Parereno da mohawu palongo
(Mk. 4:1-20; Luk. 8:4-15)
13
1 Koie oleo i Yesus meluarako bintanio laica kai lako totoro hai wiwi ntahi. 2 Kando mesosolo miano ngkapa leu lawatio, nangkuamo koie i Yesus kai pewuatako hai bangka ronga totoro kokeena, sawali ko'ira miano me'alu mpentadehiramo hai wiwi ntahi.3 Yahopo kai poweehira giu-giuno pompotisu mentete hai parere kanahi, « Dahoo me'asa miano da lako mohawu palongo. 4 Tempono mohawu dahoo asa ntilara da tudu hai wiwi sala, kando leu manu-manu kaaho luwu. 5 Asa ntilarano tudu hai wita monipi da hai wawo watu. Oru'osi wosi hina sai olaro witano. 6 Sawali sapanario oleo, nilakono moleu hina motu'i nasai olaro hakano. 7 Asa ntilara penda tudu hai olota hakano kapu ngkoriu, kai tora koie kapu ngkoriu kaputio. 8 Asa ntilara penda tudu hai wawo wita molombi, yahomo da kowua: dahoo da luku etu, luku nomo pulu, kai tii luku tolu pulu wuano. 9 Inai da koronge, kahioomo kai pompodedea! »
10 Meleuhiramo nde'e ana guruno mpetukanaiho kanahi, « Yo hapa kami mpotisu'ira mentete hai parere? »
11 Polawaniomo koie i Yesus, « Aricomiumo pinoweehi barakati kami mpaha'o rahasiano pomparentaano Apuno suruga, sawali miano meha nando paisa. 12 Naiho da koponto'ori, dahopo nta tiniani kai kolalo; sawali naiho da sai koponto'ori, hapamo da tino'orino dahoo nta inala mpiha. 13 Nangkuamo kaku potisu'ira mentete hai parere, kana'umpe dahirasi ontoo, nando ehe mo'o'onto; dahirasi podeaho, nando ehe mompodedea atawa nando ehe paha'o.
14 Hai iramo tekonaano hapa da ari kanahino nabii Yesaya: ‹ Dakomiu nta sadia mompodea, sawali nami da'a nta paha'o; dakomiu nta sadia mo'o'onto, sawali nami da'a nta paisa ko'onto. 15 Kana'umpe pelaroando ko'ira miano mokoraamo, birindo momalu'omo, matando tepokuku'omo, kando osie ko'ontoako matando, kando osie mompodeahako birindo, kai osie te'ungkahi pekirindo, kando osie tegili hai Aku kaku pokontidohira. › a
16 Sawali konantuarakomiu hi ko'ontoomo matamiu ronga korongeemo birimiu. 17 Nangkuamo santo'u-to'uahano Kupo'awaakokomiu: Me'aluo nabii ronga miano mongkote mokea ontoo hapa da inontomiu, sawali nasando ontoo, ronga mokea modeaho hapa da pinodeamiu, sawali nasando podeaho.
18 Nangkuamo koie, mimpodedea to'uo batuano parereno miano da mohawu palongo. 19 Pera miano da modeaho haratia daa-daano pomparentaano Apuno suruga, sawali nando paha'o, kai leu koie i bilisi da mosa'o purusako haratia da ari hinawu hai pelaroano miano, kana-kanamo tuduano palongo hai wiwi sala. 20 Tuduano palongo hai wita hai wawo watu, kanamo miano da mompodea haratia kai nilakono tarimaa ronga mohende. 21 Sawali nasai kohaka hai pelaroano, yahomo kasai mengkau. Samarasaino atawa pinakasea tendenomo koie haratia, nilakono tebalia parasaeano. 22 Tuduano palongo hai tonga ewo ngkoriu, kanamo miano da modeaho koie haratia, sawali nantewere hai larono tora-toraahano ronga pinokomporeno kawasa, koiemo da kaputio haratia kasai kowua. 23 Tuduano palongo hai wawo wita molombi, kanamo miano da modeaho koie haratia ronga paha'o, nangkuamo kai kowua: dahoo da luku etu, luku nomo pulu, dahoo da luku tolu pulu wuano. »
Parereno lere hai olotano pae gandum
24 Kai tulurahira koie i Yesus me'asa parere kanahino, « Pomparentaano Apuno suruga nta kanamo daano die parere: Dahoo me'asa miano mohawu palongo da moico hai umano. 25 Sawali samalonomo, poturihiramo luwu miano, kai leu koie pedalu mohawu wua lere hai olotano pae gandum kai polai. 26 Satorano ronga kowua koie pae gandum, mentoda'anomo na'ana koie lere. 27 Meleuhiramo ko'ira sangkinaano hai apuno uma kanahi, ‹ O ponggawa, na'iaa bara palongo moico da ari nihawumiu? Kana'umpe daano kai tibo tora na'ana lere? › 28 Kanahiomo koie apuno uma, ‹ Yo pedalumo da moweweuhako. ›
Petukanahiramo penda ko'ira sangkinaa, ‹ Dadi, nta lakokamimo nde'e rabukio koie lere? › 29 Kanahiomo penda koie apuno uma, ‹ Osie, nai tewali! Kana'umpe kimi rabukio koie lere, dahoo nta terabuki itai koie pae gandum. 30 Kahioomo kai tora koie pae gandum ronga lere dungku wula mpesangki'a. Mangkusi tena'ira miano mpesangki kando pumpuo isala lereno, kando koko'o yahopo kando tunuo. Yahopo nde'e kando pumpuo pae gandum ronga mokotindaa hai kampiricu. › »
Parereno wuku sawi ronga tulu
(Mk. 4:30-34; Luk. 13:18-21)
31 Kai tuluraa penda koie i Yesus me'asa parere hai miano me'alu kanahi, « Pomparentaano Apuno suruga kanamo die: Me'asa wuku sawi da inalano miano kai hawuo hai umano. 32 Wuku sawi yahoo pombulo da oki-okidimo ka'iaa pera pombulo. Sawali ki toramo, dahoo nta owo-owose ka'iaa pera inahu. Dahoo nta tewali keu owose dungku kando meleu mpeponiu kamanu-manu hai sampa-sampano. » b
33 Kai tuluraakondo'o penda koie i Yesus me'asa parere suere kanahi, « Pomparentaano Apuno suruga kanamo die: yo tulu da inalano me'asa tina kai hela'iakono'o asa karu tariju dungku kai tewua luwuo. »
34 Luwuo pompotisuno koie i Yesus hai miano me'alu sadia mentete hai parere. Nahina pompotisuno da sai mompake parere. 35 Diemo kadadiahano hapa da ari kanahino nabii: « Dahaku nta mogau mentete hai parere, dahaku nta tuluraa rahasia da tewuniako petampu'uno niweweu wita'ea. » c
I Yesus mobatuangi parereno lere hai olotano pae gandum
36 Sa'arino koie, pewiso'omo i Yesus hai bolo laica bintanihira ko'ira miano me'alu. Meleuhiramo ana guruno mpo'ita kanahi, « Ndoka batuangiakami'o koie parereno lere da hai bolo uma. »
37 Polawaniomo koie i Yesus, « Miano da mohawu wuku mpinombula da moico, koiemo Ana Nto Manusia. 38 Koie uma yahomo die wita'ea. Wuku mpinombula da moico, ko'iramo miano da pinarentano Apu Alla. Yo lere koie yahomo pera miano da monunu ponggawano bilisi. 39 Pedalu da mohawu wua lere yahomo koie ponggawano bilisi. Wula mpesangki'a yahoo oleo kiama; miano da mpesangki yahoo raro mala'ekati.
40 Kanamo lere da tinawuhako kai tinunu, koiemo nta daano oleo kiama. 41 Koie oleo dahanomo Ana Nto Manusia nta tena'ira mala'ekatino pumpusako pera miano da mompokomaradosa ronga da moweweu mosa'o mebinta hai pomparentaano. 42 Ko'iramo danta nibasiako hai bolo mpolu da kolanga-langa apino; kokeenamo dahano perurumatea ronga pompokiki'a baka. 43 Miano da monunu po'eheno Apu Alla dahira nta koniwinca kana mata oleo hai bolo mpomparentaano Apu Alla Tamando. Inai da koronge, kahioomo kai pompodedea! »
Parereno lamona ronga montia
44 « Dadaano pomparentaano Apuno suruga kanamo die parere: Dahoo me'asa miano da mo'awa lamona hai bolo wita, yahopo kai howuiho mbule. Tende mohendeno koie miano kai pohule balu'o pera hapa-hapano, yahopo kai olio koie uma.
45 Dadaano pomparentaano Apuno suruga kanamo na'ana die parere: Dahoo me'asa padangga da mo'u'ungke montia ngkorowe da moico. 46 Tempono awaa montia ngkorowe da montoe anggano, nilakono lako balu'o luwuo hapa-hapano, yahopo kai olio koie montia da asa boto. »
Parereno puka
47 « Pomparentaano Apuno suruga kanamo me'asa puka da hinawiako hai tahi, kai pewiso pera giuno ica. 48 Sapononomo koie puka, ndotaarakomo ko'ira miano hai wiwi ntahi, yahopo kando totoro tindahako; da moico hai katoa, da mosa'o ndobasiakomo. 49 Nta kanamo koie ki dungku oleo kiama: dahira mala'ekati danta meluarako tindahako miano mosa'o ronga miano da nunu'o po'eheno Apu Alla. 50 Perumbuino pera miano mosa'o dahiramo nta hinawiako hai bolo mpolu da kolanga-langa apino. Kokeenamo dahano perurumatea ronga pompokiki'a baka. »
51 Kai petukana koie i Yesus, « Mimpaha'omo bara luwu arumai? »
Kando mpolawani, « Kopaha'omo. »
52 Koharatia'omo penda koie i Yesus, « Koiemo sababuno pera guru agama da mepopotisu'ako dadaano pomparentaano Apuno suruga, kanamo me'asa apuno laica da moluarako inawano da tonia ronga da mengkau mebinta hai bolo mpotino. » d
I Yesus nai inehe hai kampo Nazaret
(Mk. 6:1-6; Luk. 4:16-30)
53 Sa'arinomo koie i Yesus tuluraakondo'o ko'ira parere, kai bintaa koie kampo kai dungku hai kampo owose'ano. 54 Kai pompotisu hai laica sambahea'a, kando mebanga-banga ko'ira miano da mpodeaho. Kanahi'iramo, « Hai hapa po'awaano ponto'ori olaro da kana arumai, ronga po'awaano kuasa kai to'ori moweweu tinekangkaako? 55 Na'iaa bara Iaa anano tuka ngkeu? Na'iaa bara i Maria tinano ronga raro mpetilano: I Yakobus, Yusuf, Simon, ronga Yudas? 56 Ronga na'iaa bara raro mpetilano tina da meda'a na'ai? Dadi, hai hapa po'awaano luwu arumai? » 57 Nangkuamo nde'e kasando me'ehee.