Raro ntina da bantu'o i Yesus
8
1 Nai da'a lembahi arino koie, kai lako koie i Yesus seserio kota ronga kampo da me'alu moleleako Lele Mohende dadaano pomparentaano Apu Alla. Ko'ira ana guruno da hopulu orua dahira itai, 2 kanapo opi-opiahira tina da ari pinokontidono i Yesus ronga da ari nilawuino setani. Ko'iramo: i Maria da nineehako Magdalena, da tidomo hi ari lawuiho setani da opitu, 3 i Yohana, samotu'ano i Khuza, ponggawano miano hai bolo rahano mokole Herodes, i Susana, ronga me'aluo tina meha. Ko'iramo tina da balandangiakondo'o kawasa mpantado koie i Yesus ronga ana guruno.Parereno miano da mohawu palongo
(Mat. 13:1-23; Mk. 4:1-20)
4 Satekongkondomo miano me'alu da sosolo mpebinta hai koa-koa'o kampo, kai pogau'akondo koie i Yesus mentete me'asa parere kanahi, 5 « Dahoo me'asa miano da lako mohawu palongono. Tempono mohawu, dahoo asa ntilara da tudu hai sala, kai lesa'o miano, ronga kaaho manu-manu dungku pura. 6 Asa ntilarano tudu hai wita monipi da hai wawo watu. Satumbuno nilakono moleu, nasai hina po'awaano e'e. 7 Asa ntilara penda tudu hai tonga ewo ngkoriu, kai tora itai koie ewo ngkoriu kaputio. 8 Ronga asa ntilarano tudu hai wawo wita molombi, kai tora kai kowua asa etu luku'a. » Sa'arino koharatia kana koie, kai pehou i Yesus kanahi, « Inai da koronge, kahioomo kai pompodedea! »
9 Kando mpetukanaiho ana guruno, « Hapa batuano koie parere? »
10 Kai lawanihira, « Aricomiumo pinoweehi barakati kami mpaha'o rahasia pomparentaano Apu Alla, sawali miano meha te'iaasi pinotisu mpenaako parere, kai:
‹ mau hindo ontoo nando ko'onto,
ronga mau hindo modeaho nando paha'o. ›a
11 Diemo batuano koie parere: yo palongo yahoo haratiano Apu Alla. 12 Tuduano palongo hai wiwi sala, yahoo miano da modedeaho haratiano Apu, yahopo kai leu ponggawano bilisi alaa koie haratia mebinta hai pelaroando, kando osie parasaea ronga salama. 13 Tuduano palongo hai wita monipi da hai wawo watu, yahoo miano da modeaho koie haratia, kando mohende tarimaa. Sawali nasai kohaka, parasaeando te'iaasi te'asantonia, ronga sa'awahira posoba-soba, nilakodo bintaa parasaeando. 14 Tuduano palongo hai tonga ewo ngkoriu kanamo miano da modeaho koie haratia, sawali da tinewereako, ronga kawasaa, naamo kahendepano wita'ea, koiemo da kaputio haratia kasai kowua'ako wua da ia-iaa. 15 Tuduano palongo hai wita molombi, yahoo miano da modeaho koie haratia, yahopo kando dioho hai bolo mpelaroando da moico ronga mongkote, kando mpetaha dungku kowua. »
Hulu da sinapeo'ako katoa
(Mk. 4:21-25)
16 « Nahina miano da montunu hulu kai sapeo'akono'o katoa, atawa dioho hai tonto tambi. Sawali na'ahurako, kando ontoo pera miano da mewiso koie niwincano. 17 Kana'umpe nahina da tewuniako da sai nta sinabahako, ronga nahina rahasia da sai nta tino'ori ronga teleleako. 18 Nangkuamo koie, pekiri to'uo kai moico hiu pompodedea, kana'umpe inai da modio dahoo nta tiniani, sawali inai da sai mompokodio, mau da te'ete da pinokodiono, dahoo nta inala mpiha. »
I Yesus ronga raro mpetilano
(Mat. 12:46-50; Mk. 3:31-35)
19 Yahopo kai leu tinano ronga raro mpetilano i Yesus nta mentepo'awaakono, sawali nasando tule'i okudahio hina me'alu miano. 20 Nangkuamo kando po'awaakono, « Tinamiu ronga raro mpetilamiu dahira hai luara, nta tepo'awaakokomiu. »
21 Sawali namolawani kanahi, « Miano da mpodedeaho haratiano Apu Alla ronga weweuho, ko'iramo tinangku ronga raro mpetilaku. »
I Yesus mokomontunduo ngalu'ea
(Mat. 8:23-27; Mk. 4:35-41)
22 Dahoo me'asa oleo, kai pe'ulea hai bangka koie i Yesus ronga ko'ira ana guruno, kai koharatia, « Mileumo kato pompole hai asa poleno tahi. » Kando pompole nde'e. 23 Dahiramo konainoo mpebangka, kai tekoturi koie i Yesus. Kai tibo terumpa ngalu'ea, kai pewiso e'e hai bolo bangkado, ronga te'etenopo kando masilaka.
24 Kando meleu ana guruno tuba'o i Yesus kanahi, « O ponggawa, o ponggawa, nta masilakakitamo! »
Kai pewangu nde'e i'ireiho koie ngalu ronga hembo da mokora, yahopo kai te'o'ari hembo, ronga ngalu montunduomo. 25 Kai petukanaihira, « Hapa kasami mparasaea? »
Kando memomee ronga tekangka, kando mpekapetukanai, « Naiho die miano, kai pokoparentaa hembo ronga ngalu, kai nunu'o po'eheno? »
I Yesus pokontidoo miano Gerasa da nilawuino setani
(Mat. 8:28-34; Mk. 5:1-20)
26 Kando mpebangka koie i Yesus ronga ana guruno dungku hai wonuando miano Gerasa da hai asa poleno wonua Galilea. 27 Sapewuatakono i Yesus hai wita, naleuho awaa me'asa tama mebinta koie hai kampo, da nilawuino setani da me'alu. Lembahiomo sai mompodai ronga nai poo'iamo hai bolo laica, sawali poo'iahano hai raro ngkoburu. 28 Tempono ontoo koie i Yesus, nilakono mogora ronga tedangkawako hai ra'ino kai kanahi, « Hapa nta poweweuu i'aku, o Yesus Anano Apu Alla da nireree montoe? Po'itaaku kau osie pakaseahaku! » 29 Kai pogau kana koie, hina daamo i Yesus parentaa koie setani kai peluarako bintanio koie miano. Kana'umpe koie setani manturu'omo nte kuasaiho. Yahomo kai nirante limano, ronga nilangke karuno, naamo nidagai. Sawali sadiahosi mokotatakio ko'ira luwu da pepungono, yahopo kai wawaa koie setani hai lueno dahano mongio.
30 Kai petukanaiho koie i Yesus, « Inaiho neeu? »
Polawaniomo, « Batalio, »b hina me'alu setani da lawuiho. 31 Yahomo ko'ira setani kando mpo'ita to'u, kai osie i Yesus tilahira hai bolo lia da dungku hai puri wita.
32 Nai da'a mentala mebinta na'ico, dahoo asa lunu'ea wawi da mpehumbe hai wawo ngkabumbu, yahomo ko'ira setani kando mpo'ita to'u hai Yesus, kai wukahi'ira kando mpewiso keena. Kai wukahi'ira nde'e. 33 Nilakodomo ko'ira setani mpeluarako bintanio koie miano, kando raa mpewiso koie hai wawi lunu. Yahopo ko'ira wawi da asa lunu kando mpolai mperoroako hai laa meli, kando mpetaburako hai bolo ntahi kando memate molomo.
34 Sando ontoomo hapa da kadadia ko'ira da mpodaga wawi, mpolaihiramo mpontuluraakondo miano hai kota ronga hai kampo da peka'okudahino. 35 Kando mpeluarako ko'ira miano nta ontoo hapa da kadadia. Sadungkudo hai Yesus, kando awaa koie miano da nibintanino setani hi daa totoro hai karuno, pompodai'omo ronga moicoomo pineehawano. Nangkuamo kando memomee. 36 Ko'ira miano da ari ontoakono'o matando hapa da kadadia ndotuluraakondo'omo miano dadaano koie miano da nilawuino setani hi tidomo. 37 Yahopo luwu mianono koie wonua Gerasa kando mpo'ita hai Yesus kai bintanihira, hindona momee to'u. Nangkuamo kai pe'ulea hai bangka, kando mempohule. 38 Koie miano da ari nilawuino setani po'ita to'uomo hai Yesus ki daa nta tewali kai penunu. Sawali nantena'o mohule kanahi, 39 « Pohulemo hai laicau ronga tuluraakondo'o luwu da ari poweweuno Apu Alla co'o. » Kai pohule nde'e, kai tuluraa hapa da ari poweweuno Yesus iaa dungku upuo koie kota.
Ana ntinano i Yairus ronga tina da konaa rungku ntinano
(Mat. 9:18-26; Mk. 5:21-43)
40 Sapohuleno mbule koie i Yesus, me'aluo miano da lawatio, ndona daa mpetotarima nta leuhano. 41 Kai leu me'asa tama da meneehako i Yairus, powawaino laica sambahea'a, kai pedangkawako sudu hai pu'u ngkaruno i Yesus. Kai pe'e'eta ki daasi tewali leu hai laicano, 42 kana'umpe ana ntina nte'iaano, da umuruno kira-kira hopulu orua ta'u, te'etenomo kai mate.
Tempono me'o'ala hai laicano Yairus, me'aluo miano da mpekadisi-disi. 43 Dahoo me'asa tina da hopulumo orua ta'u morungku'ako sara ntinano, [da ari pupuraa inawano meroohako hai dotoro,] sawali nahina da mokontidoo. 44 Kai perumbui hai bungkuno i Yesus okudahio, kai hedoo porambui babuno. Koiesi wotu kai te'o'ari rungkuno.
45 Kai petukana i Yesus, « Inai da hedoaku? »
Luwu miano mpehapuiho, kai kanahi i Petrus, « O ponggawa, me'aluo miano da lilicukomiu ronga disicomiu. »
46 Sawali i Yesus nangkoharatia, « Dahoo miano da hedoaku, kana'umpe pomperasaku dahoo kuasa da meluarako. »
47 Sato'orio koie tina hi tino'orimo da niweweuno, bibi'omo ronga momee kai leu tedangkawako hai ra'ino i Yesus. Kai tuluraakondo'o miano me'alu hapa sababuno kai hedoo, ronga kai tido larono koiesi wotu. 48 Yahopo koie i Yesus kai koharatia, « O anaku, parasaeau da mokontidoko. Lakomo ronga momapu larou. »
49 Dahopo i Yesus mogau, leuhomo me'asa miano mebinta hai laicano powawai laica sambahea'a kai kanahi, « Anamiu mateemo, osiemo pokomasusa'o guru. »
50 Sawali i Yesus nampodeaho, kai koharatia hai Yairus, « Osie momee, podo kau parasaea, ana'u dahoo nta salama. »
51 Sadungkuno hai laicano i Yairus, koie i Yesus nai wukahi'ira te'asapo miano kai pewiso meronga, tabeano i Petrus, i Yahya, i Yakobus, ronga tamano tinano koie anadalo. 52 Luwundo ko'ira miano dahira mpewowo ronga mperurumateiho koie anadalo, sawali nangkoharatia i Yesus, « Mi'osie mpewowo, nai da'a mate, sawali dahoo moturi. »
53 Sawali ndona mpetotaahio, kana'umpe ndona nto'orio hi matemo. 54 Yahopo i Yesus kai ungkaario limano koie anadalo kai kanahi, « O anaku, pe'engkamo! » 55 Pohule'omo penaano nilakono me'engka. Kai tena'ira i Yesus kando poweeho mongkaa. 56 Tamano ronga tinano taperando tekangka, sawali i Yesus nantabe'ira kando osie montulura koie da ari kadadia, mau hai nai.