Parentano Apu Alla ronga sarano miano Yahudi
(Mk. 7:1-13)
15
1 Dahoo asa ntilara miano golonga Farisi ronga guru agama mpebinta hai Yerusalem meleu awaa i Yesus kando mpetukanaiho kanahi, 2 « Yo hapa ana gurumiu kando limpakio sarano agamano mbue-mbueto? Tempondo nta mpongkaa nando uwohio limando! »a3 Sawali koie i Yesus nalawanihira kanahi, « Yo hapa na'amiu kami limpakio parentano Apu Alla tendenomo sarano mbuemiu? 4 Nangkua haratiano Apu Alla, ‹ Pa'angga'o tamau ronga tinau, ›b naamo penda, ‹ Inai da gauri ngkabaria'o tamano atawa tinano dahoo nta pinopate. ›c 5 Sawali pompotisumiu: Inai da kanahi hai tamano atawa hai tinano, ‹ Hapa kudaa nta moweekomiu nta tinoraakomiu ariakumo mesombaako hai Apu Alla, › 6 dadi po'awamiu koie miano nai da'amo paraluu pa'angga'ira miano motu'ano yahoo moweehira nta tinoraakondo. Dadi, tendenomo saramiu kanahicomiumo koie haratiano Apu Alla nahinamo pekonaano. 7 Hoo, comiu miano da mompe'anu-anuto'u, tekona to'uomo haratiano Apu Alla da ari pinokodungkuno nabii Yesaya dadaano bangumiu kanahi, 8 ‹ Di'ira miano te'iaasi reree'aku hai wiwindo, sawali hai bolo mpelaroando nando da'a. 9 Nahina gunano hindo daa mesombaihaku, kana'umpe atorano manusia da pompotisudo kanahi'iramo petenaku. › » d
10 Yahopo koie i Yesus kai boboihira ko'ira miano me'alu kai pogau'akondo, « Mimpodedeaho kami mpaha'o: 11 Na'iaa da mewiso hai bolo nganga da pokomowusee miano, sawali da meluarako mebinta hai bolo nganga yahomo koie da mokomowusee. »
12 Yahopo kando meleu ana guruno koie i Yesus mengkanahiako, « Dakomiusi bara to'orio hi daa tesodo pelaroando ko'ira miano Farisi tendenomo haratiamiu? »
13 Koharatia'omo, « Pera pinombula da sa'iaa nimbulano Tamangku da hai suruga dahoo nta nirabu ronga hakano. 14 Mimpoturusihiramo ko'ira miano Farisi. Iramo koie da kana miano mopusu da wawaa miano mopusu; kicua miano mopusu da wawaa simbau mopusuno, dahiramo nta tuuna hai bolo orua'ira. »
15 Kanahiomo i Petrus, « Pokomentoda'akami'o koie pareremiu. »
16 Koharatia'omo i Yesus, « Nami da'apo bara na'amiu mempaha'o? 17 Nami da'a bara to'orio pera da mewiso hai bolo nganga mewiso na'ana hai bolo ntia, merumbuinopo kai nibasiako hai kantete? 18 Sawali da meluarako mebinta hai nganga, ariano hai pelaroa; koiemo da mompokomowuse miano. 19 Kana'umpe mebinta hai pelaroa sabaano pinehawa mosa'o, mompepate, mesosanto'ori, endeo, mononako, saksii ngkule, mososa'o miano. 20 Koiemo da pokomowusee miano. Sawali mongkaa sai mo'uwohi lima na'iaa da pokomowusee miano. »
Parasaeano me'asa tina Kana'an
(Mk. 7:24-30)
21 Kokeenamo pebintaano i Yesus kai lako hai wonua da okudahio kota Tirus ronga Sidon. 22 Dahoo me'asa tina Kana'an da mebinta koie hai wonua kai leu hai Yesus me'e'eta, « O Apua, leeno i Daud, Milolaroaku, kana'umpe anaku tina dahoo lawuiho setani taperano marasai. »
23 Sawali koie i Yesus nai pompe'o'oo lawanio koie tina. Yahopo kando meleu ana guruno mpo'ita, « Mintena'omo koie tina kai lako, kai osie merumbui mogora. »
24 Kai lawanihira, « Dahangku tinena te'iaasi hai miano Israil da kana-kana domba da memolengu. »
25 Sawali koie tina leu mesomba hai ra'ino kai kanahi, « Apua, Mintulumiaku. »
26 Kai lawanio koie i Yesus kanahi, « Nai moico kito alaa koie kinaando anadalo kato weehakono'o dahu. » e
27 Kanahiomo koie tina, « Menonaamo, Apua, sawali dahu na'ana kaahosi tora ngkinaano apuno da tuuna mebinta hai meda. »
28 Yahopo kai polawani koie i Yesus, « O ina, taperano owose parasaeau; hapa da pinokeahakou dahomo nta dadi. » Koiesi tempo kai tido anano.
Yesus mompokontido miano da memorungku
29 Kokeenamo pebintaano i Yesus kai lolako mewiwi ntahi Galilea, yahopo kai peraketako hai wawo ngkabumbu ronga totoro. 30 Yahopo kando mentewaarako miano me'alu leu dahano, mempowawaakono miano lungkuho, miano upi ngkaru, miano mopusu, miano mulu, ronga miano morungku meha-mehano. Ko'ira miano morungku nidiohiramo hai ra'ino i Yesus kai pokontidohira. 31 Miano me'alu da meda'a kokeena taperando mentekangka hindo ontoomo miano mulu pogau'omo, miano upi ngkaru nai da'amo upi, miano lungkuho lolako'omo, miano mopusu ko'ontoomo. Yahopo kando reree'o Apu Alla Apuno miano Israil.
I Yesus mompoweehi mongkaa pato rewu miano
(Mk. 8:1-10)
32 Yahopo i Yesus kai boboihira ana guruno kanahi, « Kulolarohira di'ira miano me'alu, otolumo oleo mperongaaku nahina kinaando. Naku ehe tena'ira kando mpohule sai mpongkaa, te'iaamo kindo kempatea hai laa sala. »
33 Yahopo kando mpetukana ana guruno kanahi, « Dahanto die mongioho ronga mentalaa, hai hapamo dahanto nta mo'awaakondo kinaa di'ira miano me'alu? »
34 Petukanaamo i Yesus kanahi, « Dahopo pia boto roti da nidiomiu? »
Polawanihiramo, « Opitu boto roti, ronga pia boto ana ica. »
35 Kai tena'ira miano me'alu kando mentotoro hai wawo wita. 36 Yahopo nde'e kai alaa koie roti da opitu boto ronga ica kai pontarimakasi hai Apu Alla kai sisibio roti ronga ica, kai weehira ana guruno kando titila'akondo'o miano me'alu. 37 Kando mpongkaa luwundo dungku memowohi. Yahopo ana guruno kando pumpuo torando, dahopo opitu kompe da pono. 38 Da mpongkaa koie tempo tama mpena pato rewu miano, nai da'apo tedoa tina ronga anadalo. 39 Yahopo i Yesus kai tena'ira mpohule, sawali Iaa pe'uleahomo hai bangka me'o'ala hai wonua Magadan.