Ana guru mpompuruhi wua gandum konaa oleo mpekolia
(Mk. 2:23-28; Luk. 6:1-5)
12
1 Konaa me'asa oleo, yahoo oleo mpekolia,a kai lako koie i Yesus montealohi uma pae gandum. Ndona memokohuloomo ko'ira ana guruno, kando mpetampu'u mpompuruhi wua gandum ronga mpongkaa. 2 Sa'ontoomo ko'ira miano golonga Farisi, kanahi'iramo « Ontoopo, hapa ko'ira ana gurumiu kando poweweu da upali konaa oleo mpekolia? »b3 Sawali nalawanihiramo koie i Yesus kanahi, « Nami mpaisa bara basaa hapa da ari niweweuno koie i Daud, tempono mokohuloo ronga ko'ira salakono, 4 kai pewiso hai laica mpesombaa kando mengkaaho roti mpesomba da sai tewali kindo kaaho? Da tewali mongkaa te'iaasi pua'ima.c 5 Atawa nami mpaisa bara basaa hai Boku Parentano nabii Musa, dadaando ko'ira pua'ima pontompa pesomba da mpohedo hai raha mpesombaa konaa oleo mpekolia? Mau hindo limpakio oleo mpekolia, nando da'asi pinasala.d 6 Kupo'awaakokomiu, na'ai dahoo da pokulaloiho raha mpesombaa. 7 Kimi mpaha'omo batuano die haratiano Apu Alla da kanahi: ‹ Po'ehengku yahoo kami mpololaro miano ka'iaa mompoweehi pesomba, ›e matantuomo nami da'amo nta pasala'ira miano da sai mosalaki. 8 Kana'umpe Ana Nto Manusia da kuasaiho oleo mpekolia. »
I Yesus mompokontido miano konaa oleo mpekolia
(Mk. 3:1-6; Luk. 6:6-11)
9 Sapebintanino kokeena, kai lako koie i Yesus hai laica sambahea'ando miano Yahudi. 10 Na'ico dahoo me'asa miano da mate asa lima. Yahopo kando petukanaiho, « Tewaliosi bara mompokontido miano konaa oleo mpekolia? » Patudundo yahoo kando to'ori pasala'o.
11 Sawali koharatia'omo koie i Yesus, « Ki daa te'asa miano hai comiu da modio me'asa domba, kai tuuna hai bolo konaa oleo mpekolia, nami da'a bara nta tii alaa kami wuatako? 12 Nai da'a bara owo-owose anggano miano ka'iaa yo domba? Nangkuamo koie, nunu'o petenano Apu Alla tewalio moweweu moico konaa oleo mpekolia. »
13 Yahopo kai tena'o koie miano kanahi, « Pengkaemo! » Kai pengkae nde'e, nilakono tido limano kana da asa lima. 14 Sawali kando mpeluarako ko'ira miano golonga Farisi kando mpekosi nta popatee i Yesus.
Tinenano Apu Alla da teruruki
15 Sawali koie i Yesus nanto'orio da patudundo, nilakono mesuahako bintanihira kokeena. Me'aluo miano da nunutako, kai pokontidohira luwu. 16 Sawali nantabe to'uhira kando osie montulura kinaiho Iaa. 17 Nangkua pepokongkoa'ano da ari haratiano Apu Alla kana da pinokodungkuno nabii Yesaya:
18 « Diemo tinenaku da teruruki,
da nilouku ronga da ineheno larongku.
Sangkoleongku nta weehakono'o,
kai leleako da mongkote hai luwuo suku.
19 Nai ehe teposala ronga mogora,
ronga suarano nai pinodea hai batatana.
20 Wulu da telosu nai da'a nta lotu'o,
hulu da wiro-wiro nai da'a nta popatee, f
dungku kai poponangiako kangkote.
21 Ronga hai Iaamo pomperahi-rahiando miano luwu suku. » g
I Yesus ronga i Be'elzebul
(Mk. 3:20-30; Luk. 11:14-23; 12:10)
22 Yahopo kai niwawa hai Yesus koie me'asa miano da mopusu ronga mulu da nilawuino setani. Kai pokontidoo kai to'ori mogau ronga ko'onto. 23 Yahopo kando mentekangka ko'ira luwu miano me'alu ronga kanahi, « Yahomo bara die leeno mokole Daud da ari nidandino Apu Alla? »
24 Sawali tempondo miano golonga Farisi modeaho mengkanahi'iramo, « Die miano kai tule'i montila setani nangkua i Be'elzebul, ponggawano setani, da moweeho kuasa. »
25 Sawali koie i Yesus nanto'orio da patudundo, yahomo kai koharatia, « Pera pomparentaa da tepopobungku dahoo nta hancuru ronga kota atawa miano me'asa laica da tepopobungku nai tule'i nta ia-iaa.
26 Kana-kanasi na'ana bilisi ki tilaa simbauno yahomo kando mentepopobungku; kicana koie, kana'umpemo pomparentaano kai daa nta dada'iaa? 27 Dadi, kicu pontilaako setani tendenomo kuasano i Be'elzebul ponggawano setani, kana'umpe daano ana gurumiu? Po'awamiu kuasano inai kando to'ori montila setani? Nangkuamo koie, ko'ira ana gurumiu danta otuhio himi ntesala. 28 Sawali kicu pontilaako setani tendenomo kuasano Sangkoleono Apu Alla, santo'u-to'uahano, pomparentaano Apu Alla dungkukomiumo.
29 Atawa kana'umpemo miano kai to'ori mewiso hai laicano miano da mokora nta roramba'o inawano ki sai peri'ou pungoo koie miano mokora? Kai aripo nde'e yahopo kai purusako pera ihino laica. h
30 Inai da sai meduluaku yahomo balicu, ronga inai da sai mongkompulu merongaaku, iaa da mompokotepoposinca. 31 Nangkuamo koie Kupo'awaakokomiu, luwuo dosa ronga pompoko'anu-anuno miano dahoo nta inampuni, sawali da mompoko'anu-anu Sangkoleono Apu nai da'a nta inampuni. 32 Ki pogau ngkabaria miano mekona hai Ana Nto Manusia dahoo nta inampuni, sawali ki pogau ngkabaria mekona hai Sangkoleono Alata'ala nai da'a nta inampuni, mau die hai dunia rongapo hai aahera. »
Gauno miano kanasi pelaroano
(Luk. 6:43-45)
33 Kai koharatia i Yesus hai ira miano golonga Farisi, « Kimi ngkanahi koie keu moicoo, moicoo na'ana wuano; kimi ngkanahi koie keu mosa'oo, mosa'oo na'ana wuano. Hinangkua mebinta hai wuano kai tino'ori koie keu. 34 Hoo, comiu leeno ule molori, kana'umpe nta to'orimiu mogau moico, comiu miano mosa'o. Nangkua gauno miano meluarako mebinta hai pelaroano. 35 Miano da moico moluarako da moico mebinta hai podiohano da moico, kanamo na'ana miano da mosa'o moluarako da mosa'o mebinta hai podiohano da mosa'o. 36 Dadi Kupo'awaakokomiu: Oleo kiama pera miano dahoo nta dudunduo pera gauno da mosa'o. 37 Kana'umpe tendenomo ino'awau kau daa nta pinokomenona, atawa tendenomo ino'awau penda kau pinokontesala. »
Peto'o tekangka da ari dadi hai nabii Yunus
(Mk. 8:11-12; Luk. 11:29-32)
38 Koie tempo mengkanahi'iramo ko'ira guru agama ronga miano golonga Farisi hai Yesus, « O tuangguru, mokeakami mo'onto peto'o tekangka mebinta hai comiu. »
39 Polawaniomo, « Miano da mosa'o ronga madoraka mo'ita peto'o tekangka. Sawali nasando da'a nta pinoweehi, tabeano peto'o tekangka kana da ari dadi hai nabii Yunus. 40 Kana'umpe tempono nabii Yunus moo'ia hai bolo ntiano ica'ea otolu oleo otolu malo, kanamo na'ana Ana Nto Manusia nta daano hai bolo wita otolu oleo otolu malo.i
41 Oleo kiama, miano kota Niniwe dahira nta mpewangu hai ra'imiu miano da meda'a diekana, kando tuntukomiu himi ntesala. Kana'umpe miano Niniwe memanda hindo pompodedea haratia nileleakono nabii Yunus.j Ronga santo'u-to'uahano, na'ai dahoo da mokulaloiho nabii Yunus, sawali nasami ehe manda. 42 Oleo kiama mokole ntina mebinta hai wonua Arab Salata dahoo nta mewangu hai ra'imiu miano da meda'a diekana, kai tuntukomiu himi ntesala. Kana'umpe koie mokole ntina leu mebinta hai asa tapuno wita nta mompodedea olarono pompotisuno mokole Sulaiman.k Ronga santo'u-to'uahano, na'ai dahoo da mokulaloiho i Sulaiman, sawali nasami ehe mompodedea. »
Setani da mohule mbule
(Luk. 11:24-26)
43 « Sapeluarakono koie setani bintanio koie miano da nilawuino, kai lako sasario lueno papawu mo'u'ungke pekoliano, sawali nasai po'awa. 44 Yahopo kai kanahi, ‹ Nta mohule'aku mbule hai laica pebintaangku. › Lako'omo nde'e kai dungku awaa koie laica, nahina ihino, dahosi mowua ngkinerusi, ronga te'atoro moico. 45 Yahopo kai peluarako montitia opitu setani da sala-salabangupo kando mpewiso mpoo'ia kokeena. Yahomo kai dompa mosa'o dadaano koie miano ka'iaa isono. Kanasi na'ana nta inawano pera miano da mosa'o banguno diekana. »
Tinano i Yesus ronga raro mpetilano
(Mk. 3:31-35; Luk. 8:19-21)
46 Tangasano koie i Yesus mogau'akondo ko'ira miano me'alu, naleuho tinano ronga raro mpetilano mentade hai luara mokea mogau'akono. 47 Yahopo me'asa miano mo'awaakono, « Ontoopo, tinamiu ronga raro mpetilamiu dahira hai luara nta mogau'akomiu. »