Yahya pompobaho pinopate
(Mk. 6:14-29; Luk. 9:7-9)
14
1 Koie tempo i Herodes Antipas, mokole hai Galilea, modeaho leleno koie i Yesus,a 2 kai po'awaakondo ana mparentano kanahi, « Koie miano yahoo i Yahya pompobaho da tora mbule. Nangkuamo kai kuasa moweweu da tinekangkaako. »3 Yahomo koie i Herodes kai ari metena rako'o i Yahya kai pepepungoo ronga wiso'o hai bolo ntorungku. Kai petena kana koie tendenomo i Herodias na'o'api hai Herodes. I Herodias yahoo samotu'ano i Filipus, petilano Herodes. 4 Kana'umpe manturu'omo i Yahya ari tabe'o i Herodes kanahi, « Upalio kawinio i Herodias. »b 5 Mokeaho i Herodes popatee i Yahya, sawali namomeetakohira miano me'alu kana'umpe ndona angga'o nabii.
6 Sawali konaa oleo hinano i Herodes, ana ntinano Herodias monari-nari hai ra'indo miano me'alu. Nangkuamo kai mohende i Herodes 7 dungku kai pesumpa nta weehakono'o pera da pino'itano koie ana ntina. 8 Kai nunu'o petenano tinano, kai kanahi, « Weehakumo na'ai rapano Yahya pompobaho hai kapara. »
9 Kai mopoe nde'e larono i Herodes, sawali nantabulumo ari mesumpa hai ra'indo miano me'alu, yahomo kai petena wawaakono'o da pino'itano koie ana ntina. 10 Petena'omo lako tawesio rapano i Yahya hai bolo ntorungku. 11 Kando wawaa rapano hai bolo ngkapara kando weehakono'o koie ana ntina, yahopo kai wawaakono'o tinano. 12 Yahopo kando meleu ana guruno i Yahya alaa maeatino kando mengkoburuo. Melako'iramo nde'e mo'awaakono i Yesus.
I Yesus mompoweehi mongkaa lima rewu miano
(Mk. 6:30-44; Luk. 9:10-17; Yah. 6:1-14)
13 Sapodeahomo i Yesus koie leleno i Yahya pompobaho, nilakono me'ulea hai bangka kai pompole tahi meliahako dahano mongio. Sawali miano me'alu modeaho nta pe'o'alaano, nilakodo mpenunutako lolako ngkaru mebinta hai kampodo. 14 Satiino koie i Yesus hai wiwi ntahi kai ontohira miano da me'alu to'u, nilakono lolarohira kai pokontidohira da memorungku.
15 Kiniwiano kando meleu ana guruno kanahi, « Dahanto die mongioho ronga nta maloomo. Tena'iramo ko'ira miano me'alu kando lako hai kampo da okuda mpo'oli kinaando. »
16 Sawali polawanino koie i Yesus, « Nando paraluu lako. Icomiu danta moweehira mpongkaa. »
17 Kanahi'iramo ana guruno, « Da da'a hai cami die te'iaasi lima boto roti ronga rua boto ica! »
18 Koharatia'omo koie i Yesus, « Wawaakuomo na'ai. » 19 Yahopo kai tena'ira ko'ira miano me'alu kando mentotoro hai wawo ngkapu. Kai alaa koie da olima roti ronga rua boto ica kai pesoso'e hai langi ronga mo'itaakono barakati. Yahopo kai sisibio roti kai weehakondo'o ana guruno kando titila'akondo'o miano me'alu. 20 Kando mpongkaa luwundo dungku memowohi. Sa'arino kando pumpuo torano koie roti, dahopo hopulu orua be'u. 21 Da ari mpongkaa dahoo kira-kira lima rewu tama, nai da'a tewiso tina ronga anadalo.
I Yesus lolako hai wawo ntahi
(Mk. 6:45-52; Yah. 6:15-21)
22 Sa'arindomo koie, nilakono koie i Yesus tena'ira ana guruno kando mpewuatako hai bangka kando mpompole meri'ou, ronga tena'ira ko'ira miano me'alu kando mpohule. 23 Sa'arino tena'ira mpohule, nasabe'o hai kabumbu kai amala pantano. Dungku kai rondoma, dahopo kokeena. 24 Bangkado ana guruno mentalamo bintanio wiwi ntahi hi daa tandaua'ira hembo da nirukudo tendenomo ngalu da mebinta hai ra'i.
25 Dahomo kokomeanta naleuho koie i Yesus lolako hai wawo ntahi awahira. 26 Sando ontoo hi daa lolako wawo ntahi, nilakodo mentebibinco kanahi, « Tonuana, » kando daa mpogora ndona momee.
27 Sawali nilakono lawanihira kanahi, « Mimpokomosekaa laromiu! I'akusi die, mi'osie momee! »
28 Yahopo i Petrus kai kanahi, « O Apua, kicuasi ona Comiu, Mintena'akumo kaku lolako hai wawo ntahi leu hai Comiu. »
29 Koharatia'omo koie i Yesus, « Leumo! »
Yahopo kai petiihako i Petrus mebinta hai bangka kai lolako hai wawo ntahi me'o'alahio. 30 Sawali namenasaa hi mokora ngalu, nilakono momee ronga montampu'u nta molomo kai pehohou, « Apua, tulumiaku! »
31 Nilakono koie i Yesus mengkae ungkaario limano kai koharatia, « Hoo, co'o miano da modengke imaniu, hapa kasau da'a parasaea? »
32 Sasabedomo hai bangka, nilakono montundu ngalu. 33 Yahopo ko'ira ana guruno da hai bangka kando pesombaiho kanahi, « To'u-to'uo Comiumo Anano Apu Alla. »
I Yesus mokontidohira da memorungku hai Genesaret
(Mk. 6:53-56)
34 Samentepolendo i Yesus ronga ana guruno hai wiwi ntahi, kando mpetiihako hai wonua Genesaret. 35 Sando mento'orio miano kokeena, nilakodo leleako hai upu-upuo koie wonua. Yahopo kando leu wawaakono'o pera miano morungku. 36 Po'itahiramo ki tewali kando hedoo porambui babuno, ronga pera da ari hedoo mentidohiramo.