Isono i Yesus moboboi ana guruno
(Mat. 4:18-22; Mk. 1:16-20)
5
1 Konaa me'asa tempo kai pentade koie i Yesus hai wiwi ntahi Genesaret,a kando leu miano me'alu libuo nta mompodedea haratiano Apu Alla. 2 Kai ontoo orua bangka da soremo hai wiwi ntahi. Ko'ira ntei bangka mentiihiramo ronga tatapio pukado. 3 Kai pewuatako koie i Yesus hai me'asa bangka, yahoo bangkano i Simon, kai tena'o soro'ote'o mebinta hai wiwi ntahi. Yahopo kai totoro hai wawo bangka kai potisu'ira miano me'alu. 4 Sa'arino mompotisu, kai tena'o i Simon kanahi, « Pobosemo dahano olaro, kami basiako pukamiu kami mporako ica. »
5 Kai polawani i Simon, « O ponggawa, tuntu alokamimo mohedo mobea, nahinasi inawamami. Sawali nangkua Comiu da metena, dahakumo nta tiihako penda pukamami. »
6 Sa'arindomo nde'e weweuho kana da petenano, namo'awahira ica da me'alu to'u, yahomo kai pontampu'u tehia pukado. 7 Nangkuamo koie, kando kawetihira mo'ita tulu hai simbaudo apuno koie bangka ko'orua. Saleundomo ko'ira simbaudo, kando ihianio koie orua'o bangkado dungku kai pono'ako ica, te'etenopo kai tondu.
8 Sa'ontoomo i Simon Petrus koie da kadadia, nasudu'o hai ra'ino i Yesus kai kanahi, « Apua, Mi'osie okudahiaku, kana'umpe i'aku die miano ngkodosa. » 9 Kana'umpe i Simon ronga luwu simbauno mentekangkahiramo tende me'aluno ko'ira ica da pinokorakodo. 10 Kanasi na'ana i Yakobus ronga i Yahya, anano i Zebedeus, simbau mpohedono i Simon.
Koharatia'omo koie i Yesus hai Simon, « Osie momee, metampu'u diekana, na'iaamo ica danta inu'ungkemiu, sawali mianomo. » 11 Sa'arindo soroo bangkado hai wita, ndobintaamo luwu hapa-hapando, kando nunu'o i Yesus.
I Yesus mompokontido miano da kokulidaa
(Mat. 8:1-4; Mk. 1:40-45)
12 Konaa me'asa oleo, daano koie i Yesus hai me'asa kampo, dahoo me'asa miano da pono'ako kulidaa. Sa'ontoo i Yesus, nilakono koie miano sudu kai po'ita, « Apua, kimi ehe, dakomiumo nta pokontidoaku. »
13 Yahopo koie i Yesus kai pengkae hedoo ronga kanahi, « Po'ehengku, kau tidomo! » Koiesi wotu kai isa rungkuno.
14 Yahopo i Yesus kai tabe'o koie miano kanahi, « Osie montuluraakono, mau hai nai, sawali lakomo popo'ontoniakono'o wotoluu pua'ima, ronga montompa pesombau peto'ono hiu tidomo, kana parentano nabii Musa, b kai menteendoo miano me'alu hiu tidomo. »
15 Sawali leleno i Yesus samolu-moluenomo teleleakoano, ronga miano mengkokantulu'iramo meleu nta modedeaho ronga nta meperooho rungkudo. 16 Sawali koie i Yesus nante mesuahako dahano mongio kai amala.
I Yesus mompokontido miano lungkuho
(Mat. 9:1-8; Mk. 2:1-12)
17 Konaa me'asa oleo daano i Yesus mompotisu, dahira totoro modeaho ko'ira miano golonga Farisi ronga guru agama da meleu mpebinta hai luwu kampo hai Galilea ronga Yudea kai tii mebinta hai Yerusalem. Kuasano Apu da merongaa, kai pompokontido miano morungku. 18 Kando leu opi-opia miano mowawa me'asa miano lungkuho da leleha hai lembara. Ndotandaiho mewiso hai laica nta pokolelehaa hai ra'ino i Yesus. 19 Sawali nasando tule'i wawaa mewiso hina me'alu miano, kando sabe hai wawo ato, kando bolokio koie ato,c yahopo kando ruruhaa koie miano meronga poturiano hai tongano miano me'alu hai ra'ino i Yesus.
20 Sa'ontoo koie i Yesus imanindo ko'ira miano, kai koharatia, « O petila, te'ampuniomo dosau. »
21 Ko'ira guru agama ronga miano golonga Farisi mpontampu'uhiramo mpetukana hai larondo, « Naiho die miano da paruruo Apu Alla? Inai da tule'i mo'ampuni dosa ki sa'iaa pantano Apu Alla? »
22 Sawali koie i Yesus nanto'orio da pekirindo, yahomo kai koharatia, « Hapa kami daa mpetukana hai laromiu kana koie? 23 Maina da kolalo mobuna: kanahi, ‹ Te'ampuniomo dosau, › atawa kanahi, ‹ Pewangumo ronga lolakomo ›? 24 Sawali diekana kami nto'orio hi makuasa Ana Nto Manusia mo'ampuni dosa hai wita'ea, dahakumo nta pokomentoda'akomiu'o. » Yahomo kai tena'o koie miano lungkuho kanahi, « Pe'engkamo, alaa poturiau ronga pohulemo hai laicau! » 25 Nilakono mewangu hai ra'indo miano me'alu, yahopo kai alaa poturiano, kai pohule hai laicano kai daa poko'owose'o Apu Alla.
26 Luwuo ko'ira miano taperando mentekangka ronga momee. Nangkuamo kando reree'o Apu Alla ronga kanahi, « Die oleo to'ontoomo kadadia da tinekangkaako. »
I Lewi pontagi sima nunu'o i Yesus
(Mat. 9:9-13; Mk. 2:13-17)
27 Tempono i Yesus meluarako, kai ontoo me'asa miano mpontagi sima da meneehako i Lewi, da totoro hai kantori mpowada'a sima, kai kanahi, « Leumo nunu'aku! » 28 Nilakono nde'e mewangu bintaa luwu hapa-hapano, yahopo kai nunu'o.
29 Sa'arino koie, kai pompokoda'a ndo'ua da owose hai laicano Lewi nta pa'angga'o i Yesus, ronga me'aluo miano pontagi sima naamo miano meha da perongano mpongkaa. 30 Ko'ira miano golonga Farisi ronga guru agama mpengungu hai ana guruno i Yesus kanahi, « Hapa kami mpongkaa ronga mpondo'u merongaakondo miano pontagi sima ronga miano maradosa? »d
31 Yahopo i Yesus kai lawanihira kanahi, « Na'iaa miano ntido da paraluu dotoro, sawali yahoo miano morungku. 32 Kaku leu naku da'a nta moboboi miano da tekona niweweundo, sawali miano ngkodosa, kando memanda. »
Dadaano poasa
(Mat. 9:14-17; Mk. 2:18-22)
33 Ko'ira ponggawano miano Yahudi kanahi'iramo penda hai Yesus, « Ana guruno i Yahya sadiahira mempoasa ronga sambahea, kanamo na'anda ana gurudo miano Farisi, sawali ana gurumiu mpongkaa ronga mpondo'u. »
34 Kai lawanihira i Yesus, « Tewalio bara ko'ira miano mpendo'ua tinena poasa, hi daapo merongahira tama niwawa? 35 Sawali dahosi nta leu tempono, dahano nta inala tama niwawa, yahopo nde'e dahando nta mempoasa. »
36 Yahopo i Yesus kai tuluraakondo'o me'asa parere, « Nahina miano da hia'o sibi sawu mebinta hai babu ntonia kai tompiliakono'o babu mengkau. Kicana koie, da tonia dahoo nta tehia, ronga koie pontompili da tonia nai da'a nta coco hai babu da lembahimo. 37 Kanamo na'ana, nahina miano da mosali angguru tonia hai po'uleaha baula mengkau. Kana'umpe kicana koie, angguru tonia koie nta wotuiho koie po'uleaha, ronga angguruno dahoo nta te'uwusako, ronga po'uleahano nta mosa'o.e 38 Dadi, angguru da tonia nta sinaliano hai pe'uleahano da tonia na'ana. 39 Nahina te'asa miano, ki arimo mondo'u angguru lembahi, da mokeapo nta mondo'u angguru da tonia, kana'umpe dahoo nta kanahi, ‹ Angguru da mengkau koie moicoo. › »f