oleo perumbui,
dahaku nta mokontuduo Sangkoleongku kuu-kuu'o luwu miano.
Ana ntamamiu ronga ana ntinamiu dahira nta mogau kana nabii.
Tora monguramiu dahira nta ontoo hapa hicu daa nta popo'ontonihira.
Raro miano motu'amiu dahira nta mpo'ipi.
18 Mau ko'ira atangku tama ronga tina,
dahaku nta tuduriakondo'o Sangkoleongku koie oleo,
kando mpogau kana nabii.
19 Dahaku nta mompokoda'a tinekangkaako hai langi
ronga tanda kuasangku hai wita'ea.
Dahoo nta da'a rea ronga api,
ronga ahu api molori da owose.
20 Oleo dahoo nta rondoma,
wotiti dahoo nta motaha kana rea,
yahopo kai leu koie oleo owose,
oleo kuasano Apu.
21 Ronga pera miano da me'e'etaako neeno Apu
dahoo nta pinokosalama. ›b
22 Raro mpetilaku miano Israil! Mimpodedeaho kupo'awaakokomiu: Koie i Yesus miano Nazaret yahomo hi ari Apu Alla montena'akokomiu ronga pokongkuasaa, kai poweweu peto'o tekangka ronga pokomentoda'akokomiu'o kuasano hai pada comiu, kana da tino'orimiu. 23 Nunu'o patuduno Apu Alla da meri'ou, koie i Yesus ariomo nisoro hai comiu, ronga aricomiumo boboto'akondo miano mosa'o, kami basiropaa ronga mpopatee. 24 Sawali Apu Alla namokontoraa mbule mebinta hai karasai matea, kana'umpe nahina oleono kai daa nta kuasaiho matea. 25 Kana'umpe ario kanahi i Daud:
‹ Dahakusi sadia ontoo Apu hai ra'incu,
nai molelu pelaroangku hina daasi mentade hai muanangku.
26 Yahomo kai mohende larongku, ronga moreree'ako elongku,
wotolungku dahoo nta moo'ia kai pomperahi-rahi.
27 Kana'umpe nami da'a, Apua, nta bintaaku hai wonuando raro miano mate,
ronga nami mpoturusio miano ntinindahakomiu kai lono.
28 Aricomiumo montisu'akuo sala da me'o'ala hai tora ngkaidaaha.
Dakomiu nta lolowukiakuo kahendepa hai ra'imiu. ›c
29 Raro mpetilaku, nahina miano da sai to'orio koie mbueto i Daud hi matemo, ariomo kinoburu ronga koburuno dahosi na'ai dungku diekana-kana. 30 Sawali koie i Daud yahoo nabii ronga to'orio hicua Apu Alla ari medandi'akono ronga mesumpa hi daa te'asa leeno danta totorokio kadera pomokole'ano.d 31 Nangkuamo koie i Daud kai peri'ou to'orio, ronga ariomo mogau mekona hai Mokole Pompokosalama hi daa nta mewangu kanahi: Nai da'a nta bintaa hai wonuando raro miano mate, ronga wotoluno nai da'a nta lono. 32 Koiemo i Yesus da ari pinotorano mbule Apu Alla mebinta hai matea, ronga luwumami aricamimo me'ontoo, yahomo kako tewalimo saksiino. 33 Kai taarako Apu Alla koie i Yesus, kai potoro'o hai muanano, ronga moweeho Sangkoleono, kana da ari pedandino Tamano. Koiemo Sangkoleono Alata'ala da pinokontuduno Apu Yesus hai cami, da inontomiu ronga da pinodeamiu die oleo.
34 Koie i Daud nai da'a moleka sabe hai suruga, sawali nangkanahi,
‹ Apu Alla koharatia hai Apungku,
35 « Totoromo hai muanangku,
dungku pera da daluko Kudiohira hai tonto karu'u. » ›e
36 Dadi, luwumiu miano Israil paraluu'eaho kami nto'ori to'uo hicuamo koie i Yesus da ari nibasiropamiu, sawali da tinisunomo Apu Alla tewali Apu ronga Mokole Pompokosalama. »
37 Sando podeaho koie, nante'ungkahio pelaroando ronga mpesosoori, yahopo kando mpetukanaiho i Petrus ronga ko'ira rasulu mehano, « O petilamami, hapamo nde'e nta niweweumami? »
38 Lawanihiramo koie i Petrus kanahi, « Mintobamo ronga milakomo mpepebaho'ako neeno Yesus Kristus, kai te'ampuni dosamiu, yahopo kami ntarimaa tilarimiu yahoo Sangkoleono Alata'ala. 39 Kana'umpe da ari pedandino Apu Alla yahomo tilamiu, ronga tilado soro-soro anamiu kai tii pera miano da mentala, yahoo tilado luwu miano da niboboino Apu Alla. »
40 Kanamo koie hi po'awaakondo i Petrus, ronga dahopo me'alu hi daa oliwihira ronga pokompehawa'ira kanahi, « Kimi ehe salama, mi'osie monunu da niweweundo di'ira miano mosa'o diekana. »
Tora-torando miano mparasaea
41 Ko'ira miano da parasaeamo da nigauno i Petrus nibaho'iramo. Koie oleo tetianihiramo kira-kira tolu rewu miano. 42 Taperando konianto'u mpepopotisu'ako pompotisuno rasulu ronga tekongko mpe'asa mpelaroa, tewawe roti mperonga-ronga naamo me'amala.
43 Me'aluo peto'o tekangka da niweweundo ko'ira rasulu, nangkuamo kando memomee ko'ira luwu miano. 44 Ko'ira luwu miano da parasaeamo sadia meboboto, ronga luwu inawando tewaliomo anu mponohando. 45 Dahira da mpobalu witado atawa hapa-hapando, yahopo kando titila'akondo'o luwu miano kana da pinaraluukino tee-tee'asa miano. 46 Tapio oleo sadiahira mentekongko me'asa mpelaroa hai uluano raha mpesombaa. Ronga mpegilira tewawe roti ronga mpongkaa mperonga-ronga hai laicando, memohende ronga mesawa mpelaroa, 47 kando daa mereree'o Apu Alla. Ko'ira miano mparasaea moico larondo hai luwu miano,f ronga tapio oleo Apu Alla tianio me'aluno miano da pinokosalama.