Petukana dadaano oleo mpekolia
(Mat. 12:1-8; Mk. 2:23-28)
6
1 Konaa me'asa oleo, yahoo oleo mpekolia, kai lako koie i Yesus montealohi uma mpae gandum, yahopo ko'ira ana guruno kando mpompuruhi koie wuano gandum, kando wiwokio ronga mpongkaa. 2 Sawali opi-opia miano golonga Farisi mengkanahi, « Yo hapa kami mpoweweuhako da upali konaa oleo mpekolia? »a3 Kai polawani koie i Yesus kanahi, « Nami mpaisa bara basaa hapa da niweweuno koie i Daud, tempono mokohuloo ronga ko'ira salakono, 4 kai pewiso hai laica mpesombaa, kai alaa roti da arimo pinesombaako, kai pongkaa ronga moweehira salakono? Mainapo koie roti nai tewali kinaa tabeano pera pua'ima. » b 5 Kai koharatia penda koie i Yesus, « Ana Nto Manusia yahoo Apuno oleo mpekolia. »
I Yesus mompokontido konaa oleo mpekolia
(Mat. 12:9-14; Mk. 3:1-6)
6 Konaa oleo mpekolia meha, kai sumoo koie i Yesus hai laica sambahea'a kai pompotisu. Kokeena dahoo me'asa miano da mate lima muanano. 7 Ko'ira guru agama ronga miano golonga Farisi o'ontoo i Yesus, ki lako mompokontido miano konaa oleo mpekolia, kando to'ori pasala'o. 8 Sawali nanto'oriosi da patudundo, kai koharatia koie hai miano da mate limano, « Pe'engkamo, kau leu mentade hai tonga! » Kai pe'engka nde'e koie miano, kai pentade kokeena.
9 Yahopo i Yesus kai petukanaihira, « Dahaku nta metukanaicomiu, maina da tewali niweweu hi konaa oleo mpekolia, moweweu da moico, atawa da mosa'o, montulumi miano kai tora, atawa mompokomasilaka? » 10 Sa'arino o'ontohira luwuo miano da lilicu'o, yahopo kai tena'o koie miano, « Pengkaemo! » Kai pengkae nde'e, nilakono tido limano. 11 Sawali ko'ira guru agama ronga miano golonga Farisi nahina mpiha pompahado, c nangkuamo kando mpogau ki kana'umpe nta poweweundo koie i Yesus.
I Yesus moruruki hopulu orua rasuluno
(Mat. 10:1-4; Mk. 3:13-19)
12 Koie wotu lako'omo koie i Yesus hai me'asa kabumbu nta amala. Kokeenamo amalaano tuntu alo hai Apu Alla. 13 Sameantanomo, kai boboihira ana guruno, yahopo kai poruruki hopulu orua miano da nineehakono rasulu. 14 Ko'iramo: i Simon da nineehako i Petrus, ronga i Andreas petilano i Simon, i Yakobus ronga i Yahya, i Filipus ronga i Bartolomeus, 15 i Matius ronga i Tomas, i Yakobus anano i Alfeus, i Simon da nineehako miano paratai Zelot,d 16 i Yudas anano i Yakobus, ronga i Yudas Iskariot, da ari soroakondo'o pedaluno i Yesus.
I Yesus mompotisu ronga mompokontido miano
(Mat. 4:23-25)
17 Kai ponguli i Yesus merongahira rasuluno da ari nirurukino, kando mentodo dahano morete. Kokeena me'aluo ana guruno suere da tekongko, ronga me'aluo suere miano da meleu mpebinta hai upuo wonua Yudea, hai Yerusalem, naamo da mpebinta hai wonua kota Tirus ronga Sidon da hai wiwi ntahi. 18 Kando meleu nta modedeaho i Yesus, ronga kai pinokontido rungkudo. Ko'ira miano da nilawuino setani leuhiramo na'anda ronga pinokontido. 19 Luwundo ko'ira miano me'alu mokeahira hedoo i Yesus, kana'umpe nadaa kuasano da meluarako mebinta hai wotoluno da mokontidohira luwu miano.
Pu'uno tuara ronga silaka
(Mat. 5:1-12)
20 Yahopo i Yesus kai o'ontohira ana guruno kai koharatia,
« Konantuarakomiu da mengkadee-dee,
kana'umpe comiumo da ko'apuako pomparentaano Apu Alla.
21 Konantuarakomiu da memokohuloo,
kana'umpe dakomiumo nta niwowohiti.
Konantuarakomiu da konainoo mpewowo,
kana'umpe dakomiumo nta mpekasio.
22 Konantuarakomiu, ki kokoleakomiu miano tendenomo himi nunu'o Ana Nto Manusia, kindo saaricomiu, anu-anu ngkabariakomiu, ronga anggakomiu miano mosa'o. 23 Mimohendemo koie wotu ronga mehawamo, kana'umpe santo'u-to'uno, owose'o tilarimiu hai suruga; kana'umpe kanasi na'anda pembue'ando ari poweweundo ko'ira nabii iponoha.
24 Sawali masilakakomiu da mengkawasa,
kana'umpe aricomiumo tarimaa polilimboimiu.
25 Masilakakomiu da mowohi diekana,
kana'umpe dakomiumo nta mokohuloo.
Masilakakomiu da mpekasio diekana,
kana'umpe dakomiumo nta mepoe-poe laro ronga mewowo.
26 Masilakakomiu ki rereekomiu luwu miano,
kana'umpe kanasi na'anda pembue'ando poweweundo ko'ira kanabi-nabii. »
Lolaroo pedalumiu
(Mat. 5:38-48)
27 « Sawali comiu da modedeahaku, Kupo'awaakokomiu: Milolarohira pedalumiu; weweuho kai moico miano da kokoleakomiu. 28 Po'itaakondo barakati miano da tundaricomiu; amalaakondo miano da weweu sa'okomiu. 29 Inai da tapa'o kompisiu da me'asa, gilisakoakono'o asa pampa. Ronga inai da alaa babu mokula'u, kahioomo kai alaa ronga babuu. 30 Poweeho pera miano da mo'itaico. Ronga osiemo mo'itaa mbule hai miano da ari mo'ala anuu. 31 Kana da po'ehemiu kindo weweuhakokomiu'o miano, miweweuhakondo'omo na'anda.
32 Kimi pololaro miano da lolarokomiu, hapa nta pereree'amiu? Kana'umpe ko'ira miano ngkodosa pololarohirasi na'anda miano da lolarohira. 33 Kana'umpe kimi mpoweweu da moico te'iaasi hai miano da weweu moicokomiu, hapa nta tereree'amiu? Pera miano ngkodosa kanasi na'anda koie poweweundo. 34 Ronga kimi mpompokoposaru doi te'iaasi hai miano da pinekirimiu dahoo nta mokompohule'o, hapa nta pereree'amiu? Ko'ira miano ngkodosa na'anda mompasaru'irasi pada-pada'ira, kando to'ori tarimaa mbule kana me'aluno. 35 Sawali icomiu, milolarohiramo pedalumiu ronga weweu moicohira. Pasaru'iramo, sawali osie momperahi-rahi wolohino. Dahomo nta owose pahalamiu ronga dakomiumo nta tewali anano Apu Alla da pina'angga, kana'umpe Apu Alla moicoo pelaroano hai miano da sai ehe montarimakasi ronga hai miano mosa'o. 36 Kahioomo kami ngkopololaro, kana Tamamiu da kopololaro. »
Mo'otuhi kara-kara
(Mat. 7:1-5)
37 « Mi'osie mo'otuhi tesalano miano, kai osie saru Apu Alla otuhio tesalamiu. Mi'osie hukumaa miano, kami osie nihukuma. Mi'ampunio miano, kami inampuni saru na'amiu. 38 Mimpoweehira miano, kai poweekomiusi saru Apu Alla. Dakomiumo nta montarima kolalo me'alu da arimo niganta mabumbu, nilelu kai modaso, pono ntelia, kai sinolorako hai inampuhamiu. Kana'umpe da ari pogantamiu suere miano, yahomo koie nta pogantano Apu Alla comiu. »
39 Kai pomparereakondo koie i Yesus kanahi, « Tule'io bara me'asa miano mopusu sinta'o simbau mopusuno? Nando da'a bara nta tuuna hai bolo orua'ira? 40 Me'asa ana guru nai pompokulaloi ka'iaa guruno, sawali inai da tamamo mesicola nta mengkenaamo guruno.
41 Yo hapa kau ontoomo puli da hai matano petila'u, sawali balo da hai bolo matau nau da'a padulio? 42 Kana'umpemo kau daa nta kanahi, ‹ O petilaku, kahioomo kaku sicu'akoko'o puliu, › mainakaa koie balo da hai matau nau da'a ontoo? Hoo co'o miano da mompe'anu-anuto'u, oninio isala koie balo da hai bolo matau, yahopo kau daa nta to'ori ko'onto moico, kau tule'i sicu'akono'o pulino petila'u. »
Pu'uno ronga wuano
(Mat. 7:16-20; 12:33-35)
43 « Nahina pu'u ngkeu da moico nta kowua'ako da mosa'o, ronga nahina pu'u ngkeu da mosa'o nta kowua'ako da moico. 44 Kana'umpe mebinta hai wuano kai tino'ori koie keu. Kana'umpe nahina da to'ori mo'upu wua ara atawa angguru mebinta hai ewo ngkoriu. 45 Miano moico moluarako da moico mebinta hai ihi mpelaroano da moico; miano mosa'o moluarako da mosa'o mebinta hai ihi mpelaroano da mosa'o. Kana'umpe da pogauno mebinta hai pelaroano. »
Tuka laica da mandara ronga da pore
(Mat. 7:24-27)
46 « Hapa kami mpe'e'etaaku kanahi, ‹ Apua, Apua, › sawali nasami da'a weweuho hapa da kanahincu? 47 Pera miano da leu hai Aku, da modedeaho haratiaku ronga weweuho, dahaku nta mo'awaakokomiu hapa nta pengkenano. 48 Kanamo me'asa miano da mompotade laica. Koie miano mekekei kai olaro, kai dioho pondasino hai wawo watu. Sa'e'e waano kai konaa koie laica, nai tule'i telelu, hina modoro to'u pinotoro'ano. 49 Sawali da modeaho haratiaku kasai weweuho, pengkenaamo miano da mompotade laica da sai hina pondasino. Ki konaa e'e waa koie laica, nilakono terowa, ronga ntaperano hancuru. »