Tulurando Rasulu
Dandi nta leuhano Sangkoleono Alata'ala
1
1 O Teofilus,Ihino bokuku da meri'ou ku'ari moburiakoko yahoo pera da ari niweweuno ronga pompotisuno i Yesus isono metampu'u mohedo, 2 dungku kai moleka sabe hai suruga.a Nai da'apo moleka hai suruga, Sangkoleono Alata'ala motisu'o kai parentahira rasuluno ari nirurukino. 3 Hai iramo ariano mepopo'ontoniako wotoluno hi arimo marasai, ronga me'alu peto'o hi poweehira, buktiino hi toramo mbule. Kana'umpe pato pulupo oleo hi nte popo'ontonihira ronga mo'awaakondo dadaano pomparentaano Apu Alla. 4 Dahoo me'asa tempo daando mperonga mpongkaa, kai tabe'ira kanahi, « Mi'osie bintanio Yerusalem, sawali totarimaa manasaano pedandino Tamangku Ku'ari mo'awaakomiu meri'ou. 5 Kana'umpe i Yahya mobaho'ako e'e, sawali comiu, opia oleo danta leu dakomiu nta nibaho'ako Sangkoleono Alata'ala. »
Apu Yesus moleka sabe hai suruga
6 Tempondo ko'ira rasulu mempono-ponoha ronga i Yesus, kando mpetukanaiho, « O Apua, diemo bara tempono dahamiu nta pulesako mbule pomparentaano miano Israil? »b
7 Polawaniomo, « Nai paraluu kami nto'orio wotuno ronga tempono, kuasa mpantano Tamangku da patantuo. 8 Sawali comiu dakomiumo nta mo'awa kuasa ki tuduricomiu Sangkoleono Alata'ala, ronga nta tewali saksiicu hai Yerusalem, naamo upu-upuo Yudea ronga hai Samaria dungku hai asa tapuno wita. »
9 Sa'arino kanahi kana koie, taaramo hai suruga kando daa soso'ee dungku kai tongoo seru.
10 Dahirapo mpesoso'e hai langi, kai tibo mentade orua miano da mepakea mpila hai pampando, 11 ronga kanahi, « Hoo comiu miano Galilea, yo hapa kami daa mentade mesoso'e hai langi? Koie i Yesus da moleka hai suruga bintanicomiu, dahosi nta leu penda kana sabeno koie itonia hai suruga. »
Raro rasulu mpetotarima
12 Sa'arino koie, mpohule'iramo mbule ko'ira rasulu hai Yerusalem mebinta hai tangkeno Zaitun da kira-kira asa kilo mentalano.c 13 Sadungkudo hai Yerusalem, kando lako hai laica rua ntengka nte poo'iahando hai wawo. Ko'ira rasulu itonia yahomo: i Petrus ronga i Yahya, i Yakobus ronga i Andreas, i Filipus ronga i Tomas, i Bartolomeus ronga i Matius, i Yakobus anano i Alfeus, i Simon miano paratai Zelot,d ronga i Yudas anano i Yakobus.
14 Luwundo sadia meboboto mpelaroa ronga konianto'u me'amala. Koie i Maria tinano i Yesus naamo ko'ira opi-opia tina, ronga raro mpetilano i Yesus itaihiramo me'amala.
I Matias polilino i Yudas
15 Dahoo me'asa oleo kai pentade i Petrus hai tongado miano mparasaea da meda'a na'ico, kira-kira asa etu rua pulu miano me'alundo, kai kanahi, 16 « O raro mpetilaku! Hapa da teburi hai Boku Haratiano Apu Alla da ari pinokodungkuno Sangkoleono Alata'ala hai Daud nai tewali sai kadadia. Yahoo hapa da ari kadadia hai Yudas da wawaihira miano kando rako'o koie i Yesus. 17 Iponoha, koie i Yudas tewiso'o hai cita, ronga itaiho hai larono die pohedoa. »
18 Koie i Yudas ariomo alaa gadi sa'ono kai lako mo'oliako wita da asa ntobu. Yahopo kai tuuna tetapasako, kai tekawole tiano ronga te'uwu taritino kai mate. 19 Luwu miano hai Yerusalem ndoto'orio dadaano koie kadadia, nangkuamo kando neehakono'o koie wita « Hakal-Dama », gaudo miano Yahudi, batuano « Wita Rea ».
20 Kai kanahi penda i Petrus, « Kana'umpe dahoo teburi hai boku Mazmur kanahi,
‹ Kahioomo kai mongio poo'iahano,
te'asapo miano kai osie da'a. ›e
Dahoo penda da teburi,
‹ Kahioomo totoro'ano kai alaa suere miano. ›f
21 Nangkuamo koie, paraluu'o kai da'a popo'euno i Yudas te'asa miano, da niruruki mebinta hai ira da sadia mperonganto nimpia, tempono Apu Yesus merongakita, 22 metampu'u isono i Yahya mopobaho, dungku kai moleka Apu Yesus sabe hai suruga bintanicita. Koie miano da niruruki dahoo nta itaicita tewali saksii hi toramo mbule Apu Yesus. »
23 Kando pasadia'o orua miano yahoo: i Yusuf Barsabas da meneehako i Yustus, ronga i Matias. 24 Yahopo nde'e kando me'amala kanahi, « O Apua, Comiumo da to'orio ihi mpelaroano luwu miano, tisu'akami'o inai danta nirurukimiu die orua miano. 25 Koiemo danta tarimaa pohedoano rasulu da nibintanino i Yudas, nalakomo hai wonua nirurukino. » 26 Yahopo nde'e kando loterei'o koie orua miano, ronga da konaa loterei yahoo i Matias. Koiemo pontianindo ko'ira rasulu da hopulu ka'asa kando mengkoa mbule.