Yesu zabisaka ti Yinzo ya Nene ya Nzambi ke mwangana
13
Ntangu Yesu vwandaka basika na Yinzo ya Nene ya Nzambi*,
mosi na kati ya bilandi* ya yandi tubaka:
"Mulongisi!
Tala matadi ya nene yayi!
Tala bunene ya yinzo yayi!"
2 Yesu vutulaka:
"Nge me tala yinzo ya nene yayi?
Ata ditadi mosi ke bikana na zulu ya ditadi ya nkaka.
Nyonso ke mwangana."
Mbandukulu ya bampasi
3 Yesu vwandaka ya kuvwanda na mongo ya bayinti ya Olive yina vwandaka talasanaka na Yinzo ya Nene ya Nzambi*.
Pyele,
Zaki,
Za,
mpe Andele yufulaka yandi na lweka:
4 "Zabisa beto wapi ntangu mambu yina ke salama,
mpe wapi kidimbu ke lakisa ti ntangu me fwana samu ti mambu yina salama?"
5 Na yina,
Yesu zabisaka bawu:
"Beno sala keba samu ti muntu vuna beno ve.
6 Bantu mingi ke kwiza na nkumbu ya munu.
Bawu ke tuba:
'Mu kele Masiya*',
mpe bawu ke vuna bantu mingi.
7 Ntangu beno ke kuwa bamvita ke na kusalama,
mpe bansangu ya bamvita yina ke kwiza,
beno vwanda ve na boma.
Mambu nyonso yina fwana kusalama,
kasi yawu ke vwanda ntete ve nsuka ya yinza*.
8 Bantu ya yinsi mosi ke nwanisa bantu ya yinsi ya nkaka,
mpe yinsi mosi ya ntinu ke nwanisa yinsi ya ntinu ya nkaka.
Na bizunga mingi,
ntoto ke ningana na ngolo nyonso,
mpe madya ke kondwa.
Ya ke vwanda mutindu bampasi ya ntete yina kento ke talaka na kubuta.
9 "Kasi beno sala keba samu na beno mosi.
Bantu ke nata beno na bayinzo ya lufundusu.
Bawu ke bula beno bikoti na kati ya bayinzo ya lusambulu ya ba-Zwife*.
Bawu ke fundisa beno na ntwala ya bantwadisi mpe bantinu samu na munu,
mpe beno ke vwanda bambangi ya munu na ntwala ya bawu.
10 Ntete-ntete,
bantu fwana kuzabisa Nsangu ya Mbote* na yinza nyonso.
11 Ntangu ba ke nata beno samu na yekula beno,
beno vwanda na boma ve na kusosa mambu yina beno ke zonza.
Kasi beno zonza mabanza yina ke kumina beno na ntangu yina,
samu ti yawu ke katuka ve na mayela ya beno,
kasi na Mpeve ya Longo.
12 Bantu ke yekula bampangi ya bawu mosi samu na kuzengila bawu lufwa.
Batata ke sala mpe mutindu mosi samu na bana ya bawu.
Bana ke kuma bambeni ya bibuti ya bawu,
mpe ke kufwa bawu.
13 Bantu nyonso ke yina beno samu na munu.
Kasi muntu yina ke tatamana tii na nsuka ke kuzwa mpulusu."
Kimwangisi ya Nene
14 "Ntangu beno ke tala muntu yina ba ke bokilaka Kisafudi-Kimwangisi ya kuvwanda na kisika yina yandi fwana kuvwanda ve.
(Muntu yina ke na kutanga mambu yayi,
fwana kubakula yawu mbote!)
Na yina,
bantu yina ke vwanda na Zude,
fwana kukima na zulu ya myongo.
15 Muntu yina ke vwanda na kibandu ya yinzo,
fwana kukulumuka ve,
mpe kota ve na yinzo samu na kubaka kima na kati.
16 Muntu yina ke vwanda na bilanga,
fwana kuvutuka ve na yinzo samu na kubaka kiyunga ya yandi.
17 Na bilumbu yina,
kyadi na bakento yina ke vwanda na bivumu,
mpe na bayina ke nwikisa bana mabene!
18 Beno sambila Nzambi samu ti mambu yayi salama ve na ntangu ya bamvula mpe madidi ya ngolo.
19 Ya tsyelika,
bilumbu yina ke vwanda bilumbu ya bampasi ya kulutila.
Katuka mbandukulu ya yinza yina Nzambi yidikaka tii ntangu yayi,
bampasi ya mutindu yina me salamaka ntete ve,
mpe yawu ke salama dyaka ve.
20 Kana Mfumu* bakaka ve lukanu ya kukulula lutangu ya bilumbu yina ya mpasi,
ata muntu lendaka zinga dyaka.
Kasi yandi kululaka yawu samu na bantu yina yandi soolaka.
21 Na yina,
kana muntu zabisa beno:
'Beno tala!
Masiya* kele awa' to 'Beno tala!
Yandi kele kuna',
beno kwikila yandi ve,
22 samu ti ba-masiya ya luvunu mpe mimbikudi* ya luvunu ke talana.
Bawu ke sala bidimbu ya ngitukulu mpe bimangu samu na kuvuna bantu,
mpe kana bawu lenda,
bawu ke vuna mpe bayina Nzambi soolaka.
23 Na yina,
beno sala keba!
Mu me zabisa beno mambu nyonso ntete yawu salama."
Nkwizulu ya Mwana ya Muntu
24 "Kasi na bilumbu yina,
na manima ya bampasi yina,
ntangu ke lezima dyaka ve,
mpe ngonda ke pesa dyaka ve nsemo.
25 Bambwetete ke kubwa,
mpe bima ya mazulu yina kele na lulendo ke ningana.
26 Na yina,
bantu ke tala Mwana ya Muntu* yina ke kwiza na kati ya matuti na lulendo mpe nkembo mingi.
27 Yandi ke fidisa bambazi* ya yandi na bandambu nyonso na yinza ya muvimba samu na kuvukisa na kisika mosi bantu nyonso yina Nzambi soolaka."
Kubakula ndongosolo ya yinti ya fike
28 "Beno bakula ndongosolo yina ke lakisaka beno yinti ya fike:
Ntangu bintala ya yawu ke kumaka pete-pete,
mpe makasa ya malu-malu ke basikaka,
beno ke zabaka ti ntangu ya bamvula me kuma pene-pene.
29 Mutindu mosi,
ntangu beno mpe ke tala ti mambu yina ke na kusalama,
beno fwana kuzaba ti nkwizulu ya Mwana ya Muntu* me kuma pene-pene.
Yandi kele na myelo ya bayinzo ya beno.
30 Ya tsyelika,
mu ke na kuzabisa beno:
Bantu nyonso yina ke na kuzinga ntangu yayi ke kufwa ve ntete mambu nyonso yayi salama.
31 Zulu na ntoto ke zimbana,
kasi mambu ya munu ke zimbana ve."
Kaka Nzambi zaba kilumbu yina ke kwiza Mwana ya Muntu
32 "Ata muntu zaba kilumbu mpe ngunga yina mambu yayi ke salama.
Ata bambazi* ya mazulu mpe ata Mwana ya Nzambi* zaba yawu.
Kaka yandi mosi Tata zaba yawu.
33 Beno sala keba!
Beno lala ve pongi samu ti beno zaba ve wapi ntangu yawu ke salama.
34 Yawu ke vwanda mutindu muntu yina ke na kukwenda na nzyetolo.
Yandi ke bika yinzo ya yandi na maboko ya bisadi ya yandi.
Yandi ke pesa kisalu na konso kisadi,
mpe ke tuba na mikengi ya mwelo ya lupangu na kulala ve pongi.
35 Na yina,
beno lala ve pongi samu ti beno zaba ve wapi ntangu mfumu ya yinzo ke vutuka.
Yandi lenda kuvutuka na nkokila,
to na kati-kati ya mpimpa,
to ntangu nsusu ya ntete ke kubaka,
to na suka.
36 Kana na mpamukunu yandi vutuka,
yandi fwana kukuta ve beno ya kulala pongi.
37 Mambu yina mu ke na kutubila beno,
mu ke na kutuba yawu na bantu nyonso:
Beno lala ve pongi."