I Yesus mompokontido miano lungkuho
(Mk. 2:1-12; Luk. 5:17-26)
9
1 Pe'uleahomo koie i Yesus hai bangka, kai pompole tahi Galilea mohule hai kampono, Kapernaum. 2 Koiemo keena meleuhando miano mpowawaakono miano lungkuho da nilemba hai poturiano. Sa'ontohira ko'ira miano hi owose parasaeando, koharatia'omo koie hai miano lungkuho, « Mohendemo, anaku, nante'ampuniomo dosau. »3 Opiahira ko'ira guru agama da meda'a kokeena mengkanahi hai bolo mpelaroando, « Die miano dahoo paruruo Apu Alla! »
4 Sawali i Yesus nanto'orio ihi mpelaroando, nangkuamo kai koharatia, « Yo hapa kai mosa'o ihi mpelaroamiu? 5 Maina da kolalo mobuna, kanahi, ‹ Dosau te'ampuniomo ›, atawa kanahi, ‹ Pewangumo ronga lolakomo ›? 6 Sawali diekana kami nto'orio hi makuasa Ana Nto Manusia mo'ampuni dosa hai wita'ea, dahakumo nta pokomentoda'akomiu'o. » Yahomo kai tena'o koie miano lungkuho, « Pe'engkamo, alaa poturiau ronga pohulemo hai laicau! »
7 Pewanguomo nde'e koie miano lungkuho kai pohule hai laicano. 8 Sando ontoo ko'ira miano me'alu koie kadadia, kando memomee ronga reree'o Apu Alla, kana'umpe tuduomo kuasano da owose hai to manusia.
I Matius pontagi sima nunu'o i Yesus
(Mk. 2:13-17; Luk. 5:27-32)
9 Lolako'omo i Yesus mebinta kokeena kai ontoo me'asa miano da meneehako i Matius, da totoro hai kantori powada'a sima, kai boboiho kanahi, « Leumo nunu'aku. » Nilakono mentade koie i Matius kai nunu'o.
10 Dahomo konainoo koie i Yesus ronga ana guruno tewawe hai laicano i Matius, kando meleu miano mpontagi sima da me'alu ronga miano mosa'o kando mentewawe mperonga. 11 Tempondo ko'ira miano golonga Farisi ontoo dadaano, petukanahiramo hai ana guruno, « Kana'umpe gurumiu kai tewawe meronga miano mpontagi sima ronga miano maradosa? »a
12 Koie i Yesus modeahira kai koharatia, « Na'iaa miano ntido da paraluu dotoro, sawali miano morungku. 13 Milakomo mepopotisu'ako batuano die haratia: ‹ Da po'ehengku yahoo kami mpololaro miano, na'iaa mompoweehi pesomba. › b Kaku leu naku da'a nta moboboi miano da tekona niweweundo, sawali miano ngkodosa. »
Dadaano poasa
(Mk. 2:18-22; Luk. 5:33-39)
14 Koie tempo meleuhiramo ana guruno i Yahya hai Yesus mpetukana, « Yo hapa cami ronga ko'ira miano Farisi kako mempoasa, sawali ko'ira ana gurumiu nando da'a? »
15 Kai lawanihira koie i Yesus, « Tewalio bara memasusa mpelaroa miano da leu mpendo'ua hi daasi merongahira tama niwawa? Matantuomo nai tewali! Dahosi nta dungku tempono kai inala koie tama niwawa, yahopo nde'e dahando nta mempoasa.
16 Nahina miano da montompiliako sibi sawu da tonia hai babu da morane, kana'umpe dahoo nta tebirungku pontompilino kai hia'o koie babu morane dungku tetiani molue tehia'ano. 17 Kanasi penda, nahina miano da mosali angguru tonia da sai da'apo wuke hai po'uleaha baula mengkau, kana'umpe dahoo nta tewiro ronga mosa'o po'uleahano kai tesolorako angguruno. Angguru tonia nta sinaliano yahoo hai po'uleaha da tonia, dahanomo nta moico daa-daano angguru ronga po'uleahano. »c
Anano ponggawa ronga tina da pinokontidono i Yesus
(Mk. 5:21-43; Luk. 8:40-56)
18 Dahomo konainoo koie i Yesus mogau'akondo ana guruno i Yahya pompobaho kai leu me'asa ponggawano miano Yahudi kokolontuu mesomba hai ra'ino ronga kanahi, « Ana ntinangku tinapunopo mate, sawali kimi daa nta ehe tealo hedoakuo, dahoo nta tora mbule. »
19 Nilakono koie i Yesus ronga ana guruno mentade nunu'o koie ponggawa.
20 Dahiramo hai tonga sala kai teroda me'asa tina da hopulumo orua ta'u morungku'ako sara ntinano merumbui hai bungkuno i Yesus okudahio, kai hedoo porambuino babuno. 21 Nangkua da pompekirino, « Podomo koma kaku hedoo babuno, dahakumo nta tido. »
22 Kai pegilisako i Yesus ontoo koie tina kai kanahi, « Pokomorodoo pelaroau, anaku! Parasaeau yahomo da mokontidoko! » Koiesi wotu kai tido.
23 Sadungkuno koie i Yesus hai laicano ponggawa, na'ontohira miano mpesuli mo'au ronga miano me'alu da mperurumate. 24 Kai tena'ira, « Mimpeluarakomo! Die ana ntina nai da'a mate, sawali dahoo moturi. » Nangkuamo ko'ira miano kando mpetotaahio. 25 Sa'arindo tena'ira ko'ira miano me'alu kando peluarako, pewiso'omo nde'e i Yesus hai suo kai ungkaario limano koie ana ntina, nilakonomo mewangu. 26 Koie kadadia teleleakomo hai upuo koie wonua.
I Yesus mompokontido orua miano mopusu
27 Salakonomo i Yesus mebinta kokeena, hai tongano sala dahoo orua miano mopusu da merumbui kando daa mehohou kanahi, « O leeno i Daud, lolarokami! »d
28 Sapewisonomo hai laro laica, naleuhira orua miano mopusu hai Iaa. Kai petukanaihira kanahi, « Dakomiusi bara parasaea hicu tule'i pokontidokomiu? »
Kando polawani, « Parasaeakami, Apua! »
29 Yahopo kai hedoo matando ronga kanahi, « Tendenomo parasaeamiu, kahioomo kai dadi da pinokeahakomiu. » 30 Nilakodo nde'e ko'onto. Kai oliwihira kando osie to'u montulura, mau hai nai, koie da ari kadadia.
31 Sawali ndona lakosi montulura hapa da ari kadadia hai upuo koie wonua.
I Yesus mompokontido miano mulu
32 Sapeluarakondomo ko'ira miano mopusu, kando leu miano mowawaakono koie i Yesus me'asa miano mulu da kinuasaino setani. 33 Sa'arino koie i Yesus tilaa setani, nilakono koie miano mulu to'ori mogau. Ko'ira miano me'alu mentekangkahiramo ronga kanahi, « Nako paisapo mpo'onto kadadia da kana die hai wonua Israil. »
34 Sawali ko'ira miano golonga Farisi ndona ngkanahi, « Yahoo kuasano ponggawano setani kai pontilaako setani. »
Pololarono i Yesus hai ira miano me'alu
35 Kai lako koie i Yesus kuu-kuu'o kota ronga kampo, mompotisu hai laica sambahea'a ronga leleako Lele Mohende mekona hai pomparentaano Apu Alla, ronga mompokontido pera giuno rungku ronga da modengke. 36 Sa'ontohiramo ko'ira miano me'alu, kai lolarohira tendenomo pinokosaa-saa ronga nahina da tulumihira, kana domba da sai pinakani. 37 Koharatia'omo koie i Yesus hai ana guruno, « Molueho pae danta sinangke, sawali miano mpesangki te'ete'o. 38 Nangkuamo koie, po'itaamo hai Apuno pae kai pontena miano danta leu mesangki'akono. »