Ba kangaka Yesu
18
Ntangu Yesu manisaka na kuzonza mambu yina,
yandi kwendaka na bilandi* ya yandi na lweka ya nkaka ya mwila ya Kedoni.
Bawu kotaka na bilanga yina vwandaka kuna.
2 Yuda,
yina fwanaka yekula Yesu,
zabaka mbote kisika yina,
samu ti konso ntangu,
Yesu vwandaka kwenda kuna na bilandi ya yandi.
3 Yandi nataka kuna nkonga ya basoda mpe mikengi yina bamfumu ya banganga-Nzambi* mpe ba-Falisye* pesaka yandi.
Bawu vwandaka na binwanunu,
mpe nataka minda mpe bisisi ya tiya.
4 Yesu zabaka mambu nyonso yina fwanaka kumina yandi.
Na yina,
yandi kwendaka pene-pene ya bawu,
mpe yufulaka:
"Nani beno ke na kusosa?"
5 Bawu vutulaka:
"Yesu ya Nazaleti."
Yesu tubilaka bawu:
"Munu yandi yayi."
(Yuda yina vwandaka yekula yandi vwandaka na bawu.)
6 Ntangu Yesu zabisaka bawu:
"Munu yandi yayi",
bawu vutukaka na manima,
mpe kubwaka na ntoto.
7 Yesu yufulaka dyaka bawu:
"Nani beno ke na kusosa?"
Bawu vutulaka:
"Yesu ya Nazaleti".
8 Yesu tubilaka bawu:
"Mu me zabisa beno ti ni munu.
Kana ni munu beno ke na kusosa,
beno bika bayayi kwenda."
9 Yesu zonzaka mutindu yina,
samu ti mambu yina yandi zonzaka salama:
"Tata,
mu me zimbisa muntu ve na bayina nyonso nge pesaka munu."
10 Simoni Pyele yina vwandaka na mbele basisaka yawu na nkutu,
mpe bulaka yawu na kisadi ya nganga-Nzambi ya ntete*,
mpe dikutu ya yandi ya bakala zenganaka.
(Nkumbu ya kisadi yina vwandaka Malakuse.)
11 Kasi Yesu tubilaka Pyele:
"Vutula mbele ya nge na nkutu.
Nge banza ti mu lenda kumanga na kutala mpasi yina Tata me kubikila munu?"
Yesu na ntwala ya Ane
12 Na yina,
basoda na mfumu ya bawu,
mpe mikengi yina ba-Zwife fidisaka simbaka Yesu,
mpe kangaka yandi basinga.
13 Ba nataka yandi ntete na sika ya Ane,
bokilo ya Kayife.
Kayife vwandaka nganga-Nzambi ya ntete* na mvula yina.
14 Ni Kayife zabisaka bamfumu ya ba-Zwife malongi yayi:
"Ya me lutila mbote na kufwa muntu mosi samu na bantu nyonso."
Pyele mangaka Yesu
15 Simoni Pyele mpe kilandi* ya nkaka landaka Yesu.
Kilandi yayi vwandaka ya kuzabana mbote na nganga-Nzambi ya ntete.
Ni yawu yina,
yandi kotaka ntangu mosi na Yesu na lupangu ya nganga-Nzambi ya ntete.
16 Kasi Pyele bikanaka na ngaanda,
pene-pene na mwelo.
Na yina,
kilandi yina vwandaka ya kuzabana na nganga-Nzambi ya ntete basikaka na ngaanda.
Yandi zonzaka na kento yina vwandaka keba mwelo,
mpe yandi kotisaka Pyele.
17 Kento yina yufulaka Pyele:
"Nge mpe,
nge kele kilandi ya Yesu?"
Pyele vutulaka:
"Ve!
Mu kele kilandi ya yandi ve."
18 Bisadi mpe mikengi namisaka tiya,
mpe vwandaka yotila samu ti madidi vwandaka mingi.
Pyele mpe vwandaka yotila tiya na bawu.
Ane pesaka Yesu byuvu
19 Nganga-Nzambi ya ntete* yufulaka Yesu na yina me tadila bilandi* mpe ndongosolo ya yandi.
20 Yesu vutulaka:
"Mu vwandaka zonza na ntwala ya bantu nyonso.
Konso ntangu,
mu vwandaka longisa na bayinzo ya lusambulu ya ba-Zwife*,
mpe na Yinzo ya Nene ya Nzambi*,
sika ba-Zwife nyonso ke vukanaka.
Mu vwandaka zonza ata dyambu na mansweki.
21 Samu na yinki nge ke na kuyufula munu?
Yufula bayina kuwaka munu.
Bawu zaba mbote mambu yina mu vwandaka zonza."
22 Ntangu Yesu zonzaka mutindu yina,
mukengi yina vwandaka pene-pene na yandi bulaka yandi mbata,
mpe tubaka:
"Ni mutindu yina nge ke na kupesa mvutu na nganga-Nzambi ya ntete?"
23 Yesu tubilaka yandi:
"Kana mu me zonza yimbi,
tubila munu mambu ya yimbi yina mu me zonza.
Kasi,
kana mu me zonza mbote,
samu na yinki nge me bula munu?"
24 Ane fidisaka yandi na sika ya Kayife,
nganga-Nzambi ya ntete.
Yesu vwandaka kaka ya kukangama.
Pyele mangaka dyaka Yesu
25 Simoni Pyele vwandaka kaka na kisika yina,
mpe vwandaka yotila tiya.
Ba yufulaka yandi:
"Nge mpe,
nge kele kilandi* ya muntu yina?"
Kasi Pyele mangaka mpe tubaka:
"Ve!
Mu zaba yandi ve."
26 Mosi na bisadi ya nganga-Nzambi ya ntete,
muntu ya dikanda ya bakala yina Pyele zengaka dikutu tubilaka Pyele:
"Ni nge ve mu talaka na Yesu na bilanga?"
27 Pyele mangaka dyaka,
mpe kaka na ntangu yina,
nsusu kubaka.
Yesu na ntwala ya Pilate
28 Na manima,
ba-Zwife katukaka na sika ya Kayife,
mpe nataka Yesu na yinzo ya kimfumu ya mfumu ya bantu ya Loma na Yelusalemia.
Bawu mangaka na kukota na lupangu,
samu ti bawu sumuka ve,
kasi bawu vwanda kaka ya kuvedila* samu na kudya madya ya Paki.
29 Ni yawu yina,
mfumu Pilate basikaka mpe kutaka bawu na ngaanda.
Yandi yufulaka bawu:
"Na wapi dyambu,
beno ke na kufunda muntu yayi?"
30 Bawu vutulaka:
"Kana muntu yayi salaka mambu ya yimbi ve,
beto zolaka funda yandi ve na sika ya nge."
31 Pilate zabisaka bawu:
"Beno baka yandi,
mpe beno fundisa yandi beno mosi mutindu ke na kutuba Misiku ya beno."
Bawu vutulaka:
"Beto kele ve na luve ya kuzengila muntu lufwa."
32 (Na kuzonza mutindu yina,
bawu lungisaka mambu yina Yesu tubaka ntangu yandi zabisaka wapi mutindu yandi fwanaka kufwa.)
33 Na yina,
Pilate vutukaka na yinzo.
Yandi bokilaka Yesu mpe yufulaka yandi:
"Nge kele ntinu ya ba-Zwife?"
34 Yesu vutulaka:
"Kyuvu yayi me katuka na ntima ya nge,
to bantu ya nkaka me tubila nge yawu?"
35 Pilate tubaka:
"Mu kele Zwife ve.
Bantu ya yinsi ya nge mpe bamfumu ya banganga-Nzambi* me yekula nge na sika ya munu.
Yinki nge me sala?"
36 Yesu vutulaka:
"Kimfumu ya munu kele ve ya yinza yayi.
Kana kimfumu ya munu vwandaka ya yinza yayi,
bisadi ya munu zolaka nwanina munu,
samu ti bamfumu ya ba-Zwife kanga munu ve.
Kasi,
kimfumu ya munu kele ve ya awa."
37 Pilate yufulaka yandi:
"Na yina,
nge kele ntinu?"
Yesu vutulaka:
"Nge me tuba yawu ti mu kele ntinu.
Mu butukaka mpe kwizaka na yinza kaka samu na kuzabisa kimbangi na butsyelika.
Muntu yina ke na butsyelika ke kuwaka mambu yina mu ke zonzaka."
38 Pilate yufulaka dyaka yandi:
"Butsyelika kele yinki?"
Na manima ya kuzonza mambu yina,
Pilate basikaka dyaka na ngaanda,
mpe kwendaka sika yina vwandaka ba-Zwife.
Yandi tubilaka bawu:
"Mu ke na kutala ve kibila ya kuzengila muntu yayi lufwa.
39 Na konso mukembo ya Paki*,
kifu ya beno ke zolaka ti mu pesa kimpwanza na nkole mosi.
Beno zola ti mu pesa kimpwanza na ntinu ya ba-Zwife?"
40 Na ngolo nyonso,
bawu vutulaka:
"Ve!
Yandi ve!
Beto zola Balabase!"
(Balabase yango vwandaka kimpumbulu.)