Pompotisuno i Yesus hai wawo ngkabumbu
(Pasala 5-7)
Pu'uno tuara
(Luk. 6:20-23)
5
1 Sa'ontohiramo koie i Yesus miano me'alu, nilakonomo sabe hai wawo ngkabumbu. Satotoronomo kando meleu okudahio ana guruno,a 2 yahopo kai petampu'u motisu'ira.3 « Konantuarahira miano da kadee-dee hai ra'ino Apu Alla,b kana'umpe iramo da tewali umati hai laro pomparentaano Apuno suruga.
4 Konantuarahira miano da mepoe-poe laro, kana'umpe iramo danta nililimboino Apu Alla.
5 Konantuarahira miano da owawa larondo, kana'umpe iramo danta awaa tilari die hai wita'ea.
6 Konantuarahira miano da moko'au ronga mokea moweweu da po'eheno Apu, kana'umpe Apu Alla dahoo nta mokomentoda'akondo'o da pinokeahakondo.
7 Konantuarahira miano da kopololaro, kana'umpe iramo danta awaa pololaro.
8 Konantuarahira miano da molino pelaroando, kana'umpe iramo danta ontoo Apu Alla.
9 Konantuarahira da mompokote miano, kana'umpe iramo danta nineehako anano Apu Alla.
10 Konantuarahira miano da pinakasea tendenomo moweweu da po'eheno Apu Alla, kana'umpe iramo da tewali umati hai laro pomparentaano Apuno suruga. 11 Konantuarakomiu kindo anu-anu ngkabariakomiu ronga pakaseakomiu tendenomo himi nunu'aku, kanapo kindo pontumbu'akomiu pera da mosa'o. 12 Mimohendemo ronga mehawa, kana'umpe owose'o tilarimiu hai suruga, kanasi na'anda nabii mperi'ou ari mempinakasea. »
Tahi ronga huluno wita'ea
(Mk. 9:50; Luk. 14:34-35)
13 « Comiumo tahino wita'ea. Ki motewemo koie tahi, yo hapa nta pompokomo'ahino mbule? Nahinamo nta gunano, nta te'iaamo nibasiako kai nilesa-lesa. 14 Comiumo huluno wita'ea. Kampo da hai wawo tangkeno nai tule'i nta tewuniako. 15 Nahina miano da ari montunu hulu, yahopo kai sapeo'akono'o be'u, sawali na'ahurako kai molinyaa luwuo miano da hai bolo laica. 16 Kahioomo kai kana koie lolangano hulumiu hai ra'indo miano, kando ontoo bangumiu da moico ronga reree'o Tamamiu da hai suruga. »
I Yesus pokomondo'o parentano i Musa
17 « Mi'osie kanahi dahaku leu popatee parentano i Musa ronga pompotisudo pera nabii. Naku da'a leu popatee, sawali dahaku leu tewali pepokomondo'ano. 18 Kana'umpe santo'u-to'uahano Kupo'awaakokomiu: Dungku kai lono langi ronga wita'ea, te'asa horopu atawa te'asa dore nahina danta inonini mebinta hai Boku Parentano nabii Musa ki sai paisapo kadadia kana luwu patuduno Apu Alla. 19 Nangkuamo koide, inai da mompepate me'asa parentano koie boku, mau da sai paraluu'ea, kai potisu'akondo'o miano kando osie monunu koie parenta, iaamo danta nineehako miano da sai te'angga larono pomparentaano Apuno suruga. Sawali inai da moweweuhako ronga da mompotisu'ako ko'ira parenta, iaamo danta nineehako miano owose hai laro pomparentaano Apuno suruga. 20 Dadi, nangkuamo kaku po'awaakokomiu, ki sai pompokulaloi niweweumiu da moico ka'iaa ko'ira guru agama ronga miano Farisi, nami da'a mpiha nta tewisoi laro pomparentaano Apuno suruga. »
Pompotisu dadaano sa'o laro
(Luk. 12:57-59)
21 « Aricomiumo modeaho haratia da mekona hai ira mbue-mbueto: Osie mompepate, naiho da mompepate dahoo nta kinara-kara. c 22 Sawali Kupo'awaakokomiu, inai da mo'awai petilano dahoo nta kinara-kara, inai da anuo pore petilano dahoo nta kinara-kara hai pongadila'eano agama, ronga inai da kanahi, ‹ Nahina upeu'u › dahoo nta hinawiako hai bolo api naraka.
23 Nangkuamo koie, kiu daa nta montompa pesombau hai pesombaa, kau pokopehawa'o hi daa petila'u da mopoe larono hai co'o, 24 diohopo isala koie pesombau hai ra'ino pesombaa, kau lako mepokomoico koie hai petila'u. Sa'ariu koie, pohulemo nde'e tompa'o pesombau tonia.
25 Merare tepokonaakono miano danta pekara-kara'u hiu daapo merongaa hai bolo sala lako hai pongadila, kai osie saru koie miano wawako hai hakim, yahopo koie hakim tena'o anabuano wisoko hai bolo ntorungku. 26 Kupo'awaakoko, nau da'a tewali meluarako mebinta hai bolo ntorungku ki sau wada mputa'o doi da tinuntu. »
Osie meduluakono da sa'iaa samporau
27 « Aricomiu modeaho haratia da kanahi: Osie meduluakono da sa'iaa samporau. d 28 Sawali Kupo'awaakokomiu, pera miano da mo'onto me'asa tina kai tibo mokeahako, dahomo meduluakono koie tina hai bolo mpelaroano. 29 Salakono mata muanau mokontuunako hai dosa, sungki'omo kau basiako, kana'umpe kolaloo moico ki isa me'asa matau ka'iaa ki luwuo wotoluu nibasiako hai bolo naraka. 30 Salakono lima muanau moweweuhakoko dosa, kolo'omo kau basiako, kana'umpe kolaloo moico isa me'asa limau ka'iaa luwuo wotoluu ki pewiso hai bolo naraka. »
Dadaano teposincaa
(Matius 19:9; Mk. 10:11-12; Luk. 16:18)
31 « Dahoo penda haratia da kana die: Pera miano da bintanio samotu'ano kahioomo kai poweeho sura nteposinca. e 32 Sawali Kupo'awaakokomiu: Inai-inai da bintaa samotu'ano, mainakaa koie samotu'ano nai da'a meduluakono da sa'iaa samporano, koiemo tama da bintaa da mokompoweweu ngkabaria'o samotu'ano ki lako kawi hai tama suere. Ronga inai-inai da mongkawini tina da nibinta, koiemo tama da moweweu ngkabaria. »
Dadaano sumpa
33 « Aricomiumo modeaho penda haratia hai raro mbueto da kanahi: Osie mehapuiho hiu ari mesumpa. Hapa da ari kanahiu hai ra'ino Apu, kahioomo kau pe'o'olu to'uo. f 34 Sawali Kupo'awaakokomiu: Osie to'u mesumpa, kau ponee langi, kana'umpe koie langi yahoo totoro'ano Apu Alla, 35 kanasi penda monee wita'ea, kana'umpe koie wita'ea yahoo porambahi ngkaruno Apu Alla; atawa monee Yerusalem, kana'umpe koiemo kotano mokole'ea. 36 Osie penda mesumpa kau ponee rapau, kana'umpe nau tule'i nta mokomopilaa wuu'u atawa nta pokomolori'o, mau te'asa rakapo. 37 Dadisi kanahi, ‹ Yahoo › atawa ‹ Na'iaa ›, saliwano koie, kimi mpesumpa, gaunomo bilisi. »
Dadaano mowolohi
(Luk. 6:29-30)
38 « Aricomiumo modeaho haratia da kanahi: Mata mopo'euhakono'o mata, ngisi mopo'euhakono'o ngisi. g 39 Sawali Kupo'awaakokomiu, osie mowolohi sa'ono miano. Deenapo ki tapa'o kompisi muanau, giliakono'opo kompisi suwau. 40 Ronga ki wawako miano lako mekara-kara namokeahako babuu, weehakono'o ronga babu mokula'u. 41 Ki daa te'asa miano da pakisaako lako mowawaakono hapa-hapano te'asa kilo mentalano, lemba'akono'o kai dungku rua kilo. 42 Ki daa miano da mo'ita hapa-hapau, poweeho. Osie sai moweeho miano ki po'ita mosaru hapa-hapau. »
Mololaro pedalu
(Luk. 6:27-28, 32-36)
43 « Aricomiumo modeaho haratia da kanahi: Lolaroo simbau'uh ronga kokoleaho pedaluu. 44 Sawali Kupo'awaakokomiu: Milolarohira miano da dalukomiu, ronga mi'amalaakondo miano da pakaseakomiu, 45 yahopo dahano nta mentoda hicua comiu anano Tamamiu hai suruga. Kana'umpe Apu Alla mompokosaba oleo tarono miano moico, ronga penda tarono miano mosa'o. Apu Alla mompokoda'a usa tarono miano moico, ronga penda tarono miano mosa'o. 46 Kana'umpe ki te'iaasi da nilolaromiu yahoo miano da lolarokomiu, yo hapa hi daa nta mowolohiakomiu Apu? Mau miano mpontagi sima, kanasi koie na'anda bangudo.i 47 Ronga ki te'iaasi simbaumiu da sinosampataemiu, hapa pompokulaloino? Mau miano da sai to'orio Apu Alla, kanasi koie bangudo na'anda. 48 Nangkuamo koie, comiu na'amiu kami mondo'ako pololaro kana Tamamiu hai suruga. »