Mo'otuhi tesalano miano
(Luk. 6:37-38, 41-42)
7
1 « Mi'osie mo'otuhi tesalano miano suere, kai osie saru Apu Alla otuhio tesalamiu. 2 Kana'umpe po'otuhimiu tesalano suere miano, nta kanasi po'otuhino Apu Alla tesalamiu. Ronga nta pogantamiu suere miano, koiemo nta pogantano Apu Alla comiu.3 Yo hapa kau ontoomo puli da hai matano petila'u, sawali balo da hai bolo matau nau da'a ontoo? 4 Yo hapa kau to'ori kanahi hai petila'u, ‹ Kahioomo kaku sicu'akoko'o puliu, › siangkopo balo dahoo tepoke bolo matau? 5 Hoo co'o miano da mompe'anu-anuto'u, oninio isala balo da hai bolo matau, yahopo kau daa nta to'ori ko'onto moico, kau tule'i sicu'akono'o pulino petila'u.
6 Mi'osie weehakono'o dahu hapa da te'angga hai ra'ino Apu Alla, kai osie tegili topaicomiu. Ronga mi'osie taburako montiamiu hai ra'ino wawi, kai osie saru lesa-lesa'o. »
Amala da tenunu
(Luk. 11:9-13)
7 « Mimpo'itamo, dakomiumo nta pinoweehi; po'u'ungkemo, dakomiumo nta mo'awa; pekuntemo, dakomiumo nta inungkahiako wamba. 8 Kana'umpe pera miano da mo'ita nta pinoweehio, ronga pera miano da mo'u'ungke nta awaa, ronga pera miano da mekunte, dahoo nta inungkahiako wamba.
9 Dahoo bara te'asa miano hai comiu da moweeho watu anano, ki po'ita roti? 10 Atawa moweeho ule ki po'ita ica? 11 Siangkopo comiu da mesipa mosa'o, dakomiumo to'ori nta moweeho anamiu da moico. Menteehakonopo Tamamiu hai suruga, kolaloo to'ori mompoweehi da moico hai pera miano da mo'ita. »
Wamba da mo'odo
(Luk. 13:24)
12 « Hapa da po'ehemiu ki weweuhakomiu'o miano, weweuhakondo'omo na'anda. Koiemo pu'uno luwu da teburi hai Boku Parentano nabii Musa ronga pompotisuno raro nabii.
13 Mimpewisomo hai wamba da mo'odo, kana'umpe molueho wamba ronga batatana da me'o'ala hai naraka, ronga maroaho miano da mpesala. 14 Taperano mo'odo wamba ronga mosimpi sala da me'o'ala dahano tora ngkaida'a, ronga te'ete'o miano da awaa. »
Pompotisu da tesala
(Luk. 6:43-44; 13:25-27)
15 « Midagai'ira ko'ira nabii da mpompe'anu-anuto'u, dahira nta leu hai comiu kana domba, sawali santo'u-to'uahano, ira koie kana dahu lampu mosoko. 16 Hai niweweundo dakomiumo nta to'orio sipado. Nahina miano da mo'upu wua angguru mebinta hai tangkalasi, atawa wua ara mebinta hai ewo ngkoriu. 17 Pinombula da moico, moicoo wuano, ronga pinombula da sai moico, nai moico wuano. 18 Nahina pu'u ngkeu da moico nta kowua'ako da mosa'o, ronga nahina pu'u ngkeu da mosa'o nta kowua'ako da moico. 19 Pera pinombula da sai moico wuano dahoo nta pinodo kai nihawiako ronga tinunu. 20 Kanamo koie, dahamiu nta to'orio sipado miano, yahoo mebinta hai niweweundo.a
21 Na'iaa pera miano da meki'apua hai Aku danta mewiso hai pomparentaano Apuno suruga, sawali te'iaasi da nunu'o po'eheno Tamangku hai suruga. 22 Oleo kiama dahoo nta me'alu miano da me'e'etaaku, ‹ Apua, Apua, na'iaa bara tendenomo Comiu kako koharatia kana nabii? Ronga na'iaa bara tendenomo Comiu kako pontila setani ronga moweweu peto'o tekangka da me'alu? ›
23 Koie tempo dahakumo nde'e nta mokomentoda'akondo'o kanahi, ‹ Naku paisa to'oricomiu! Mimpolai! Osie okudahiaku, comiu miano da sai nunu'o petenano Apu Alla. › »
Rua rupa pompotoro'a laica
(Luk. 6:47-49)
24 « Pera miano da modeaho pompotisuku kai nunu'o, dahoo nta kana me'asa miano mandara da mompotade laicano hai wawo watu. 25 Tempono usa'ea kai e'e waa, ronga rumpa'o ngalu'ea, nai teleha, hina mpinotade hai wawo watu. 26 Sawali pera miano da modeaho pompotisuku kasai nunu'o, kanamo miano da pore da mompotade laicano hai wawo hahi. 27 Tempono usa'ea kai lolowio e'e waa ronga rumpatio ngalu, telehaamo koie laica ronga ntaperano terowaki! »
Nibangaohakondo miano da mompodedea