Miano golonga Farisi ronga Saduki mo'ita peto'o tekangka
(Mk. 8:11-13; Luk. 12:54-56)
16
1 Yahopo kando meleu miano golonga Farisi ronga golonga Saduki nta mesoba-soba'o koie i Yesus. Pino'itando yahoo mompokoda'aakondo te'asa peto'o tekangka da mebinta hai suruga. 2 Sawali nalawanihira, « Ki kiniwia kai momea langi, kanahimiu, ‹ Dahoo nta molinyaa, › 3 ronga ki dumondo kai momea ronga modomu langi, kanahimiu, ‹ Dahoo nta usa. › Dadaano pesuri hai langi minto'oriomo, sawali peto'o da kadadia diekana-kana nami nto'orio. 4 Miano da mosa'o ronga madoraka mo'ita peto'o tekangka. Sawali nasando da'a nta pinoweehi tabeano peto'o tekangka kana da ari dadi hai nabii Yunus. » Yahopo i Yesus kai bintanihira.Tuluno miano golonga Farisi ronga Saduki
(Mk. 8:14-21)
5 Tempondo ko'ira ana guruno i Yesus mentepole hai tahi, mentekolumpehira mpemantuako roti. 6 Koharatia'omo koie i Yesus, « Mimpe'o'olu to'uo ronga midagai'o tulu mpompewukeno miano Farisi ronga Saduki. » a
7 Yahopo ko'ira ana guruno kando mpekapetukanai kanahi, « Arumai da kanahino nasato da'a mpowawa roti. »
8 Sato'oriomo koie i Yesus da nigaudo, koharatia'omo, « Hapa kami daa mpogau'ako hi sahina roti? Comiu da kura mparasaea! 9 Nami da'apo bara paha'o? Nami da'amo bara mehawa'o roti da lima boto da ari pinetitilamiu tarono da lima rewu miano, opia be'u torano mi'ari tawuhako? 10 Atawa da opitu boto roti tarono pato rewu miano, dahopo opia kompe torano himi ari tawuhako? 11 Yo hapa kasami paha'o, patudungku na'iaa mekona hai roti? Midagai'o tulu mpompewukeno miano Farisi ronga Saduki. » 12 Koie tempo yahopo kando paha'o ko'ira ana guruno hinangkua da kanahino na'iaa tulu mpompewuke, sawali yahoo pompotisu ntesalado miano golonga Farisi ronga Saduki.
Kanahino i Petrus, i Yesus Anano Apu Alla
(Mk. 8:27-30; Luk. 9:18-21)
13 Sadungkuno koie i Yesus hai wonua Kaisarea Filipi, petukanaihiramo ana guruno, « Kanahindo miano, inai koie Ana Nto Manusia? »
14 Kando mpolawani, « Dahoo da kanahi, ‹ Yahya pompobaho ›, dahoo da kanahi, ‹ Nabii Elia ›, ronga dahoo penda da kanahi, ‹ Nabii Yeremia atawa nabii meha-mehano. › »
15 Yahopo kai petukanaihira ana guruno, « Sawali nunu'o po'awamiu, inai I'aku die? »
16 Polawaniomo i Simon Petrus, « Comiumo Mokole Pompokosalama da ari nidandino Apu, Anano Apu Alla da tora. »
17 Kai polawani koie i Yesus, « Konantuarako Simon anano Yunus, kana'umpe nasa'iaa miano da mo'awaakoko, sawali yahoo Tamangku hai suruga. 18 Ronga Kupo'awaakoko: Ico'omo Petrus, watu da morodo.b Hai wawo watu morodo die dahangkumo nta wanguo umaticu da sai nta ninangino naraka. 19 Dahakumo nta weehakoko'o tagili ngkuasano Apuno suruga. Dadi, hapa da pinoko'upaliu hai wita'ea, dahoo nta poko'upalio Apuno suruga na'ana. Ronga hapa da pinokontewaliu hai wita'ea, dahoo nta pokontewalio Apuno suruga na'ana. » 20 Yahopo i Yesus kai tabe'ira ana guruno kando osie to'u montulura, mau hai nai, hicuamo Iaa Mokole Pompokosalama da nidandino Apu.
Isono i Yesus tuluraa nta karasaino ronga sarano nta nunu'o
(Mk. 8:31 – 9:1; Luk. 9:22-27)
21 Koie wotu petampu'uomo i Yesus montuluraakondo ana guruno hi daa nta lako hai Yerusalem, ronga montimpa karasai mobea mebinta hai raro ngkamotu'a, kapala pua'ima, ronga guru agama. Dahoo nta pinopate, sawali oleo ko'otolu dahosi nta pinokompewangu mbule. 22 Yahopo i Petrus kai raesako hai pampano, kai tabe'o kanahi, « Apua, ki po'eheno Apu Alla kai osie konakomiu koie karasai! »
23 Kai pegilisako i Yesus o'ontoo koie i Petrus kai kanahi, « Polai, ico'o koie ibilisi! Co'o halangiaku Kudaa nta nunu'o po'eheno Apu Alla. Kana'umpe da pinekiriu na'iaa da po'eheno Apu Alla, sawali da pinekirino to manusia. »
24 Kai po'awaakondo ana guruno kanahi, « Inai da mokea nunu'aku, kahioomo kai bintaa pera po'eheno, kai lemba'o keu mpinotalambeno, kai nunu'aku. 25 Kana'umpe inai da totonga'o penaano, dahoo nta ke'isaa penaano, sawali inai da sai me'o'oloiho penaano tendenomo nunu'aku, dahoo nta awaa toraaha. 26 Hapamo gunano merapio ihino wita'ea sawali penaano isaa? Hapa nta polilino penaa?