I Yesus mompokontido miano da kokulidaa
(Mk. 1:40-45; Luk. 5:12-16)
8
1 Sapetiihakono koie i Yesus mebinta hai wawo ngkabumbu, nilakodo menunutako miano me'alu. 2 Kai leu nde'e miano da kokulidaa mesombaiho kanahi, « Apua, kimi ehe, dakomiumo nta mokontidoaku. »3 Kai pengkae koie i Yesus hedoo koie miano kai koharatia, « Po'ehengku, kau tidomo. » Nilakono tido koie kulidaano.a 4 Kai koharatia koie i Yesus, « Pehawa to'uo, osie to'u montulura mau hai nai, sawali lakomo popo'ontoniakono'o wotoluu pua'ima, ronga montompa pesombau peto'ono hiu tidomo, kana parentano nabii Musa, b kai menteendoo miano me'alu hiu tidomo. »
I Yesus mokontidoo sangkinaano komondaa hai Kapernaum
(Luk. 7:1-10)
5 Satelaroakono koie i Yesus hai kampo Kapernaum, kai leu me'asa komondaa ngkompi Roma lawatio mepetulumi kanahi, 6 « Apua, dahoo sangkinaangku da leleha lungkuho hai laica ntaperano modoho. »
7 Koharatia'omo koie i Yesus, « Dahakumo nta leu mokontidoo. »c
8 Kai lawanio koie komondaa, « Apua, naku pantasi lawaticomiu hai laicangku, sawali te'asa mpalipo haratiamiu, dahomo nta tido peie sangkinaangku. 9 Kana'umpe i'aku na'angku dahoo ponggawangku da parentaaku, ronga na'angku dahira surudadu da pinarentangku. Kicu tena'o koie te'asa surudadu lako, dahoo nta lako, kicu pontena suere penda leu, dahoo nta leu, atawa kicu tena'o atangku, ‹ Weweuho die, › dahoo nta weweuho. »
10 Sapodeaho koie i Yesus, nilakono tekangka, kai po'awaakondo ko'ira miano da nunu'o, « Santo'u-to'uahano Kupo'awaakokomiu: Parasaea da kana die owoseno naku paisapo mo'awa, mau hai miano Israil. 11 Sameno-menonaano, Kupo'awaakokomiu, dahoo nta me'alu miano suku suere da mpebinta hai matano oleo ronga hai pada oleo nta mentotoro mpendo'ua merongahira i Ibrahim, i Ishak, ronga i Yakub hai pomparentaano Apuno suruga. 12 Sangkopo miano Israil da pinarentano Apu Alla yahomo danta nibasiako hai rondoma mpiororo, koiemo keena dahano perurumatea ronga pompokiki'a baka. »
13 Yahopo nde'e koie i Yesus kai koharatia koie hai komondaa kanahi, « Pohulemo, dahomo nta dadi nunu'o parasaeau. » Koiesi kana-kana kai tido nde'e yo sangkinaano.
I Yesus mokontidoo ponino i Petrus ronga suere miano
(Mk. 1:29-34; Luk. 4:38-41)
14 Sadungkuno koie i Yesus hai laicano i Petrus, kai ontoo ponino tina hi daa leleha moreo. 15 Kai hedoo limano koie tina, nilakono ari-ari moreo. Pewanguomo nde'e kai kokarehoakono.
16 Kiniwia'eahomo, kando leu mpowawaakono miano me'alu da nilawuino setani. Asa mpalisi hi koharatia tilahira ko'ira setani kando mpolai kando mentido ko'ira luwu miano da morungku. 17 Adiemo kadadiahano hapa da ari kanahino nabii Yesaya yahoo, « Iaamo da ari pokomorosoakita'o wotolu modengkento ronga mokontidoo rungkuto. » d
Miano da mokea nunu'o i Yesus
(Luk. 9:57-62)
18 Sa'ontohiramo koie i Yesus ko'ira miano me'alu da lilicu'o, tena'iramo ana guruno kando mpepoleako hai tahi. 19 Sawali me'asa guru agama naleu kanahi, « O tuangguru, dahaku nta nunukomiu, mau ki hapa nta pe'o'alaamiu. »
20 Koharatia'omo koie i Yesus, « Dahu lampu dahoo pelokuano, manu-manu dahoo pomua'ano, sawali Ana Nto Manusia nahina nta lelehaano. »
21 Dahomo penda me'asa ana guruno da kanahi, « O Apua, Mimpalalesaaku isala kaku pohule koburuo tamangku. »
22 Sawali pomparereemo koie i Yesus kanahi, « Nunu'akumo, kahioomo miano mate kando koburuo miano matendo. »
I Yesus mompokomontundu ngalu'ea
(Mk. 4:35-41; Luk. 8:22-25)
23 Kai pe'ulea koie i Yesus hai bangka, kando mpenunu ana guruno. 24 Tibo-tibono terumpatako ngalu'ea hai tahi, yahopo koie hembo kai tawunio bangka, sawali koie i Yesus dahoo moturi. 25 Nangkuamo kando meleu ana guruno tuba'o kanahi, « Apua, tulumicita, dakita nta mentondu! »
26 Koharatia'omo, « Yo hapa kami momee? Taperano modengke parasaeamiu! » Pentadeemo nde'e koie i Yesus kai i'ireiho koie yo ngalu ronga tahi. Nilakono nde'e montundu to'u luwuo.
27 Ko'ira miano mentekangkahiramo, kando mengkanahi, « Inaiho die miano, mau yo ngalu ronga tahi nunu'o po'eheno? »
I Yesus mompokontido orua miano da nilawuino setani
(Mk. 5:1-20; Luk. 8:26-39)
28 Satepoleakono i Yesus hai wonuando miano Gadara, nilakono sabanio orua miano da nilawuino setani mebinta hai raro ngkoburu bolo watu. Orua'ira taperando mosoko, nahina miano da moseka mesala kokeena. 29 Pehohou'iramo nde'e, « O Anano Apu Alla, nta hapaicamimo, daako bara mokea pakaseakami hi sai da'apo dungku tempono? »
30 Mentala'ate'o mebinta kokeena dahoo asa lunu'ea wawi da mpehumbe. 31 Yahopo ko'ira setani kando mpekora mo'ita hai Yesus kanahi, « Kiuna nta saaricami, tenakamimo kako mpewiso koie hai lunundo wawi. »
32 Kai koharatia, « Milakomo! » Nilakodomo ko'ira setani mpeluarako kando raa mpewiso koie hai wawi lunu, kando mpolai mperoroako hai laa meli, kando mpetaburako hai bolo ntahi kando memate molomo.