Matius 10

I Yesus boboihira hopulu orua rasulu

(Mk. 3:13-19; Luk. 6:12-16)

1 I Yesus boboihira ana guruno da hopulu orua kando mentekongko ronga kai poweehira kuasa pontila setani, naamo mompokontido pera rungku ronga wotolu da modengke. 2 Neendo ko'ira da hopulu orua rasulu yahoo: Simon da meneehako Petrus ronga Andreas petilano, Yakobus anano Zebedeus ronga Yahya petilano, 3 i Filipus, i Bartolomeus, i Tomas, i Matius pontagi sima, i Yakobus anano i Alfeus, i Tadeus, 4 i Simon, miano paratai Zelot, ronga i Yudas Iskariot da ari soroakondo'o pedaluno i Yesus.

I Yesus montena hopulu orua rasulu

(Mk. 6:7-13; Luk. 9:1-6)

5 Koie i Yesus tena'ira lako ana guruno da hopulu orua ronga oliwihira kanahi, « Mi'osie mebia hai sala nta lako hai wonuano suku suere atawa mewiso hai laro ngkampono miano Samaria. 6 Sawali milakomo hai miano Israil da molengu hai Apundo kana-kana domba. 7 Milakomo leleako kanahi, ‹ Okudaamo pomparentaano Apuno suruga. › 8 Pokontidohiramo miano morungku, pokontorahiramo miano mate, pokontidohira miano ngkulidaa, ronga tilaa setani. Aricomiumo pinoweehi mpena, nangkuamo koie mimpowee mpenahira. 9 Mi'osie mowawa doi wulaa, doi pera, atawa doi tambaga hai pekokorimiu. 10 Mi'osie mowawa mantu hai laro lakoahamiu, osie mowawa babu koa orua, sandala, atawa tuko, kana'umpe miano mpohedo dahoo nta pinetoka.

11 Kimi dungku mewiso hai kota atawa hai kampo, mimpo'u'ungke te'asa miano da moico larono, mimpoo'ia kokeena dungku kami lako penda. 12 Kimi mpewiso hai laicano miano, barakati'ira ihino laica. 13 Kindo ehe tarimakomiu, dahira nta mo'awa barakatimiu, sawali ki sando tarimakomiu, dakomiusi nta wawaa mbule barakatimiu. 14 Salakono da'a kampo atawa laica da sai ehe tarimakomiu atawa modedeakomiu, mibintanio koie poo'iaha ronga tapisio awuno karumiu. 15 Santo'u-to'uahano Kupo'awaakokomiu: Oleo kiama ko'ira miano kota Sodom ronga Gomora da mangkedosa dahoo nta kolalo mobata inawando ka'iaa mianono koie kampo. »

Karasai hai ra'i

(Mk. 13:9-13; Luk. 21:12-17)

16 « Mimpeehawa'o, Kutenakomiu lako kana to'u ana domba hai olotano dahu lampu; nangkuamo koie, kami mpepekiri ari kana-kana ule, ronga mongkote mpelaroa kana ticokou. 17 Sawali mimpedagai hai pera miano, kana'umpe dahira nta mokompekara-karakomiu hai pongadila ronga wowosukomiu hai laica sambahea'ando. 18 Tendenomo himi nunu'aku, kami daa nta sinisinta hai ra'indo pamarenta ronga raro mokole kami ntewali saksiicu hai ira, ronga hai miano da sai to'orio Apu Alla. 19 Sawali salakodo mokompekara-karakomiu, mi'osie tewereako hapa nta kanahimiu, kana'umpe koie tempo dahosi Apu Alla nta motisukomiu. 20 Kana'umpe na'iaa comiu danta mogau, sawali Sangkoleono Tamamiu hai suruga danta mogau hai bolo mpelaroamiu.

21 Dahoo nta kadadia miano da ehe soroo petilano kai pinepate. Kanapo na'ana tama nta soroo anano kai pinopate. Ronga dahira anadalo nta ta'oo miano motu'ando ronga sorohira kando pinopate. 22 Dahira nta kokoleakomiu luwu miano, tendenomo neengku. Sawali miano da sabara montinei karasai dungku kompura-puraano koiemo nta salama. 23 Salakodo pakaseakomiu hai me'asa kampo, mimpolai hai kampo suere, kana'umpe santo'u-to'uahano Kupo'awaakokomiu: Nami da'apo nta kuu'o luwu kampodo miano Israil kai leu Ana Nto Manusia.

24 Me'asa ana guru nai pompokulaloi ka'iaa guruno, atawa me'asa sangkinaa nai pompokulaloi ka'iaa apuno. 25 Koa'omo me'asa ana guru ki pengkenaa guruno, kanasi na'ana me'asa sangkinaa ki pengkenaa apuno. Ki lako koie apuno laica nineehako bilisi, nta lalo'eahopo asa bolo laicano. »

Momeetako Apu Alla

(Luk. 12:2-7)

26 « Dadi, mi'osie momee hai to manusia. Nahina te'asa da tetutuwi da sai nta inungkahi ronga nahina te'asa da tewuniako da sai nta tino'ori. 27 Hapa Ku'ari mo'awaakokomiu hai rondomaano tuluraakondo'o hai molinyaahano, ronga hapa Ku'ari mburuicomiu hai birimiu pekora tuluraakondo'o mebinta hai landano laica. 28 Ronga osie momeetakohira da to'ori mompepate wotolu, sawali nando to'ori mompepate sangkoleo. Sawali momeetako kontu'uma Apu Alla da to'ori mompokolono sangkoleo ronga wotolu hai bolo naraka. 29 Na'iaa bara oto lere nibalu orua asa doi? Sawali mau te'asa boto nai da'a nta tuuna hai wita ki sa'iaa po'eheno Tamamiu. 30 Lalo'eahopo comiu, mau luwu wuuno rapamiu ariomo nidoa. 31 Nangkuamo koie, mi'osie momee, kana'umpe teku-tekulaloo anggamiu ka'iaa ko'ira oto lere da me'alu. »

32 « Pera miano da akui'aku hai ra'indo manusia, dahaku na'angku nta akui'o hai ra'ino Tamangku hai suruga. 33 Sawali inaiho da mehapuihaku hai ra'indo miano, dahaku na'angku nta mehapuiho hai ra'ino Tamangku hai suruga. »

I Yesus mowawa teposincaa; Dadaano nunu'o i Yesus

(Mk. 9:41; Luk. 12:51-53, 14:26-27)

34 « Mi'osie kanahi dahaku leu nta mowawa tepokonaa hai wita'ea; naku da'a leu mowawa tepokonaa sawali ewanga mpedalu. 35 Kana'umpe kaku daa leu yahoo nta mokompedaluo ana ntama hai tamano, ana ntina hai tinano, poni ntina hai poni ntinano, 36 ronga pedaluno miano yahoo pe'asa laicano. 37 Inai da kolalo polouno tamano atawa tinano ka'iaa I'aku, nai pantasincuo; kanasi inai da kolalo polouno ana ntamano atawa ana ntinano ka'iaa I'aku, nai pantasincuo.

38 Naiho da sai lemba'o keu mpinotalambeno kai nunu'aku, nai pantasincuo. 39 Inai da totonga'o penaano, dahoo nta isa penaano, ronga inai da isa penaano tendenomo nunu'aku, dahoo nta awaa penaano. »

40 « Naiho da lawaticomiu, dahoo lawatiaku, ronga da lawatiaku, dahoo lawatio da ari tena'aku. 41 Inai da molawati me'asa nabii, tendenomo hinangkua nabii, dahoo nta montarima tilano nabii, ronga inai da molawati me'asa miano moico, tendenomo hinangkua miano moico, dahoo nta mo'awa tilano miano moico. 42 Naiho da mompoweehi e'e momapu te'asa tonde die hai te'asa miano marasai, tendenomo nangkua ana guruku, santo'u-to'uahano Kupo'awaakokomiu, nai da'a nta isa tilano. »