Bamfumu ya ba-Zwife salaka mfundu ya kufwa Yesu
14
Bilumbu zole bikanaka na kukuma na mukembo ya Paki* mpe ya mampa yina ba ke funisaka ve*.
Bamfumu ya banganga-Nzambi* mpe milongisi ya Misiku* vwandaka sosa wapi mutindu ya kukanga Yesu na mansweki samu na kufwa yandi.
2 Ya tsyelika,
bawu vwandaka tuba:
"Beto fwana kukanga yandi ve na mukembo ya Paki samu ti bantu sala muvusu ve."
Kento mosi tulaka mananasi na yintu ya Yesu
3 Yesu vwandaka na Betani na kati ya yinzo ya Simoni,
muntu ya bwazia.
Ntangu yandi vwandaka na mesa,
kento mosi kotaka kuna na kitutu ya alabatib ya kufuluka na mananasi ya ntalu mingi yina ba yidikaka na nalec.
Yandi zengaka yintu ya kitutu,
mpe sekulaka mananasi na yintu ya Yesu.
4 Bantu ya nkaka yina vwandaka kuna vwandaka ve na kilengi mpe tubaka bawu na bawu:
"Samu na yinki yandi me bebisa mananasi yayi?
5 Ba lendaka tekisa yawu na ntalu ya kulutila nkama tatu ya lutangu ya mbongo ya bisengo,
mpe kukabula mbongo yina na bamputu!"
Na yina,
bawu dasukilaka kento yina.
6 Kasi Yesu tubaka:
"Beno bika yandi!
Samu na yinki beno ke na kukwamisa yandi?
Mambu yina yandi me sala samu na munu kele mbote.
7 Ya tsyelika,
bamputu ke vwanda na beno ntangu nyonso,
mpe konso ntangu yina beno zola,
beno lenda kusala bawu mambu ya mbote.
Kasi munu,
mu ke vwanda ve na beno ntangu nyonso.
8 Yandi me sala mambu yina yandi me lenda na kusala.
Yandi me tula mananasi na nzutu ya munu samu na kukubika nzikulu ya munu.
9 Ya tsyelika,
mu ke na kuzabisa beno:
Bisika nyonso yina ba ke zabisa Nsangu ya Mbote* na yinza,
ba ke zonzila mambu yina kento yayi me sala,
mpe ba ke bambukila yandi moyo."
Yuda bakaka lukanu ya kuyekula Yesu
10 Na yina,
Yuda Ikayote,
mosi na kati ya bilandi* kumi na zole,
kwendaka tala bamfumu ya banganga-Nzambi* samu na kuyekula bawu Yesu.
11 Ntangu bamfumu ya banganga-Nzambi kuwaka mutindu yina,
bawu kumaka na kilengi mingi mpe pesaka yandi nsilulu ya kupesa yandi mbongo.
Na yina,
Yuda vwandaka sosa ntangu ya mbote samu na kuyekula bawu Yesu.
Yesu kudyaka madya ya Paki na bilandi ya yandi
12 Kilumbu ya ntete ya mukembo ya Paki* yina bantu vwandaka kufwa mameme ya fyoti samu na kudya,
mpe yina bantu vwandaka kudya mampa yina ba ke funisaka ve,
bilandi* ya Yesu yufulaka yandi:
"Wapi sika nge zola ti beto kwenda kuyidikila nge madya ya Paki?"
13 Na yina,
Yesu fidisaka zole na kati ya bilandi ya yandi,
mpe zabisaka bawu:
"Beno kwenda na mbanza,
mpe beno ke bwabana bakala mosi yina ke na kunata diyuki ya maza.
Beno landa yandi,
14 mpe sika yina yandi ke kota,
beno tuba na mfumu ya yinzo ti Mulongisi ke na kuyufula nge:
'Wapi sika kele kivinga yina mu ke kudya Paki na bilandi ya munu?'
15 Yandi ke lakisa beno na kibandu ya yinzo,
kivinga ya nene yina kele ya kukubama,
mpe yawu kele na bima nyonso yina me fwanana.
Ni kuna beno ke yidika bima nyonso samu na madya ya Paki."
16 Bilandi kwendaka mpe kumaka na mbanza.
Bawu talaka mambu nyonso mutindu Yesu zabisaka bawu,
mpe bawu yidikaka bima nyonso samu na madya ya Paki.
17 Ntangu mpimpa kumaka,
Yesu kwendaka kuna na bilandi ya yandi kumi na zole.
18 Ntangu bawu vwandaka kudya na mesa,
Yesu tubaka:
"Ya tsyelika,
mu ke na kuzabisa beno,
mosi na kati ya beno yina ke na kudya kintwadi na munu ke yekula munu."
19 Bilandi kumaka na kyadi ya kulutila,
mpe bandaka na kuyufula yandi mosi na mosi:
"Ya kele munu?"
20 Yesu vutulaka:
"Ya kele mosi na kati ya beno kumi na zole.
Muntu yina ke na kutula diboko ya yandi kintwadi na munu na kati ya ndonga.
21 Ya tsyelika,
Mwana ya Muntu* ke kufwa mutindu Dibuku ya Nzambi ke zabisaka yawu.
Kasi kyadi na muntu yina ke yekula yandi!
Ya vwandaka mbote na muntu yina na kubutuka ve."
Madya ya Mfumu
22 Ntangu bawu vwandaka kudya,
Yesu bakaka dimpa.
Na manima ya kutonda Nzambi,
yandi bukunaka yawu mpe pesaka yawu na bilandi* ya yandi na kutuba:
"Beno baka,
yayi ni nzutu ya munu."
23 Na manima,
yandi bakaka mbungu ya vinu.
Yandi tondaka Nzambi,
pesaka yawu na bilandi ya yandi,
mpe bawu nyonso kunwaka yawu.
24 Yandi zabisaka bawu:
"Yayi ni menga ya munu,
menga ya ngwisani yina me mwangana samu na bantu mingi.
25 Ya tsyelika,
mu ke na kuzabisa beno:
Katuka ntangu yayi,
mu ke kunwa dyaka ve vinu yayi tii kilumbu yina mu ke kunwa vinu ya malu-malu na kati ya Kimfumu ya Nzambi*."
26 Na manima,
bawu kembisaka Nzambi na banzimbu,
mpe kwendaka na mongo ya bayinti ya Olive.
Yesu zabisaka ti Pyele ke manga yandi
27 Yesu tubaka na bilandi* ya yandi:
"Beno nyonso ke bika munu samu ti Dibuku ya Nzambi ke tubaka:
'Mu ke kufwa muvungi ya mameme,
mpe mameme nyonso ke mwanganad.' "
28 Yesu tubaka dyaka:
"Kasi ntangu mu ke vumbuka na lufwa,
mu ke kwenda kuvingila beno na Ngalili."
29 Pyele zabisaka yandi:
"Ata ti bawu nyonso bika nge,
munu,
mu ke bika nge ve!"
30 Yesu vutulaka:
"Ya tsyelika,
mu ke na kuzabisa nge,
kaka na mpimpa ya bubu yayi,
ntete nsusu kuba bambala zole,
nge ke manga munu bambala tatu."
31 Kasi Pyele tubaka dyaka na ngolo nyonso:
"Ata ti mu fwana kufwa kintwadi na nge,
mu ke manga nge ve."
Bawu nyonso mpe tubaka mutindu yina.
Yesu sambilaka na Ngetesemane
32 Ntangu Yesu na bilandi* ya yandi kumaka na kisika yina ba ke bokilaka Ngetesemane,
Yesu zabisaka bawu:
"Beno vwanda awa ntangu mu ke sambila."
33 Yandi nataka Pyele,
Zaki,
mpe Za.
Yandi bandaka na kutala mpasi na ntima mpe na kukuma na boma.
34 Na yina,
yandi zabisaka bawu:
"Ntima ya munu kele ya kufuluka na kyadi samu na lufwa.
Beno vwanda awa,
mpe beno kyelola meso."
35 Yandi kwendaka na mwa mantwala.
Yandi kubwaka na ntoto mpe sambilaka samu na kulomba na Nzambi kana yawu lenda kusalama ti ngunga yina ya mpasi katuka pene-pene ya yandi.
36 Yandi vwandaka tuba:
"Aba!
Tata ya munu,
kana yawu lenda kusalama,
katula mbungu yayi ya mpasie pene-pene na munu.
Kasi kusala ve luzolo ya munu.
Sala kaka luzolo ya nge."
37 Na manima,
yandi vutukaka sika vwandaka bilandi* tatu yina,
mpe kutaka bawu ya kulala.
Na yina,
yandi tubaka na Pyele:
"Simoni,
nge me lala!
Nge me lenda ve na kukyelola meso ata na ngunga mosi.
38 Beno kyelola meso,
mpe beno sambila samu ti beno kubwa ve na ntontolo.
Ntima ya muntu kele ya kufuluka na nsatu ya kusala mambu ya mbote,
kasi nzutu kele ya kulemba."
39 Yesu bikaka dyaka bawu,
mpe sambilaka dyaka na kuzonza mambu yina yandi zonzaka ntete.
40 Yandi vutukaka dyaka sika vwandaka bilandi* tatu yina,
mpe kutaka dyaka bawu ya kulala samu ti meso ya bawu vwandaka ya kufuluka na pongi.
Bawu vwandaka zaba ve yinki ya kuzabisa yandi.
41 Ntangu yandi vutukaka na mbala ya tatu sika vwandaka bilandi ya yandi,
yandi zabisaka bawu:
"Beno ke na kutatamana na kulala,
mpe beno ke na kupema!
Ntangu yayi,
ngunga me lunga yina ba ke yekula Mwana ya Muntu* na maboko ya misumuki.
42 Beno telama,
mpe beto kwenda!
Muntu yina ke na kuyekula munu me kwiza."
Basoda kangaka Yesu
43 Kaka na ntangu yina,
ntete yandi manisa na kuzonza,
Yuda,
mosi na kati ya bilandi* kumi na zole,
kumaka kuna.
Yandi kwizaka na nkonga ya nene ya bantu yina vwandaka na bambele mpe bayinti na maboko.
Ni bamfumu ya banganga-Nzambi*,
milongisi ya Misiku*,
mpe bakuluntu ya ba-Zwife fidisaka bawu.
44 Yuda yina vwandaka yekula Yesu zabisaka bawu kidimbu yina yandi ke sala:
"Muntu yina mu ke fiba,
ni yandi.
Beno kanga yandi,
mpe beno keba yandi mbote ntangu beno ke nata yandi."
45 Kaka na ntangu yina Yuda kumaka,
yandi kwendaka pene-pene ya Yesu,
mpe tubaka:
"Mulongisi!"
Na manima,
yandi fibaka Yesu.
46 Na yina,
bawu simbaka Yesu mpe kangaka yandi.
47 Kasi mosi na kati ya bayina vwandaka kintwadi na Yesu,
basisaka mbele ya yandi.
Yandi bulaka yawu kisadi ya nganga-Nzambi ya ntete*,
mpe zengaka yandi dikutu.
48 Yesu zabisaka bawu:
"Beno me kwiza na bambele mpe bayinti samu na kukanga munu mutindu ti mu vwandaka kimpumbulu?
49 Bilumbu nyonso mu vwandaka kintwadi na beno na kati ya Yinzo ya Nene ya Nzambi* samu na kulongisa,
mpe beno kangaka munu ve.
Kasi mambu nyonso yayi me salama samu na kulungisa mambu yina kele na kati ya Dibuku ya Nzambi."
50 Na yina,
bilandi nyonso bikaka Yesu,
mpe kimaka.
51 Ditoko mosi vwandaka landa Yesu.
Yandi lwataka kaka lele.
Ba mekaka na kukanga yandi,
52 kasi yandi bikaka lele,
mpe kimaka kimpene.
Yesu na ntwala ya kimvuka ya bakuluntu ya ba-Zwife
53 Bayina kangaka Yesu nataka yandi na yinzo ya nganga-Nzambi ya ntete* sika vukanaka bamfumu ya banganga-Nzambi*,
bakuluntu ya ba-Zwife,
mpe milongisi ya Misiku*.
54 Pyele vwandaka landa Yesu mwa manima,
mpe kotaka na lupangu ya nganga-Nzambi ya ntete.
Yandi vwandaka sika mosi na mikengi,
mpe vwandaka yotila tiya.
55 Bamfumu ya banganga-Nzambi,
mpe kimvuka nyonso ya bakuluntu ya ba-Zwife* vwandaka sosa kimbangi samu na kuzengila yandi lufwa,
kasi bawu kuzwaka ata dyambu.
56 Ya tsyelika,
bantu mingi vwandaka tuba bimbangi ya luvunu na nkumbu ya Yesu.
Kasi bimbangi ya bawu vwandaka ya kuswaswana.
57 Na yina,
mwa bantu ya nkaka telamaka,
mpe tubaka kimbangi yayi ya luvunu:
58 "Beto kuwaka yandi na kutuba ti yandi ke mwangisa Yinzo yayi ya Nene ya Nzambi yina bantu tungaka,
mpe na bilumbu tatu,
yandi ke tunga dyaka ya nkaka yina bantu ke tunga ve."
59 Kasi ata na kimbangi yayi,
bambangi vwandaka wisana ve.
60 Na yina,
nganga-Nzambi ya ntete telamaka na kati-kati ya kimvuka,
mpe yufulaka Yesu:
"Nge kele ve na dyambu ya kutuba na mambu yina bantu yayi ke na kufunda nge?"
61 Kasi Yesu pesaka mvutu ve,
mpe vwandaka kaka swi.
Nganga-Nzambi ya ntete yufulaka dyaka yandi:
"Nge kele Masiya*,
Mwana ya Nzambi* yina beto ke sambilaka?"
62 Yesu vutulaka:
"Ee,
ya kele munu,
mpe beno ke tala Mwana ya Muntu* ya kuvwanda na lweka ya bakala ya Nzambi-Mpungu,
mpe yandi ke kwiza na kati ya matuti."
63 Na yina,
nganga-Nzambi ya ntete pasulaka bilele ya yandi,
mpe tubaka:
"Beto ke dyaka ve na nsatu ya bambangi!
64 Beno me kuwa mutindu yandi me safula Nzambi.
Yinki beno ke na kubanza?"
Bawu nyonso tubaka ti ba fwana kuzengila yandi kitumbu ya lufwa.
65 Mwa bantu ya nkaka na kati ya bawu lobolaka yandi mante.
Bawu kangaka yandi kizizi,
bulaka yandi makofi,
mpe tubaka:
"Bikula!
Nani me bula nge?"
Na manima,
mikengi bakaka yandi,
mpe bulaka yandi bambata.
Pyele mangaka Yesu
66 Ntangu Pyele vwandaka na yinsi na kati ya lupangu,
kisadi mosi ya kento ya nganga-Nzambi ya ntete* kwizaka kuna.
67 Yandi talaka Pyele yina vwandaka yotila tiya.
Yandi talaka Pyele mbote,
mpe tubaka:
"Nge mpe,
nge vwandaka kintwadi na Yesu,
muntu ya Nazaleti."
68 Kasi Pyele mangaka mpe tubaka:
"Mu zaba ve yinki nge ke na zola kutuba,
mpe mu ke na kubakula ata dyambu."
Na manima,
Pyele kwendaka vwanda na mwelo ya lupangu.
69 Kasi kisadi yango talaka dyaka yandi,
mpe tubaka na bayina vwandaka kuna:
"Bakala yayi vwandaka na bawu."
70 Pyele mangaka dyaka.
Na manima ya mwa ntangu,
bayina vwandaka kuna tubaka dyaka na Pyele:
"Ya tsyelika,
nge kele mosi ya bantu ya yandi samu ti nge mpe,
nge kele muntu ya Ngalili."
71 Kasi Pyele zengaka ndefi mpe tubaka:
"Mu zaba ve muntu yina beno ke na kuzonzila.
Kana mu ke na kuvuna,
bika ti Nzambi kupesa munu kitumbu."
72 Kaka na ntangu yina,
nsusu kubaka na mbala ya zole.
Pyele bambukaka moyo na mambu yina Yesu zabisaka yandi:
"Ntete nsusu kuba bambala zole,
nge ke manga munu bambala tatu."
Na yina,
Pyele basikaka mbangu mpe dilaka.