Oliwi himi daa nta montulumi miano marasai
6
1 « Mimpehawa'o, mi'osie mpoweweu da moico hai ra'indo miano me'alu kando ontokomiu. Kimi ngkana koie, nahina tilamiu hai Tamamiu da hai suruga.2 Dadi, co'o kiu daa nta montulumi miano marasai, osie moleleako kai podeaho miano, kana-kana bangudo miano da mompe'anu-anuto'u. Mehawado nte mpontulumi miano marasai hai laica sambahea'a ronga hai batatana, kai reree'ira miano. Santo'u-to'uahano Kupo'awaakokomiu, arihiramo tarimaa tilado. 3 Sawali co'o, kiu pontulumi, osie to'orio lima suwau hapa da niweweuno lima muanau. 4 Kahioomo da niweweuu kai osie to'orio miano, te'iaasi Tamau da hai suruga da ontoo niweweuu da sai inonto, yahomo danta moweeko tila'u. »
Oliwi himi daa nta amala
(Luk. 11:2-4)
5 « Himi daa nta amala, osie kana-kana miano da mompe'anu-anuto'u. Mehawado amala mpentade hai laica sambahea'a ronga hai teposampaano batatana kai ontohirasi miano. Santo'u-to'uahano Kupo'awaakokomiu, arihiramo tarimaa tilado. 6 Sawali co'o kiu daa nta amala, pewiso hai suo'u, tampo'o wamba, yahopo nde'e kau amala hai Tamau da sai inonto. Tamau da ontoo niweweuu da sai inonto yahomo danta moweeko tila'u.
7 Kimi amala mi'osie mompoko'ula-ulangi kana miano da sai to'orio Apu. Ponto'orindo dahano nta tetarima ki mentaa amalando. 8 Mi'osie nunutihira, kana'umpe Tamamiu peri'ouhomo to'orio hapa da paraluumiu, mau nami mpaisapo umbasako. 9 Dadi, kanamo die kimi daa nta amala:
Tamamami da hai suruga,
tereree'omo neemiu.
10 Kahioomo kai leu pomparentaamiu,
ronga po'ehemiu da dadi,
hai wita'ea kana-kana hai suruga.
11 Poweekami nta mengkinaamami die oleo da paraluumami.
12 Ampuniakami'o dosamami,
kana-kana hico po'ampuni miano da salakicami.
13 Osie moturusicami kako sinoba-soba,
sawali bintanicami hai pera da mosa'o.
14 Kana'umpe kimi mpo'ampuni sinalakino miano, Tamamiu hai suruga dahoo nta ampunicomiu. 15 Sawali ki sami ampunio miano da salakicomiu, Tamamiu na'ana hai suruga nai da'a nta ampunio sinalakimiu. »
Oliwi himi daa nta poasa
16 « Himi daa nta mempoasa, osie morutu ra'imiu kana miano da mompe'anu-anuto'u boli'io ra'indo, kai kanahisi pera miano da ontohira hindo daasi poasa. Santo'u-to'uahano Kupo'awaakokomiu, arihiramo tarimaa tilado. 17 Sawali co'o kiu daa nta poasa, pero'umo, kau peluwi, 18 kai osie da'a miano da to'orio hiu daa poasa, te'iaasi Tamau da sai inonto da to'orio. Tamau da ontoo da niweweuu da sai inonto yahomo danta moweeko tila'u. »
Dadaano mongkongko inawa
(Luk. 12:33-36)
19 « Mi'osie mongkongko inawamiu hai wita'ea, dahano nta kaaho konde naamo kalama ronga nta mewiso alaa miano mpononako. 20 Sawali kongkoomo inawamiu hai suruga, dahano sai to'ori kaaho konde naamo kalama, ronga dahano sai to'ori mewiso alaa miano mpononako. 21 Kana'umpe maina dahano inawau, kokeenamo dahano pelaroau.
22 Mata yahomo huluno wotolu. Ki molino matau, molinyaaho upuo wotoluu. 23 Sawali ki mosa'o matau, dahoo nta rondoma upuo wotoluu. Dadi ki rondoma hulu'u, taperano rondoma mpusu wotoluu!
24 Nahina te'asa miano da tewali sangkinaa hai orua ponggawa. Kana'umpe kicana koie, dahoo nta kokoleaho da me'asa kai lou'o da me'asa. Atawa dahoo nta anintotu hai da me'asa kai paruruo da me'asa. Kanamo comiu na'amiu, nami da'a to'ori tesangkinaa hai Apu Alla ronga hai kawasaa. »
Osie tewere
(Luk. 12:22-31)
25 « Nangkuamo koie, kaku po'awaakokomiu, mi'osie tewereako hapa nta tinoraakomiu, hapa nta kinaamiu ronga nta nindo'umiu, atawa hapa nta pinodaino wotolumiu. Na'iaa bara tora da kolalo ko'angga ka'iaa kinaa, ronga wotolu kolaloo ko'angga ka'iaa pakea? 26 Ontoopo manu-manu hai laamoa, nahina da mpohawu ronga mpongkotu, ronga mpongkongko wua mpinombula hai kampiri. Sawali Tamamiu hai suruga dahosi pakanihira! Nami da'a bara kolalo te'angga ka'iaa ko'ira manu-manu? 27 Dahoo bara te'asa miano hai comiu da ari tewere kai to'ori tianio mentaa umuruno mau te'ete?
28 Yo hapa kami ntewereako pakeamiu? Ontoopo kapu ngkobunga da tora hai lueno. Koie bunga nahina da mpohedo ronga mposeuni. a 29 Sawali Kupo'awaakokomiu, mokole Sulaiman da kawasa ngkanaico, mau ki moico pakeano, nai pengkena moicono ko'ira te'asa tangke bunga. 30 Eheemo koie kapu ngkobunga hai lueno, da da'a die oleo, kai meanta nta nibasiako hai bolo api, dahosi Apu Alla mokompepakea'o. Lalo'eahopo comiu, miano da kura mparasaea!
31 Mi'osie tewere ronga kanahi, ‹ Hapa danta kinaanto? › atawa ‹ Hapa danta nindo'unto? › atawa ‹ Hapa danta pinodaito? › 32 Koie luwu yahomo da inu'ungke ngkaida'ano miano da sai to'orio Apu Alla. Sawali Tamamiu hai suruga to'orio luwu koie da paraluumiu. 33 Dadi, mi'u'ungkee meri'ou pomparentaano Apu Alla ronga minunu'o po'eheno, yahopo nde'e luwu da paraluumiu dahomo nta tianiakokomiu'o.
34 Nangkuamo koie, mi'osie tewereako mekona dai ile. Kana'umpe ile dahosi na'ana tesinca tewereno. Die oleo koa'omo susano; osiemo tianio. »