11
1 Sa'arino koie i Yesus oliwihira ana guruno da hopulu orua, pebintaniomo kokeena kai lako mompotisu ronga leleako haratiano Apu Alla hai kampodo miano Yahudi.I Yesus ronga i Yahya pompobaho
(Luk. 7:18-35)
2 Koie i Yahya pompobaho da hai bolo ntorungku podeahomo da niweweuno koie i Yesus Kristus. Yahopo kai tena'ira ana guruno lako metukanaiho kanahi, 3 « Icomiumo bara miano da ari nidandino Apu Alla danta leu,a atawa nta montarimakamipo suere? »
4 Kai lawanihira koie i Yesus kanahi, « Mimpohulemo, po'awaakonomo koie i Yahya hapa da pinodeamiu ronga da inontomiu: 5 Miano mopusu ko'ontoomo, miano lungkuho lolako'omo, miano ngkulidaa tidoomo, miano motaru korongeemo, miano mate toraamo mbule, miano ngkadee-dee dungku'iramo Lele Mohende. 6 Konantuaraa miano da sai bata-bata dungku bubungkuihaku. »
7 Sapohuledo ana guruno koie i Yahya, petampu'uomo koie i Yesus tulurahira miano me'alu mekona hai Yahya kanahi, « Nta hapamiu nde'e ponoha kami ari lako ontoo koie i Yahya hai lueno? Ontoo me'asa miano da kana-kana pu'u wulu da pinualeno ngalu moraa morumai? Na'iaa. 8 Atawa nta hapamiu lako? Nta ontoo miano da moico pinodaino? Na'iaa. Miano da moico pinodaido poo'iahando hai rahano mokole. 9 Nde'e nta hapamiu lako? Nta ontoo nabii? Menonaa, Kupo'awaakokomiu, deenapo koie i Yahya kolaloo owose ka'iaa nabii. 10 Kana'umpe iaamo tuduahano da teburi haratiano Apu Alla, ‹ Diemo tinenaku da meri'ou nta mompasadia'akoko nta salau. › b
11 Santo'u-to'uahano Kupo'awaakokomiu: Pera miano da tehina die hai wita'ea, nahina te'asa miano da mokulaloiho koie i Yahya pompobaho, sawali inai da oki-okidi hai pomparentaano Apuno suruga owo-owose'opo ka'iaa iaa. 12 Sa'isono koie i Yahya leleako haratiano Apu dungku diekana, miano da nunu'o parentano Apu Alla mokoraa nidalu ronga kinuasanino miano mosoko. 13 Kana'umpe bokuno nabii Musa ronga luwuo nabii suere moo'awa hapa-hapa danta kadadia dungku kai leu koie i Yahya. 14 Ronga kimi ehe parasaea, koie i Yahya yahomo nabii Elia danta leu kana pedandino Apu Alla. 15 Inai da koronge, kahioomo kai pompodedea!
16 Hapa nta pengkenando di'ira miano diekana-kana? Kana nto'umo die parere: Yahoo anadalo da mentotoro hai tadoha mpekahou-hou hai simbaudo,
17 ‹ Dakami mpesuliakomiu, sawali nami ehesi mponari,
kako mperurumateakomiu, sawali nami ehesi mpewowo. ›
18 Batuano, tempono leu koie i Yahya, dahoo poasa, nai pondo'u angguru, sawali nando ehee, kanahindo, ‹ Dahoo lawuiho setani. › 19 Diekana-kana leuhomo Ana Nto Manusia, mongkaa ronga mondo'u, sawali nando ehee, kanahindo, ‹ Ontoopo, miano lodoko ronga tuka molangu, tokiano pontagi sima ronga mesimbau'akono miano maradosa. ›c Sawali olarono ponto'orino Apu Alla dahoo nta mentoda nunu'o niweweuno miano da parasaeaho. »
I Yesus posala'io opi-opia kampo
(Luk. 10:13-15)
20 Kai petampu'u koie i Yesus posala'ihira mianono da opia kampo nasando ehe moboli'i, siangkopo me'aluomo peto'o tekangka hi ari moweweuhakondo. 21 « Taperamiu masilaka miano Khorazim ronga Betsaida! Koie da ari kadadia ronga tinekangkaakomiu hai kampomiu, kicanano ari kadadia hai kota Tirus ronga hai Sidon, matantuomo miano kokeena dahiramo mengkau mentoba ronga mpepoe-poe laro. 22 Nangkuamo Kupo'awaakokomiu, oleo kiama mobunaa nta inampuniano miano Tirus ronga Sidon ka'iaa comiu. 23 Ronga comiu miano Kapernaum! Dakomiu bara nta tinaarako dungku hai suruga? Nami da'a! Deenapo nta nibasiako hai bolo naraka! Kana'umpe pera tinekangkaako da ari niweweu hai kampomiu, kicanamo ari kadadia hai wonua Sodom iponoha, matantuo dahiramo mengkau manda ronga koie wonua dahosi moo'ia dungku diekana-kana. 24 Kupo'awaakokomiu, oleo kiama mobunaa nta inampuniano mianono Sodom ka'iaa comiu! »
Pontitiano Pompokosalama
(Luk. 10:21-22)
25 Koie tempo koharatia'omo koie i Yesus, « O Ama, Apuno langi ronga wita'ea, Kupontarimakasi hai Comiu, kana'umpe luwu die pompotisu Miwuniakoakondo'o miano mandara ronga da monto'ori, sawali Mina mpokomentoda'akondo'o ko'ira miano da sai hina ponto'orindo. 26 O Ama, koiemo da po'ehemiu.
27 Saluwu-luwuahano ponto'ori ariomo weehakuo Tamangku. Nahina te'asa miano da to'orio i Ana, te'iaasi i Ama, ronga nahina te'asa da to'orio i Ama, te'iaasi i Ana, ronga pera miano da inehengku Kupokomentoda'akondo'o.